Tơ̆ xah Tà Hine, tơring hơmŏ vă pơkăp đơ̆ng 24 thôn oei pă 12 thôn. Kiơ̆ tơlĕch tơchơ̆t, 3 thôn Đà Thành, Đà Phước păng Đà An gô hơgrop jing thôn Đà An. Đơ̆ng rŏng kơ hơgrop, thôn 'nao đei 775 unh hnam hăm hloh 3.300 măt bơngai, jing thôn să hloh kơ xah. Ƀok Hồ Đấu, Ƀĭ thư Chi ƀô̆ thôn Đà Phước, xah Tà Hine, dêh char Lâm Đồng ăn tơbăt: "Hơmet ming jơnŭm pơgơ̆r vă kơ hiôk hloh păng jang tơnăp hloh, 'noh kơdih inh drơ̆ng lăp mơ̆n. Inh chă hơvơn kon pơlei păng unh hnam pơm kiơ̆ tơnăp tơchơ̆t tơlĕch đơ̆ng teh đak gah hơgrop thôn".

Atŭm hăm Tà Hine, xah Bảo Lâm 1 adoi oei tơlĕch hơgrop thôn kiơ̆ pơkăp bot 'lơ̆ng. Đơ̆ng rŏng kơ hơgrop, tơring tơjur 19 hơnih tơm vei lăng tơ̆ tơring păng tơjur 57 'nu bơngai jang, tơgop tơjur ƀiơ̆ jên mong kơ teh đak, hơtŏk tơdrong jang tơnăp hloh gah tơdrong jang chinh trĭ tơ̆ tơring kon pơlei.

Kiơ̆ kơ ƀok Nguyễn Đức Thanh, Phŏ Kơdră Hơnih jang vei lăng kon pơlei xah Bảo Lâm 1, tơdrong chih akŏm tơchơ̆t hơgrop đei pơm kiơ̆ tơdrong hơlen hơdah dôm tơdrong oei xa kơ tơring kon pơlei, hơgăt teh, tơring teh, hơnih jang hanh chinh, tơdrong hơrih păng joh ayŏ vă pơjing đei tơdrong drơ̆ng nơ̆r lơ̆m kon pơlei: "Nhôn năng kăl gah tơdrong oei xa kơ kon pơlei, gah groi teh, tơring teh, tơring jang hanh chinh, tơdrong hơrih păng joh ayŏ, vă nhôn jang chă hơgrop thôn. Pơm thoi yơ iŏk đei tơdrong pơdrơ̆ng đơ̆ng kon pơlei lơ̆m tơdrong hơgrop thôn, vă pơm jang hơtŏk tơ-iung mŭk drăm tơpôl kơ tơring".

Kiơ̆ tơdrong hơlen đơ̆ng dêh char Lâm Đồng, dang ei lơ̆m jơ̆p dêh char đei 2.773 thôn, kueng kơphô̆. Pơm kiơ̆ tơdrong pơgơ̆r đơ̆ng Tĭnh uy, rim tơring tŏk bŏk oei keh đang tơdrong jang vă tơjur đơ̆ng 50% tŏk tơ̆ kơpal kơsô̆ thôn, kueng kơphô̆ đơ̆ng rŏng kơ hơgrop. Đơ̆ng tơdrong drơ̆ng lăp đơ̆ng kon pơlei păng tơdrong jang kơjăp đơ̆ng jơnŭm pơgơ̆r tơring, tơdrong hơgrop thôn, kueng kơphô̆ tŏk bŏk đei pơm jang tơnăp lơ̆m vei lăng, pơvih ăn kon pơlei tơnăp hloh, pơtrŏ hăm tơchơ̆t hơtŏk tơ-iung lơ̆m chăl anglŏ hơrih 'nao.