VOV4.Bahnar - Tơbăt 90 sơnăm Năr pơjing Đoàn Hơdrŭh tơdăm Kŏng san Hồ Chí Minh, dôm năr au ki, tơ̆ apŭng tơnap tap hlŏh Mdrăk, dêh char Dak lăk hlôi đei pơgơ̆r lơ tơdrong jang hơdrŭh tơdăm năm iung jang kơ yuơ kon pơlei. ‘Nau lăp mĭnh lơ̆m mơ jĭt tơdrong jang tơgŭm kon pơlei đơ̆ng khŭl hơdrŭh tơdăm apŭng Mdrăk tơlĕch jang lơ̆m 1 khei au ki.

‘Nhŏng Nông Anh Dũng, Bí thư Đoàn apŭng Mdrăk tơbăt, atŭm hăm chă hơpuih hơmet trong, pơtăm ‘long tơ̆ groi phui phang, hơdrŭh tơdăm lơ̆m apŭng oei iung jang dôm tơdrong jang kăl nhen: tơgŭm kon pơlei kon kông oei tơ jê̆ dơnau đak hnam kmăi đak Krông Pách thượng tơ̆ tơring Cư San yông oei tơ̆ pơlei oei hle, tơ iung pơjing hnam ‘mêm mơnat, tơ iung pơjing ming man hơnĭh pơchơt pơ hiơ̆, pơm gơng ăn kon pơlei. Rim tơdrong jang mă kăl lăng trŭh tơring atăih yăih, tơring kon kông.

Tơblơ̆ nơ̆r: Amazưt