VOV4.Bahnar - Pơgê năr 5/5, tơ̆ Hà Nôị, pơgơ̆r Pơm lêh tơbăt 70 sơnăm năr pơjing Hơnĭh mong jên Tĕh đak Việt Nam (06/05/1951 - 06/05/2021) păng sơng iŏk Mê đai bơ̆ jang gơ̆h hơgei dơ̆ng mă Blŭng. Tổng Bí thư Nguyễn Phú Trọng vang năm păng iung pơma. Tơbăt dơ̆ng tơdrong joăt joe tơ iung pơjing păng atŏk tơ iung kơ hơnĭh jang Mong jên, Kơdră chĕp pơgơ̆r Hơnĭh mong jên Tĕh đak Việt Nam Nguyễn Thị Hồng pơma hơdăh: Lăng dơ̆ng 70 sơnăm au ki, hơnĭh jang mong jên ling lang hưch hanh hơmanh bơnê găh dôm tơdrong iŏk đei, tơdrong tơgop đơ̆ng hơnĭh ai hăm tơdrong jang tơ iung pơjing, atŏk tơ iung păng vei lăng Tĕh đak. Hôn bơnê dôm tơdrong mă hơnĭh bơ̆ jang mong jên iŏk đei, Tổng Bí thư Nguyễn Phú Trọng pơma hơdăh: Vă iung jang keh kong dôm trong tơlĕch jang atŏk tơ iung tĕh đak, hơnĭh jang vei lăng jên hi hăm hơnăp jang “jing plei nuih kơ tơdrong jang mŭk drăm” kăl hơnơ̆ng atŏk kơtang tôm tong, hơdrin hlŏh dơ̆ng, jang kiơ̆ ‘lơ̆ng hlŏh dơ̆ng dôm tơdrong hlôi iŏk đei păng trong jang đei ƀô̆h hơdăh lơ̆m dôm jĭt sơnăm hơdrol; jang tơnăp, kơrŭn đĭ jơhngơ̆m hơmet pơ ‘lơ̆ng dôm tơdrong jang tim mă hơ iă, tim mă ƀlep vă hơnhăk tĕh đak atŏk tơ iung tĕnh koăng păng kơ jăp hlŏh dơ̆ng lơ̆m chăl ‘nao.

Tơblơ̆ nơ̆r: Amazưt