VOV4.Bahnar - Drâm kơ sơ̆ (18/11), Kơ dră jang lơ̆m Trung ương Đảng, Tổng Thư ký Kuô̆k hô̆i, Kơ dră vei lăng Anih jang kơ Kuô̆k hô̆i Bùi Văn Cường kŭm hăm khul jang truh akŏm lơ̆m Năr tơ guăt đĭ đăng hơ drĕch hơ drung hăm kon pơ lei Bahnar, tơ̆ plei Đăk Wớt Yốp, xăh Hơ Moong, apŭng Sa Thầy păng bơ̆ jang hăm Anih jang Đảng dêh char Kon Tum.

Tổng thư ký Kuô̆k hô̆i Bùi Văn Cường hơ păh tơ mam ăn bơ ngai mơ mat tat

Pơ ma lơ̆m jơ tơ ƀâp, Tổng Thư ký Kuô̆k hô̆i hơ pơi ‘mĕh kon pơ lei hơ nơ̆ng tơ guăt 1 ƀơ̆r đon, jang kiơ̆ ‘lơ̆ng dôm tơ drong krao hơ vơn păng tơ drong pơ jei băl ‘mêm kơ tĕh đak vă tơ gŭm băl jang atŏk tơ iung mŭk drăm, pơm hơ tŏk tơ drong arih xa. Tơ̆ jơ bơ̆ jang hăm Anih jang đảng dêh char Kon Tum, Tổng thư ký Kuô̆k hô̆i Bùi Văn Cường tơ ƀôh đon hơ iă tơ̆ hơ năp tơ drong tơ plih ‘lơ̆ng găh mŭk drăm, jŏh ayŏ kơ dŏ xoang, tơ pôl tơ̆ Kon Tum khei ‘năr âu ki.

Tơ drong ‘nâu tơ ƀôh hơ dăh tơ drong chơt hơ iă kơ Năr Tơ guăt đĭ đăng hơ drĕch hơ drung oei pơ gơ̆r tơ̆ jơ̆p pơ lei pơ la lơ̆m dêh char. Tổng thư ký Kuô̆k hô̆i Bùi Văn Cường hơ păh ăn dêh char Kon Tum 1 ti hlak jên tơ gŭm ăn dêh char tơ lĕch trong tang găn jĭ Covid-19 păng hơ păh 5 tŏ hnam ăn bơ ngai tơ nuh, akŏm đĭ đăng đei kơ jă 250 triu hlak jên.

Dơ̆ng: Tơ blơ̆