Ưh đei tĕch vĕ mât, lăp đei hơdrô̆ tơmo păng tơtă tơmo ngăl đĕch, rim bơngai mưh truh tơ̆ anih tơmo khiĕr gành Đá Đĩa gô năm klĕch plei tơmo đei hơnăn Phú Hạnh. Tơjê̆ âu pơlei jing đei ư hơnhang lơ̆m mang păng sơng đei lơ tơmoi đơ̆ng jơ̆p tơring hơtăih, jê̆ truh hăm pơlei chă hơlen năng rim anih đei pơm hăm tơmo. Tơring âu ưh lăp đei cham char bri brăh ‘lơ̆ng rŏ đĕch, mă oei chĕp vei lơ tơmam đơ̆ng chăl kră sơ̆. Tơdrong gĭt kăl hlŏh jĭ pơlei âu oei vei lăng ‘lơ̆ng lơ đak kuay tơmo đơ̆ng kră sơ̆, đak ƀĕnh păng hlăng rơngơp.

Bơngai chă tơchĕng hơlen tơdrong arih, joh ayŏ kơ dŏ xoang kră sơ̆ Nguyễn Danh Hạnh mưh truh hơlen năng lơ anih pơm hăm tơmo tơ̆ plei Phú Hạnh đei nơ̆r pơma găh dôm tŏ đak kuay tơmo đơ̆ng kră sơ̆ thoi âu: "Kiơ̆ đơ̆ng chă hơlen năng nhôn ƀôh dôm tŏ đak kuay âu đei dang 200 sơnăm adrol sơ̆. Inh tơchĕng tơdrong ‘nŏh athei đei trong vei lăng vă chĕp vei, vă ning mônh kơnh ưh lăp pơyoa ăn kơ bơ̆n chă hơlen năng dơ̆ng 1 chăl arih đơ̆ng yă ƀok sơ̆ đĕch mă oei vă iŏk yoa, pơvih ăn tơdrong chă tơmang lăng dơ̆ng"

Hơdai hăm đak kuay tơmo, plei Phú Hạnh oei sơng tơmoi truh hăm lơ trong tơmo so ‘moi kiơ̆ yơp ‘long tih kơhrĕng sơnăm pơjing đei dur var tôch ‘lơ̆ng ưh đei tơring yơ đei. Kŭm hăm ‘nŏh jĭ lơ dur var pơm hăm tơmo, pơm bơ̆n anih pơtăm pơrŏ pơkao... dôm kơloăi ‘long lăp hăm tŏ ‘mi kial kơnê̆ tơ̆ âu. Vih tơ̆ Phú Hạnh, lơ bơngai ƀôh chrih hlĭch mưh lăng ƀôh lơ hnam đei pơm hăm tơmo, ming pơrĕng, gơn hơdrom hơmet tôch hơiă, đei hloi bơ̆n hơdrong kon tơrong pơm hăm tơmo păng pơsat tơmo hai. Đĭ đăng mât hơdai jing 1 pơlei tơmo tôch hơiă.

Tơ̆ plei Phú Hạnh đei 1 pôm trong tơmo so pơm klĕch lơ tơm ‘long tih tŏk tơ̆ groi đei krao ‘nŏh groi Cổ Thạch. Đơ̆ng groi âu năng tơ̆ đak dơsĭ gơ̆h lăng ƀôh đĭ kông Hòn Yến, ving Xuân Đài păng jih đak dơsĭ groi Cổ Thạch. Tơmoi truh tơ̆ âu gô đei lăng lơ tơdrong tôch hơiă, pơm ăn kơdih kâu ưh đei lai yơ hiơt. Kŭm nhen lơ tơmnoi chă tơmang lăng ‘măng mă blŭng truh tơ̆ plei tơmo Phú Hạnh păng tŏk tơ̆ groi Cổ Thạch, ‘nhŏng Nguyễn Chí Tường, tơmoi chă tơmang lăng truh đơ̆ng dêh char Đồng Nai, tôch hơiă pơma: "Groi Cổ Thạch ‘lơ̆ng dêh, nhen anih chăl so kơ Châu Âu, inh ƀôh tôch hơiă hăm dur tơmo đei kon pơlei hơdrom jing lơ tăl, lăng hơiă tơpă, inh tôch lăp đon mưh truh tơ̆ âu."

Yak hlŏh kơbăt dôm yơ khei ‘năr, tŏ ‘mi kial, lơ anih pơm hăm tơmo tơ̆ plei Phú Hạnh oei đei hơnơ̆ng tơ̆ yăn âu, pơjing đei tơdrong ‘lơ̆ng hơdrô̆ ăn pơlei. Ƀok Nguyễn Lâu, tơ̆ plei Phú Hạnh, xăh Tuy An Đông, dêh char Đắk Lắk tôch hơiă hăm dôm anih tơmo kăp gĭt oei đei chĕp vei tơ̆ pơlei kơdih păng dang ei ƀok oei pơvih ăn tơmoi chă tơmang lăng truh tơ̆ âu: "Tơmoi truh tơ̆ âu đa krao inh chông tŏk tơ̆ groi Cổ Thạch, đe sư apinh inh tơmo âu thoi yơ, ‘nŏh inh tơroi ‘nâu jĭ tơmo so đơ̆ng kră sơ̆, sơ̆ đe ming hơdrom sư, ưh đei xi măng ră mă lei oei tôch kơjăp. Đơ̆ng noh truh dang ei oei hơnơ̆ng thoi noh."

Lơ bơngai lơ̆m pơlei Phú Hạnh dang ei oei vei lăng lơ anih pơm hăm tơmo tơklep kơjăp hăm tơdrong arih xa kơ kon pơlei. ‘Nâu ưh lăp 1 anih ‘măn răk đei pơm hăm tơmo, hăm lơ anih đei đunh hlŏh kơhrĕng sơnăm đĕch mă oei jing um rup cham char bri brăh tôch ‘lơ̆ng hơiă tơgŭm ăn tơmoi chă tơmang lăng năng ƀôh dơ̆ng chăl so, hăm lơ tơdrong ‘lơ̆ng hơiă thoi kră sơ̆ đơ̆ng 1 tơring teh đei lơ tơmam, lơ anih so kăp gĭt./.