VOV4.Bahnar - Pơ gê brei 23/5, Tổng Bí thư Nguyễn Phú Trọng năm pôk rơih tơ̆ anih tăh hla 58 Nguyễn Du, quận Hai Bà Trưng, Hà Nội.

Tổng Bí thư Nguyễn Phú Trọng pơ ma đŏng rŏng kơ tăh hla

Tơl nơ̆r apĭnh tơ̆ hơ năp lơ bơ ngai chih tơ drong kơ tơ̆ng ang lơ̆m tĕh đak păng đơ̆ng tĕh đak đe đơ̆ng rŏng kơ tăh hla pôk rơih, Tổng Bí thư Nguyễn Phú Trọng tơ ƀôh đon hơ pơi ‘mĕh, kŭm nhen rim bơ ngai tăh hla lơ̆m tĕh đak, đĭ đăng bơ ngai tang măt Kuôk hô̆i jăl XV păng bơ ngai tang măt Jơ nŭm pơ gơ̆r kon pơ lei jơ̆p tơ ring đei pôk rơih ‘măng mă âu, đĭ jơ hngâm yoa kon pơ lei, yoa tĕh đak, pơ vih ăn kon pơ lei, bơ̆ jang tôm hơ năp jang tih tên đơ̆ng kơ dih kiơ̆ trŏ khôi luơ̆t tơm păng luơ̆t tĕh đak.

Mă loi ‘nŏh jĭ athei 1 jơ hngâm hăm tĕh đak, hăm kon pơ lei, hăm khôi luơ̆t tơm tĕh đak Cộng hòa xã hội chủ nghĩa Việt Nam, bŏ jang tôm hơ năp jang đơ̆ng bơ ngai tang măt đei kon pơ lei lui, pôk hơ tŏk, tang măt ăn kon pơ lei vang vei lăng tĕh đak, vei lăng tơ pôl. Tổng Bí thư Nguyễn Phú Trọng pơ ma hơ dăh: tơ drong pôk rơih ‘măng mă âu đei pơ gơ̆r đang ‘lơ̆ng, pơ jing đei jơ hngâm đon hưch hanh ăn đĭ đăng kon pơ lei, jing năr lêh tih kơ tĕh đak bơ̆n.

Dơ̆ng: Tơ blơ̆