Pơnơ̆ đak dơsĭ Xóm Rớ oei lơ̆m phương Phú Yên, dêh char Đăk Lăk lơ̆m dôm năr tơjê̆ ou hơvơn lơ kon pơlei păng tơmoi truh. Yuh 'năr rơngơp 'lơ̆ng, atŭm hăm dơnŏk duk rôp ka Đông Tác, ah hơnăp noh 'măng đak dơsĭ Đà Diễn hăm duk mơ̆t lĕch. Tơmang lăng gah Tu noh kông Chóp Chài păng tơring kơdrơ̆m Tuy Hòa. Lăng hơlơ̆k gah Pơmơ̆t noh gơng Hùng Vương găn tơroh đak krong Đà Rằng. Tôm noh pơjing đei um rup 'lơ̆ng rŏ kơ cham char.

Pơhlom lơ̆m 3 sơnăm kơ ou, ah pơyan phang, tơring ou hơvơn lơ đe sơnăm mơlôh năm truh ah rim kơsơ̆ măng. Đơ̆ng minh pơlei ƀơm rơnglă đak dơsĭ pơrăm, dang ei Xóm Rớ jing hơnih 'lơ̆ng mă tơmoi truh tơmang pơm ăn kon pơlei tơring dơsĭ ƀrơ̆k kơ jơhngơ̆m. Minh 'nu bơngai hơrih tơ̆ ou ăn tơbăt: "Dang ei hơmet ming pơ-'lơ̆ng thoi ou, tơmoi đe truh tơmang lơ dêh. 'Noh dang ei tơ̆ ou akŏm chă tĕch mơdro adoi lơ, da ƀiơ̆ kơ tơnap tap bơih"

Tơdrong 'lơ̆ng hloh kơ pơnơ̆ đak dơsĭ Xóm Rớ pơtơm đơ̆ng hơnê̆ khei 6 ou ki, ah mă dôm pơsei mam ƀê tŏng đei man găn rơnglă đak dơsĭ "pơlơh ao 'nao" hăm dôm đak kơ-ang jơk, brê, dreng gôh... ang chrê chra hrau atŭm hăm plenh teh păng đak dơsĭ jơk. Lơ kon pơlei tơ̆ tơring păng tơmoi truh tơmang lăng, chŭp um, mă kăl ah pơgê hrôih păng kơsơ̆, ah ang 'năr pơchră pơjing đei dôm um ai 'nao 'lơ̆ng kơ măt. Minh 'nu tơmoi truh tơmang chơt hơ-iă tơroi: "Hơdrol ki inh năm truh tơ̆ ou bơih, ah 'nao đei pơm ou sơ̆ noh inh năm truh dơ̆ng.  Tơpă ou jĭ view kơ triu đô hloi, 'lơ̆ng tơpă".

Đơ̆ng đak sơn kơ minh hơnih jang tơgŭm, phương Phú Yên hlôi hơvơn rim bơngai vang jang atŭm hăm minh ƀar bơngai juăt jang hơgei gah sơn pik đak kơ-ang ăn ƀê tŏng găn rơnglă đak dơsĭ Xóm Rớ. Rim bơngai truh jang ăn tơbăt, 'nhŏng oh jang hơnơ̆ng ah 'năr tŏ, tơdrong pik đak sơn hăm dôm tơdrong pơm rơgoh hơnih pik đak sơn tơ̆ kơpal, pik pơ-'lơ̆ng đak kơ-ang... mă lei đe mơn sô̆ lơ̆m jơhngơ̆m ah mă đei lơ bơngai sơng drơ̆ng:  

" 'Nao 'lơ̆ng hloh ăn phương po kơdih, 'nhŏng oh ƀôh thoi noh adoi kơ da ƀiơ̆ hrat. Jang mah dôm năr hloi, mă lei ƀôh tơdrong jang đei yua, đei rim bơngai drơ̆ng lăp 'noh kơdih sô̆ hơ-iă dêh"

Tơdrong "kơsu ao 'nao" ăn dôm hơnih man ƀê tŏng găn rơnglă đak dơsĭ Xóm Rớ ưh hơdrô̆ tơgŭm pơ-'lơ̆ng ăn cham char tơring tơter đak dơsĭ mă oei pơjing đei dôm tơmam drăm hơlen băt ăn tơmoi truh tơmang lơ̆m pơyan phang sơnăm 2026. 'Nou ưh hơdrô̆ iŏk yua tơdrong kăp gĭt kơ cham char plenh teh, hơtŏk jang tơmang pơhiơ̆ kơ tơring, mă oei ăn ƀôh, tơdrong hơvơn tơmang pơhiơ̆ ưh kơsĭ truh đơ̆ng dôm kơsô̆ jên asong jang kăp krên, mă kơdih đơ̆ng tơdrong oei xa pơm jang đơ̆ng jơnŭm pơgơ̆r tơring păng tơpôl kon pơlei hăm cham char plenh teh tơ̆ tơring kơdih po.