VOV4.Bahnar - Bơ̆ jang kiơ̆ tơ drong jang tơ ƀơ̆p pơ ma dơ nuh hăm bơ ngai tăh hla hơ drol kơ ‘măng hop a kŏm mă 2 Kuôk hô̆k jăl 15, Tổng Bí thư Nguyễn Phú Trọng hlôi sơng pơ ma dơ nuh hăm bơ ngai tăh hla dôm quận Ba Đình, Đống Đa, Hai Bà Trưng (Hà Nội) vă tơ roi tơ băt Tơ chĕng hơ drol tơ drong jang ‘măng hop akŏm răp mơ̆ng păng tơl nơ̆r dôm nơ̆r tơ gop apĭnh đơ̆ng bơ ngai tăh hla. Đei lơ bơ ngai tăh hla tơ ƀôh đon chhôk hơ iă găh jơ nei, iŏk yua gĭt kăl tơ̆ Hop a kŏm Trung ương 4 ‘nao pơ tôch, tơ ƀôh đon lăp hăm trong jang tơ gŭm đơ̆ng Đảng, Teh đak găh tơ drong jang kang ƀô̆ bơ̆ jang tơ roi lơ̆m iung pơ ma pơ tôch Hop akŏm đơ̆ng Tổng Bí thư Nguyễn Phú Trọng.

Tổng Bí thư Nguyễn Phú Trọng tơ ƀơ̆p pơ ma dơ nuh hăm bơ ngai tăh hla pơ lei tơm Hà Nội

Pơ ma tơ̆ jơ tơ ƀơ̆p, Tổng Bí thư Nguyễn Phú Trọng akhan, jĭ hơ buhh Covid-19 ƀơm ưh kơ ‘lơ̆ng tôch kơ tih hăm apŭng plĕnh teh pơ ma atŭm, lơ̆m noh đei teh đak bơ̆n. Truh dang ei, rim tơ drong jang kơ teh đak oei đei pơ gơ̆r hmă lơ̆m tơ drong tang găn jĭ. Tổng Bí thư Nguyễn Phú Trọng ‘meh vă tơ̆ hơ năp kơnh, pơ đĭ khŭl jang chĭnh trĭ păng kon pơ lei hơ nơ̆ng hơ tŏk jơ hngơ̆m đon tơ goăt tơ goăl, khŏm jang ‘lơ̆ng vă yak hloh mơ mat tat, ưh kơ gơh pơm pơ hơi tơ̆ hơ năp jĭ Covid-19. Tổng Bí thư Nguyễn Phú Trọng athei, rim bơ ngai tang măt Kuôk hô̆i kăl tơ pă jing bơ ngai tang măt tơ păt, 1 jơ hngơ̆m đon, ưh kơ pơ dơh hơ drin jang kiơ̆ ‘lơ̆ng hơ năp jang đei pơ jao.

Thuem: Tơ blơ̆