Til pơgê, tơ̆ Hnam hŏk hôp Kueng kơphô̆ Cao Thắng, phường Ea Kao lơ kon pơlei năm pơm hla ar teh, hla ar hộ tịch, chih tơbăt anih oei xa. Ưh pă đei tơdrong kon pơlei athei năm tơ̆ lơ anih, gô chang lơ năr nhen adrol sơ̆, kăn ƀô̆ phường chông ba khul jang đơ̆ng “mĭnh anih” jur tơ̆ tơring kon pơlei oei xa vă pơvih ăn mih ma duch nă.

Ƀok Lương Đình Trường, bơngai oei tơ̆ Kueng kơphô̆ Cao Thắng ăn tơbăt, lơ sơnăm ‘nâu kon pơlei tôch ơm mưh năm pơm hla ar, yoa trong hơtăih hai, ưh băt vă apinh bu hai. Dang ei kăn ƀô̆ jur truh tơ̆ pơlei pơtho tơƀôh kơna kŭm tôch hơiă: “Mih ma duch nă tôch hơiă păng đe truh tơ̆ âu tôch lơ vă chă pơm bơ̆n hla ar. Kăn ƀô̆ jang rơhăo, tơpăt ‘lơ̆ng, tơl tơblang, roi tơƀôh tôch rơđăh, tơdrong ‘nâu trŏ hăm trong jang đơ̆ng Đảng păng teh đak.”

Kiơ̆ yă Đỗ Thị Nguyệt, Phŏ Kơdră Anih pơm hla ar ăn tơpôl phường Ea Kao, lăp 1 pơgê mă blŭng jur bơ̆ jang tơ̆ Tơring kon pơlei oei xa hlôi đei 170 ‘nu bơngai năm pơm hla ar, lơ hlŏh kơsô̆ tơchĕng blŭng a: “Hăm giĕng măih năm pơm hla ar, đon pơhnŏng đơ̆ng Anih vei lăng kon pơlei phường ‘nŏh adrin pơm keh hla ar lơ̆m 7 năr păng hăm hla ar ƀônh ‘nŏh vă pơm ăn kơtă lơ̆m năr hloi.”

Đơ̆ng rŏng 1 sơnăm bơ̆ jang kiơ̆ trong jang Khul kơdră pơgơ̆r tơring 2 tăl, tơ̆ Ea Kao, tơdrong kon pơlei ƀôh hơiă hlŏh jĭ, ưh lăp pơm hla ar roi hrĕnh đĕch mă khul kơdră pơgơ̆r roi jê̆, roi kơchăng mưh bơ̆ jang.

Yak rok trong bê tông kơjung 600 mét ‘nao man đang tơ̆ Kueng kơphô̆ 5, ƀok Dương Lê Sơn ưh kĕ ôn jơhngâm đon chơt hơiă. Hlŏh 50 sơnăm âu ki, trong âu jĭ trong teh. Lơ ‘măng hop akŏm kon pơlei, pơlung kon pơlei man trong ưh kơ jing ngăl. Mă lei lăp 2,3 khei đơ̆ng rŏng kơ Khul kơdră pơgơ̆r ‘nao bơ̆ jang, kon pơlei chu chĕng song vă jê̆ 200m2 teh păng tơgop vă jê̆ 200 triu hlak jên vă pơm trong: “Khul kơdră pơgơ̆r tơring 2 tăl bơ̆ jang tôch hơbĕch hơbal, păng jang roi gơ̆h, tơgŭm ăn kon pơlei jang atŏk tơiung mŭk drăm, kŭm nhen pơm trong yak vih vât. Đĭ đăng kon pơlei mât 1 ƀơ̆r đon, rim bơngai hlôh vao akhan, pơm trong ‘nŏh tôch ‘lơ̆ng kơna đe chu jang kiơ̆.”

Đơ̆ng dôm tơdrong hơiă thoi noh, phường Ea Kao tơlĕch tơdrong jang “Tơdrong jang kơ teh đak, tơdrong jang kơ pơlei pơla, teh kăp gĭt kŭm chu chĕng song” vă pơih xă trong, hơmet pơ ‘lơ̆ng tơring kơdrâm păng atŏk tơiung chă tơmang lăng. Jang kiơ̆ trong jang ‘nâu, lơ unh hnam kŭm hăm hnam chuơ Phổ Hiền chĕng song teh vă pơih xă trong tơter dơnâu đak Ea Kao, pơjing trong yak jơ̆ng hoh ăn tơpôl.

Thượng tọa Thích Phước Huyền, vei lăng Hnam chuơ Phổ Hiền akhan, tơdrong chĕng song teh ưh lăp vă pơih trong đech mă oei pơih đei anih oei xa ‘nao ăn kon pơlei dơ̆ng: “Pơm đei 1 pôm trong yak hăm jơ̆ng hoh thoi âu ‘nŏh tôch kơ ‘lơ̆ng ăn tơdrong pơtâp hơkâu jăn kơ đe ƀok yă kră, bơngai lui phât. Inh tơ̆ hnam chuơ Phổ Hiền tôch hơiă vă trong âu đei pơm đang ‘lơ̆ng adrol kơ sơnăm 2030.”

Ưh lăp trong nơnăm đei tơplih ‘lơ̆ng đĕch, tơdrong sơđơ̆ng tơ̆ tơring kŭm đei vei roi kơjăp. ‘Nhŏng Hồ Hậu, tơ ‘ngla 1 pơm hnam homestay tơ̆ phường Ea Kao ăn tơbăt, lơ tơdrong đei khul linh công an sek tơlang tôch hrĕnh, gơnơm vei kơjăp tơring: “Tơdrong sơđơ̆ng đei vei lăng roi ‘lơ̆ng; pơtih gia inh đei 1 pôm hnam homestay tơ̆ trong Nguyễn Trường Tộ, lơ̆m kơsơ̆ ‘nŏh đei bơngai tơtông ‘nŏh pơih lăng camera gơih ăn công an. Pơgê đơ̆ng rŏng inh năm tơ̆ công an bơ̆ jang ‘nŏh Yŏng Công an phường tơroi, đĭ rôp đei bơngai tơtông bơih.”

Đơ̆ng rŏng kơ tơmât hơdai, phường Ea Kao hlôi pơm đang hlŏh 2.000 blăh hô sơ hla ar vei lăng, pơm trŏ năr hơgăt ngăl; pơm hô sơ trư̆k tuyê̆n đei vă jê̆ 99%; vă rim kon pơlei păng anih tĕch mơdro lăp đon ngăl. Lơ tơdrong hơgăt jang mŭk drăm, tơpôl đei jang ‘lơ̆ng, iŏk đei lơ hlŏh kơsô̆ hơgăt, lơ̆m noh thu mong jên ăn teh đak lơ hlŏh 107% kơsô̆ dêh char pơjao.

Ƀok Đặng Gia Duẩn, Bí thư Đảng phường Ea Kao akhan, tơdrong jang đei tih hlŏh đơ̆ng rŏng 1 sơnăm bơ̆ jang kiơ̆ trong jang ‘nao ‘nŏh kon pơlei lăp đon, vang tơgŭm păng tơdrong jang tơnăp ‘lơ̆ng đơ̆ng khul kăn ƀô̆: “Tơdrong tih hlŏh nhôn hlôi jang đei ‘nŏh jĭ tơdrong drơ̆ng nơ̆r tơgŭm đơ̆ng kon pơlei, đe kăn ƀô̆ mĭnh jơhngâm đon bơ̆ jang prăt jăl jang đơ̆ng sơnăm 2025-2030. Nhôn oei chih tơlĕch lơ tơdrong tơchơ̆t ‘lơ̆ng găh hơmet ming trong pơm hla ar păng tơplih hăm kơmăy sô̆, găh chă tơmang lăng tơklep hăm tĕch mơdro, pơvih pơvăn păng tơproh trong jang. Tơ̆ hơnăp kơnh, hơdai hăm bơ̆ jang kiơ̆ dôm tơdrong tơchơ̆t gĭt kăl nhôn vă akŏm jơhngâm ăn tơdrong jang tŏk mŭk drăm tŏk truh 2 kơsô̆ dơ̆ng.”

Mĭnh sơnăm tam mă đunh kiơ ră, mă lei đơ̆ng dôm tŏ trong đei pơih xă, dôm kơsơ̆p hô sơ đei pơm kơtă tơ̆ tơring kon pơlei oei xa truh đon bơ̆ jang tôch kơchăng đơ̆ng khul kơdră pơgơ̆r… trong jang Khul kơdră pơgơ̆r tơring 2 tăl tơ̆ Ea Kao oei ăn ƀôh tơdrong tơplih ‘lơ̆ng đơ̆ng 1 anih jang vei lăng jê̆ kon pơlei păng pơvih ăn kon pơlei roi đei yoa hlŏh./.