Truh tơ̆ Anih pơm hla ar ăn tơpôl xăh Nhân Cơ, dêh char Lâm Đồng dôm năr ‘nâu, kon pơlei ƀôh tôch lăp đon hăm Anih bơ̆ jang xă, rơgŏh ‘lơ̆ng, trong pơvih ăn kon pơlei tôch lăp. Tơdrong iŏk yoa kơmăy, tĭt iŏk kơsô̆ tơgum ăn đe pơm hla ar  tơrih tơrih, hơtŏ băl, tôch hiôk, ưh pă đei tơgar tơlŭt băl, dăh mă athei gô chang đunh.

Pơm hla ar Rơneh ăn kon, ‘nhŏng Trần Đình Khương, xăh Nhân Cơ tơroi: “Inh năr ‘nâu truh tơ̆ âu pơm hla ar, ƀôh anih jang xă ‘lơ̆ng, ‘you rơgoh, tôch hiôk, jang hăm kơmăy kơmŏk ‘nao ngăl, tơdrong pơm hla ar hrĕnh tơpă”.

Nhen thoi noh mơ̆n, tơ̆ xăh Quảng Tín, gơnơm đei tơlĕch jên răt hơmet tôm kơmăy, 1 khei Anih pơm hla ar iŏk pơm dang 600 blăh hô sơ, đĭ đăng đei pơm trư̆k tuyê̆n ngăl păng pơm đang trŏ năr pơkă hlŏh 99%. Kiơ̆ ƀok Lưu Văn Gia, Kơdră Anih pơm hla ar ăn tơpôl xăh Quảng Tín, đơ̆ng khei 2 sơnăm ‘nâu, tơring kơchăng hơmet jên răt tơmam, kơmăy kơmŏk, đơ̆ng noh gơ̆h pơm ‘lơ̆ng tơdrong ‘mĕh vă pơm hla ar ăn kon pơlei: “Xăh tơlĕch jên răt hơmet kơmăy, pơih xă anih jang, răt dơ̆ng kơmăy tĭt iŏk kơsô̆, kơmăy hơlen năng rim nơ̆r chih tơroi, kơmăy tĭnh, kơmăy in, kơmăy scan păng hơtŏk ming trong Internet”.

Oei tơ̆ xăh Kiến Đức, tơdrong iŏk, pơm hla ar lơ̆m mang roi đunh roi ƀônh hiôk gơnơm kơmăy kơmŏk ‘nao đei răt hơmet tôm. Kiơ̆ ƀok Phạm Xuân Anh, Phŏ Kơdră Anih pơm hla ar ăn tơpôl xăh Kiến Đức, kơmăy kơmŏk, camera vei lăng, kơmăy pơm hla ar đei kơdâu sơđơ̆ng ‘lơ̆ng, tơgŭm tôch đei yoa ăn kăn ƀô̆, bơngai jang mưh bơ̆ jang: “Rim kơmăy hơlen năng, kơmăy chih răk păng mang đei hơmet ‘lơ̆ng kơna tơdrong iŏk pơm hla ar kŭm ƀônh hiôk, hrĕnh ƀiơ̆”.

Lơ̆m dêh char Lâm Đồng dang ei đei 100% anih jang, tơring tơrang đei chô̆ mang, roi tơƀôh hơdăh 2.310 kơloăi hla ar athei pơm. Kơsô̆ hla ar đei pơm đang tơ̆ xăh trŏ năr pơkă đei 98,38%, jing “anih ang hơdăh” lơ̆m tơdrong hơmet ming trong pơm hla ar vei lăng.

Tơdrong tơmât jên jang hrơ̆ch ‘lơ̆ng, tơklep hăm hơtŏk trong tơplih hăm kơmăy sô̆ oei tơgŭm ăn rim xăh tơ̆ dêh char Lâm Đồng jing “anih gơnang yoa kơjăp ‘lơ̆ng” jê̆ kon pơlei, pơvih tôm tơdrong ăn kon pơlei, bơ̆ jang roi đunh roi hrĕnh, rơđăh rơđong păng đei yoa./.