VOV4.Bahnar - Pơ gê ‘năr 19/4, tơ̆ Hà Nội, Hnam pơ gang Trung ương Khŭl linh 108 pơ gơ̆r lêh tơ băt 70 sơ năm năr joăt joe păng sơng iŏk hơ năn Bơ̆ jang nuih mơng. Truh akŏm đei Tổng Bí thư Nguyễn Phú Trọng, Bơ ngai jang lơ̆m Anih tơm Chĭnh trĭ, Bí thư Quân ủy Trung ương, dôm bơ ngai jang lơ̆m Anih tơm Chĭnh trĭ, Bí thư Trung ương Đảng, Bơ ngai jang lơ̆m Trung ương Đảng, dôm bơ ngai chĕp kơ̆l Đảng, teh đak sơ̆ kŭm hăm bơ ngai tang măt rim Anih tơm, anih jang Trung ương.

Tổng Bí thư Nguyễn Phú Trọng, Bí thư Quân ủy Trung ương tơ mang tơ̆ Hơ nih joăt joe kơ Hnam pơ gang Trung ương Khŭl linh 108

Tang măt kơ dră chĕp kơ̆l Đảng, teh đak, pơ jao hơ năn Bơ̆ jang nŭih mơng ăn kơ Hnam pơ gang Trung ương Khŭl linh 108, Phŏ Thủ tướng Vũ Đức Đam chih iŏk: Ưh khan lăp ƀôh hơ dăh găh jang hơ dai, hnam pơ gang oei jing 1 hơ nih tôch kơ chhôk ‘nă lơ̆m tơ plih ‘nao tơ drong jang vei lăng. Jĭ 1 hnam pơ gang khŭl linh mă lei hlôi hoei kơ pơm tŏ sĕt lơ̆m khăm hơ met jĭ ăn linh, kon pơ lei, tơ chĕng hơ len, pơ tho găh jang pơ gang khŭl linh mă hlôi hơ tŏk tơ drong ‘lơ̆ng đơ̆ng kơ dih vă vang tơ gop roi ‘năr roi lơ lơ̆m tơ drong jang vei lăng jơ hngơ̆m jăn kơ đơ̆ng đĭ đăng kon pơ lei păng kiơ̆ trong hơ drơ̆k dơ̆ng roi pơm hơ iă dơ̆ng tơ drong gơ̆h jang pơ gang khŭl linh. Athei hnam pơ gang hơ nơ̆ng pơ jing khŭl kang ƀô̆ kơ jăp găh chĭnh trĭ, pơm jŭk yŭk trong hơ lâu găh jang hơ gei, tơ drong jang tơ găl hăm joăt joe ‘noh Ƀô̆ đô̆i ƀok Hồ hai, Thây pơ gang nhen mĕ ‘iơ̆m dim hai.

Thuem: Tơ blơ̆