Tơ̆ 5 xah sơlam teh đei: Bờ Y, Ia Tơi, Ia Đal, Đăk Long păng Đăk Plô, dêh char Quảng Ngãi, dôm tơdrong ming man hnam trưng phôh thŏng teh đak rong 'me ah jăl Kơđeh - Trung hŏk kơ sơ hrơ̆p minh 'măng ming man đơ̆ng khei 3/2026. 'Nou ưh hơdrô̆ jĭ hơyak jang lơ̆m asong ming man hnam trưng pơtho pơhrăm, mă oei tơgop pơjing tơdrong hơtŏk tơ-iung đunh đai ăn tơring sơlam teh, tơring kon kông gah Pơmơ̆t Quảng Ngãi.

Tơ̆ xah Bờ Y, minh hnam trưng kơjăp ‘lơ̆ng, đei tôm tơmam drăm ăn hŏk pơhrăm jing tơdrong hơpơi ‘meh kơ đe thâi kô păng hŏk tro lơ̆m lơ sơnăm kơ ou. Kô pơtho Võ Thị Tuyên, pơtho tơ̆ Hnam trưng Jăl kơđeh păng Trung hŏk kơ sơ Đăk Xú, xah Bờ Y hơpơi ‘meh tơdrong ming man đei pơtơm trŏ nhen tơchơ̆t tơlĕch: “Dang ei đei Đảng păng Teh đak tơgŭm man hnam trưng teh đak rong ‘me dôm jăl hŏk, tơpă gô đei minh hnam trưng kơjăp ‘lơ̆ng. Đơ̆ng noh pơm trong hiôk ăn bơngai pơtho păng bơngai hŏk kơ hnam trưng pơm jang tơnăp tơdrong pơtho pơhrăm kơ po. Đe hŏk tro adoi gô đei minh hơnih hŏk pơhrrăm ‘nao hơgei”.

Dang ei dêh char Quảng Ngãi tŏk bŏk oei man 9 hnam trưng teh đak rong ‘me dôm jăl hŏk tơ̆ tơring sơlam. Rim tơdrong jang đei pơtơm drơ̆ng minh, đei tơdrong jang kơjăp đơ̆ng jơnŭm pơgơ̆r tơring păng kon pơlei.

Tơ̆ xah sơlam Dục Nông, tơdrong rơih hơnih man hnam trưng đei pơm jang hơdah ‘lơ̆ng, đei tơdrong vang jang đơ̆ng kon pơlei. Hơnih teh tơ̆ thôn Ngọc Hiệp să pơhlom 4,2 hectar đei rơih pơm hơnih man hnam trưng. Ƀok Trần Cao Bảo Việt, Kơdră Hơnih jang vei lăng kon pơlei xah Dục Nông, dêh char Quảng Ngãi ăn tơbăt, tơring hlôi kơchăng chih akŏm trong pơkăp jang, iŏk yua hnam trưng lăm hŏk:  “Lơ̆m tơdrong ming man hnam trưng dôm jăl hŏk noh nhôn đei tơdrong drơ̆ng lăp đơ̆ng kon pơlei, mă kăl noh kon pơlei tơ̆ thôn Ngọc Hiệp, thôn Dục Nhầy 3, ‘noh tơdrong ming man truh dang ei đei jang trŏ nhen tơchơ̆t tơlĕch”.

Tơ̆ hơnih man hnam trưng teh đak rong ‘me jăl Kơđeh – Trung hŏk kơ sơ Dục Nông, kơ hrĕng bơngai jang atŭm hăm kơmăi kơmŏk pơm jang hơnơ̆ng. Thượng tá Vũ Thanh Khương, (Hơnih tơm Kŏng ti 319 lơ̆m Hơnih tơm vei lăng Khul linh), Kơdră Jơnŭm pơgơ̆r ming man sơkơ̆t hơdah, hơnih jang vei sơđơ̆ng keh đang man hnam trưng lơ̆m khei 7 ou kơnh: “Sơkơ̆t hơdah ou jĭ minh tơdrong jang chĭnh trĭ kăp gĭt hloh, nhôn hlôi akŏm bơngai jang, tơmam drăm păng vă vei sơđơ̆ng trŏ tơchơ̆t tơlĕch. Jô̆ truh khei năr ou, hơnih jang hlôi ming man đei tôm 13 tơdrong kăl păng dang ei noh đei jê̆ 200 bơngai jang ming man adoi nhen đei 10 gre, kơmăi kơmŏk tŏk bŏk oei pơlơh băl pơm jang, vă tơgĕch ah tŏ ‘mi kial sơđơ̆ng vă hơtŏk man dah tenh keh đang nhen tơlĕch”.

Kiơ̆ Jơnŭm vei lăng tơdrong ming man trong nơnăm, ming man tơdrong pơyua ăn kon pơlei păng hơnih jang kŏng ngĭp dêh char Quảng Ngãi, dôm tơdrong man hnam trưng dôm jăl hŏk tơ̆ Dục Nông, Sa Loong, Rờ Kơi păng Mô Rai tŏk bŏk đei tơlĕch jang drơ̆ng minh. Lơ̆m noh, tơdrong ming man tơ̆ xah Rờ Kơi đei jơnei pơhlom 43%, Dục Nông păng Sa Loong đei pơhlom 40%, oei Mô Rai đei pơhlom  22% tơdrong jang.

Atŭm hăm 4 tơdrong oei ming man, 5 tơdrong ming man tơ̆ xah Bờ Y, Ia Đal, Ia Tơi, Đăk Long păng Đăk Plô adoi đei pơtơm man, tŏk bŏk oei keh đang hla bar kăl vă pơtơm ming man. Yă Y Ngọc, Phŏ Kơdră Juăt jang kơ Hơnih jang vei lăng kon pơlei dêh char Quảng Ngãi pơgơ̆r hăm rim hơnih jang, rim tơring hơmet dôm tơdrong kăl vă ming man keh kong dôm hnam trưng teh đak rong ‘me dôm jăl hŏk ah mă keh đang: “Truh sơnăm hŏk 2026 - 2027, pơtôch jăl mă 1, 4 hnam trưng đei tơmơ̆t yua noh khul kang ƀô̆ vei lăng, bơngai pơtho athei vei sơđơ̆ng vă bơ̆n gơh pơtơm pơtho hŏk pơhrăm. Hơnih iŏk ming man pơtoi tơlĕch jang, hơmet khul kang ƀô̆ jang vei lăng păng bơngai pơtho ăn sơnăm hŏk 2027 - 2028 ah mă 5 hnam trưng oei lăi đei tơmơ̆t yua. Inh pơtruh nơ̆r hăm Hơnih Pơtho Pơhrăm dêh char Quảng Ngãi tơrĕk tơgŭm đơ̆ng dang ei hloi vă bơ̆n gơh vei sơđơ̆ng trŏ nhen tơdrong tơlĕch pơm jang lơ̆m khei năr truh”.

Rim hnam trưng hŏk mă teh đak rong ‘me dôm jăl hŏk dar deh đei iung jing tơ̆ tơring sơlam kơ dêh char Quảng Ngãi ưh hơdrô̆ jing tơdrong jang ăn pơtho pơhrăm, mă oei jing tơdrong jang kơ đon lui. Kon pơlei tơring sơlam kơ dêh char Quảng Ngãi gô chang rim năr tơdrong ming man keh đang, vă kon hơ-ioh po gơh đei hŏk pơhrăm lơ̆m hnam trưng ‘lơ̆ng kơjăp.