Tơ̆ 1 anih pơm tơmam đơ̆ng choh jang xa đei tơ̆ phường Buôn Ma Thuột, lơ lom sầu riêng ƀriu ‘lơ̆ng đei sơ̆k hơmet tôch ‘lơ̆ng, pơm ăn tơmam oei ƀou phu, ‘lơ̆ng nhen plei ‘nao phĕ đĕch. Đơ̆ng kơloăi plei ‘long phĕ xa kiơ̆ pơyan, sầu riêng dang ei jing tơmam pơm hơmet tôch ‘lơ̆ng, đei tăh tơ̆ rim kơhôp tơmam kăp gĭt. 

Yă Nguyễn Thị Hường, Kơdră vei lăng Công Ty pơm tơmam đơ̆ng choh jang xa N&H tơ̆ Buôn Ma Thuột ăn tơbăt: “Sầu riêng sơ̆k hơdrĕng lăp hăm dôm tơdrong hơgăt tơmam ‘lơ̆ng, ƀou phu; tơdrong hơgăt 5 ưh: ưh đei sĭk, ưh đei pơgang ‘măn răk, ưh đei tơmam ƀou phu kơnê̆, ưh đei sơ̆k hơdrĕng krĕnh păng ưh đei yoa đak yâu. Bơngai răt tơmam tơ̆ Đắk Lắk hơpơi ‘mĕh hơnhăk dôm tơmam ‘lơ̆ng đơ̆ng Đắk Lắk ăn dôm bơngai tơ̆ tơring nai, dêh char nai, mă loi hăm tơmam ‘lơ̆ng đei hơdrô̆ đơ̆ng Đắk Lắk ‘nŏh jĭ sầu riêng hơdrĕng păng đe sư hlôi gơih dôm tơmam ‘nŏh ƀât Tết sơnăm ‘nâu.”

Hơdai hăm plei ‘long sơ̆k hơdrĕng, găr mắc ca – đei ư jĭ “găr ‘lơ̆ng hlŏh kơ rim kơloăi găr” – kŭm tơgop roi lơ lơ̆m kơhôp tơmam ƀĕng ƀât Têt. Đơ̆ng hơdrĕng lăp ai vă vei lăng ‘lơ̆ng kơchơ̆t pơngơi, truh hơdrĕng krĕnh tôch ƀou phu, mắc ca Đắk Lắk dar deh jing tơmam yoa tôch juăt hăm lơ unh hnam lơ̆m dôm năr Têt. Yă Phạm Trần Tú Anh, tang măt ăn anih pơm tơlĕch mắc ca hơdrĕng tơ̆ xăh Krông Năng, dêh char Đắk Lắk tơroi: “Nhôn tôch kơ hơiă mưh tơmam đơ̆ng kơdih jang, đei ming ƀât rim kơƀang  nhă đak hla che lơ̆m năr têt tơ̆ lơ unh hnam. Mắc ca ưh lăp tơmam xa ƀou phu ‘lơ̆ng đĕch mă oei đei yoa ‘lơ̆ng ăn jơhngâm pran hai, jĭ tơmam tôch ‘lơ̆ng đơ̆ng choh jang xa tơ̆ pơlei pơla.”

Ƀât Têt âu ki, kơjă dôm tơmam OCOP đơ̆ng Đắk Lắk roi ƀôh hơdăh. Ưh lăp pơm tơmam hơpăh băl đĕch, dôm tơmam đơ̆ng tơring oei chĕp ba hloi tơdrong ƀou phu ‘lơ̆ng đơ̆ng pơlei pơla, pơjing đei tơdrong hơiă, hưch hanh mưh ngôi hơdai ƀât blŭng sơnăm. Tơ̆ kơƀang nhă đak hla che năr blŭng sơnăm ‘nao, hơdai hăm mứt rơya, mứt gao, tơdrong đei dơ̆ng plei mắc ca, sầu riêng hơdrĕng, cheh phe hơdrĕng dăh mă đak tra pơgang nhen tơmât hơdai roi ‘lơ̆ng tơmam so hăm tơmam hle, đơ̆ng chă adrol sơ̆ hăm chăl ‘nao hrei ‘nâu. 

Mŏ Nguyễn Minh Anh, 1 ‘nu bơngai oei tơ̆ phường Buôn Ma Thuột, dêh char Đắk Lắk pơma: “Rim ‘măng truh Têt, unh hnam hơnơ̆ng ming pơdă lơ tơmam ‘lơ̆ng đơ̆ng Đắk Lắk lơ̆m kơhôp ƀĕng, mứt. Tơmoi truh ngôi tơ̆ hnam tôch ‘mĕh xa sầu riêng hơdrĕng dăh mă găr mắc ca. “lơ̆ng hai, ưh biơh xa hai, tơƀôh hơdăh tơdrong lăp đon hăm dôm tơmam đơ̆ng choh jang xa đei tơ̆ tơring.”

Tơdrong đei măt đơ̆ng dôm tơmam OCOP- tơmam ‘lơ̆ng đơ̆ng pơlei pơla lơ̆m dôm năr Têt, ưh lăp jing tơdrong tơroi găh tĕch mơdro xa đĕch, mă oei jing 1 hơyak gĭt kăl vă pơm hơtŏk kơjă tơmam dơ̆ng. Ƀât tŏk bŏk pơyan Puih mak tơ̆ bri kông, ƀou phu đơ̆ng cheh phe, mắc ca, sầu riêng hơdrĕng mât hơdai lơ̆m kial, pơjing đei hơyuh ƀou phu lăp đei hơdrô̆ tơ̆ Đắk Lắk đĕch. Dôm tơmam OCOP oei pơtruh đon hưch hanh găh tơdrong juăt ‘lơ̆ng păng đon adrin tơplih ‘nao đơ̆ng kon pơlei tơ̆ tơring. “Ƀou phu ƀât Pơyan Puih mak” đơ̆ng tơmam choh jang đei tơ̆ Đắk Lắk oei păr truh tơ̆ rim hnam, hăm ƀĕnh tơdrong tơroi tôch hơiă ƀât blŭng sơnăm ‘nao.