Hlôi jing juăt, rim pơgê, pơmai Kơ Să K’Hà (bơngai K’Ho) tơ̆ thôn 4, xah Đam Rông 4, dêh char Lâm Đồng iung đơ̆ng hrôih vă ăn hơdrông rong vă pơm brai xa. Dôm kơsêng 'măn hla pơmur pĕ đơ̆ng kơsơ̆ 'năr hơdrol vă 'me ăn kơ hlung hơdrông rong pơm brai xa. Pơmai K’Hà tơroi, hơdrol ki, mă tơm noh unh hnam pơmai pơtăm kaphê păng 'long pơtăm ou to, mă lei ưh đei yua sơđơ̆ng. Pơm kiơ̆ tơchơ̆t tơplih hơdrĕch 'long pơtăm kơ tơring, atŭm hăm tơdrong tơroi tơbăt, krao hơvơn đơ̆ng kan ƀô̆ Jơnŭm jang Drăkăn xah, sơnăm 2022 unh hnam pơmai khĭn tơplih minh pah teh pơtăm kaphê vă pơtăm 'long pơmur hajo, rong hơdrông pơm brai: “Inh tơroi hăm klo inh noh athei pơtăm tơm pơmur hajo 'mơ̆i hơdrol, đơ̆ng rŏng kơ noh năm hŏk lăm pơtho rong hơdrông pơm brai vă băt hơdah chă rong hơdrông pơm brai thoi yơ, hli hơdrông chă ƀơm pơrang noh băt hơdah păng ƀônh chă hơmet. Đơ̆ng rŏng kơ đei pơgar tơm pơmur hajo bơih, klo hơkăn inh kơchăng răt 2 gram minh puơ̆t kon yŏng hơdrông. 'Măng pơlong noh, klo hơkăn inh rong păng đei yua truh 20 kilogam tơpu, đơ̆ng noh klo hơkăn inh hơtŏk iŏk yua păng đei tơdrong jang pơtăm tơm pơmur hajo rong hơdrông pơm brai”.

Hơdrông rong vă pơm brai đei yua lơ mă lei adoi hiong mơ̆n kơlih hơdrông ƀônh răm mưh yuh tŏ 'mi ưh sơđơ̆ng 'lơ̆ng. Hơdrông ƀơm pơrang noh lôch lơ, pơnhŭl tơmam xa yuơ pơgang vei lăng 'long pơtăm, tơdrong 'lơ̆ng gah kon yŏng 'nou nai hia. Hăm unh hnam pơmai Kơ Să K’Hà adoi le lăi thoi ăi mơ̆n; ah mă 4 'măng rong hơdrông pơm brai ưh đei yua, hơdrông lôch pơgoh, năm tuh hŭt lê̆. Đei năr pơmai ưh kơ 'meh jang dơ̆ng ôh.

 Mă lei hăm tơdrong pơkăp khŏm mă jang kiơ̆ tơchơ̆t tơplih hơdrĕch 'long pơtăm, unh hnam pơmai Kơ Să K’Hà pơtoi hơtŏk jang pơtăm 'long pơmur hajo vă rông hơdrông pơm brai. Hlung mă blŭng đei yua 7 triu hlj, đei hlung pơyua hloh 10 triu hlj. Sơnăm 2025, pơyua đơ̆ng pơtăm 'long hajo rong hơdrông pơm brai kơ unh hnam pơmai đei yua hloh 50 triu hlj đơ̆ng rŏng kơ jô̆ jên huach jang.

Trong pơm jang kơ pơmai Kơ Să K’Hà ưh hơdrô̆ pơyua kăp gĭt ăn unh hnam, mă oei akŏm jơhngơ̆m pơlan să lơ̆m tơpôl, tơgop hơtŏk đon lui ăn đe drăkăn vang jang lơ̆m khul hăm tơchơ̆t tơplih trong pơm jang kơ tơring. Pơmai Kơ Să K’Bích – Kơdră Jơnŭm jang Drăkăn thôn 4 – dang ei noh Kơdră Khul jang pơtăm 'long pơmur hajo rong hơdrông pơm brai xah Đam Rông 4 ăn tơbăt, dang ei đei jê̆ 30 'nu jang, lơ̆m noh 20 'nu jang hơnơ̆ng. Kiơ̆ đơ̆ng noh, rim bơngai jang ưh hơdrô̆ tơroi dih băl gah tơdrong hlôh vao lơ̆m pơtăm 'long pơmur hajo rong hơdrông pơm brai, mă oei hơtŏk tơdrong tơguăt tơguăl, tơgŭm dih băl lơ̆m tơdrong hơrih: “Trong tơlĕch jang ou đei pơtơm hăm tơchơ̆t tơguăt, tơroi gah tơdrong hlôh vao lơ̆m rong hơdrông pơm brai păng chă tơgŭm dih băl. Pơtih nhen ah ưh kơ mah hla hajo dah mă kơƀah kơsêng, kơđum noh pơmai oh asong chă mơng dih băl. Tơdrong chă hơdrĕch hơdrông rong pơm brai kơyuơ rim unh hnam kơdih chă răt, nhen răt đơ̆ng Kŏng ti Duy Phương dah mă dôm hơnih nai, Khul jang hơdoi ưh đei tơkan”

Lơ̆m tơdrong pơm jang, vă hơtŏk tơdrong tơguăt tơguăl đơ̆ng rim bơngai jang, Khul jang hơdoi pơtăm pơmur hajo rong hơdrông pơm brai xah Đam Rông 4 hlôi pơjing grŭp Zalo, Facebook vă tơroi tơbăt, pơma đam păng hŏk hơlen tơdrong hlôh vao lơ̆m pơm jang, tĕch tơlĕch tơmam drăm. Kiơ̆ trong tơlĕch jang ou, pơmai oh ưh hơdrô̆ đei yua atăm mă oei đei hơtŏk hlôh vao gah tơdrong tơplih hơdrĕch 'long pơtăm, kon tơrong, brư̆ brư̆ pơih să tơdrong hlôh vao păng tơplih đon tơchĕng lơ̆m pơm jang. Pơmai Kơ Să K’Bích ăn tơbăt dơ̆ng: “Lơ̆m chă tơroi tơbăt tơplih hơdrĕch 'long pơtăm, Jơnŭm jang Drăkăn adoi tơguăt chă tơroi tơbăt sut lê̆ khôi kơtul chơdư. Mă lei, tơdrong mă ou kăl đunh khei năr. Hơpơi lơ̆m khei năr truh, tơdrong hlôh vao kơ đe pơmai oh gô đei hơtŏk, dôm khôi juăt ưh kơ 'lơ̆ng lơ̆m pơm jang păng trong hơrih xa pơgăn tơdrong hơtŏk tơ-iung brư̆ brư̆ đei sut lê̆. Ah mă tơdrong tơchĕng tơplih noh tơdrong hơrih gô hơtŏk tơnăp hloh, da ƀiơ̆ kơ hrat hloh”

          “Tang măt ăn Khul jang hơdoi, kơdih inh athei hơdrin yuk trong hơlou lơ̆m pơtăm 'long pơmur hajo, rong hơdrông pơm brai vă chơng 'nhăk pơmai oh tơguăt tơguăl, pơih să păng hơtŏk trong pơm jang. Inh hơpơi 'meh roi năr roi đei lơ pơmai oh vang jang vă đei iŏk yua, hơtŏk tơdrong hơrih unh hnam”.