Năr hơtuch giĕng, tơ̆ xăh Ea Kly, dêh char Đắk Lắk, chơt hơiă oei hơmet ăn tơdrong pôk rơih. Đơ̆ng pơgê hrôih truh kơmăng, kăn ƀô̆ pơlei pơla klăih song pơm lơ grŭp jur truh tơ̆ rim pơlei, tơring mih ma duch nă oei xa, “năm jơ̆p trong, drong jơ̆p hnam” vă ƀơk kơphĭu ăn bơngai tăh hla păng roi tơbăt, krao hơvơn kon pơlei vang năm pôk rơih bơngai tang măt Quốc hội jăl XVI păng Jơnŭm pơgơ̆r kon pơlei jơ̆p tơring đơ̆ng 2026-2031.

Tơ̆ plei Chợ, xăh pơjing 7 grŭp jang jur truh tơ̆ rim hnam ƀơk kơphĭu ăn bơngai tăh hla. ‘Nhŏng Nông Ngọc Thắng, jang lơ̆m Grŭp vei sơđơ̆ng plei Chợ, tơroi, pơlei đei vă jê̆ 1.400 ‘nu bơngai tăh hla. Truh dang ei tơdrong ƀơk kơphĭu hlôi đei pơjao truh hăm tơpang ti kon pơlei bơih: “’Nâu jĭ inh chă ƀơk kơphĭu ăn kon pơlei, oei năm tơ̆ (anih pôk rơih) ‘nŏh gô đei lơ grŭp pơtho tơƀôh ăn kon pơlei trong tăh hla, chrek hŭt hơnăn bu, lê̆ hơnăn mă trŏ. Truh tơ̆ hnam yơ mih ma duch nă truh sơng tôch hơiă, yoa ‘nâu jĭ tơdrong đei yoa kơ đe sư lĕ.”

Tơdrong ƀơk kơphĭu bơngai tăh hla ăn rim unh hnam đei pơgơ̆r hrơ̆ch ‘lơ̆ng tơ̆ đĭ đăng xăh, phường lơ̆m dêh char Đắk Lắk. Ưh lăp chă ƀơk kơphĭu truh ăn bơngai tăh hla đĕch, mă kăn ƀô̆ tơ̆ tơring oei jang hơdoi vang roi tơbăt, tơl tơblang, pơtho tơƀôh ăn kon pơlei chă hơlen năng rim tơdrong găh dôm bơngai lĕch pơjei, băt hơdăh hơnăp jang đơ̆ng kơdih adrol kơnăr pôk rơih. Kiơ̆ đơ̆ng noh, tơgŭm ăn rim tơdrong tơroi găh pôk rơih gơ̆h păr truh tơ̆ jơ̆p tơring, vang tơgop pơm hơtŏk đon hlôh vao, đon tơnăp đơ̆ng bơngai tăh hla hăm Năr chơt tih kơ teh đak.

Ƀok Nguyễn Doãn Kiều, tơ̆ Kueng kơphô̆ 6A, phường Thành Nhất, dêh char Đắk Lắk pơma: “Inh hlôi đei roi tơbăt tơ̆ Kueng kơphô̆, đang kơ ‘nŏh lơ̆m dôm kơmăy roi tơbăt, đei hloi Anih Mặt trận Tổ quốc jur tơroi truh tơ̆ anih oei hloi, kơna inh tôch hơiă. Inh hlôi hơmet tôm tơdrong vă bơ̆ jang hơnăp jang kơdih, hơdai hăm ‘nŏh vă krao hơvơn rim bơngai năm pôk rơih ‘măng mă âu hai.”

Tơ̆ Đắk Lắk, hơdai hăm tơdrong truh roi tơbăt, lơ tơring oei pơih kêng roi tơbăt vă bơngai tăh hla mơ̆ng, hơlen ƀônh hiôk. ‘Ngoăih kơ hôp pơlei, aloa roi tơbăt, pano, dôm tơring oei iŏk yoa kơmăy sô̆, mang tơpôl, tơroi trư̆k tuyê̆n găh tơdrong arih, bơ̆ jang păng tơdrong vă jang đơ̆ng rim bơngai lĕch pơjei. Trong jang ‘nâu tơgŭm ăn bơngai tăh hla ƀônh băt hơdăh rim bơngai lĕch pơjei vă rơih đei bơngai tang măt tơgăl hlŏh.

Ƀok Đặng Gia Duẩn, Bí thư Đảng, Kơdră Jơnŭm pơgơ̆r kon pơlei phường Ea Kao, dêh char Đắk Lắk ăn tơbăt: “Nhôn pơgơ̆r lơ trong jang, roi tơbăt pha ra băl, đơ̆ng roi tơbăt kiơ̆ kơmăy kơmŏk thoi so truh roi tơbăt hăm kơmăy sô̆ kiơ̆ chăl ‘nao. Nhôn năm hơdrol lơ̆m tơdrong iŏk yoa kơmăy sô̆ mưh roi tơbăt găh tơdrong arih, bơ̆ jang đơ̆ng dôm bơngai tang măt.”

Hơdai hăm tơdrong roi tơbăt tơ̆ tơring, dôm trong roi tơbăt tơ̆ yăn âu kŭm đei pơgơ̆r hrơ̆ch ‘lơ̆ng lơ̆m dêh char. Lơ jăl trong, tơring kon pơlei oei xa tơ̆ Đắk Lắk ƀrông ƀrang pano, ƀăng rôn tơiung jơhngâm hưch hanh ăn tơdrong pôk rơih, vă rim bơngai vang hue lăng truh năr chơt kơ đĭ đăng kon pơlei.

Kiơ̆ ƀok Trần Hồng Tiến, Kơdră Anih vei lăng jŏh ayŏ kơ dŏ xoang, tơplŏng kơdâu păng chă tơmang lăng dêh char Đắk Lắk, dôm tơdrong roi tơbăt đei pơgơ̆r hrơ̆ch ‘lơ̆ng đơ̆ng dêh char truh tơ̆ tơring, vang tơgop hơnhăk lơ nơ̆r roi tơbăt găh pôk rơih truh jê̆ ƀiơ̆ hăm kon pơlei: “Nhôn chih pơjing lơ tơdrong tơroi tơbăt nhen pơm bơ̆n video clip, đang kơ ‘nŏh roi tơbăt kiơ̆ anih rapor tơ̆ tơring, jang hơdoi hăm dôm kênh lơ̆m mang tơpôl vă hơtŏk tơdrong roi tơbăt adrol, lơ̆m păng đơ̆ng rŏng kơ ‘măng pôk rơih.”

Hlŏh 2,4 triu ‘nu bơngai tăh hla tơ̆ dêh char Đắk Lắk chơt hơiă oei răp truh năr pôk rơih. Tơdrong bơ̆ jang hrơ̆ch ‘lơ̆ng đơ̆ng rim anih jang chinh trĭ kŭm hăm lơ trong roi tơbăt tôch rơgei vang tơgop hơnhăk nơ̆r tơroi găh pok rơih truh jê̆ hăm bơngai tăh hla, pơjing đei đon lui păng đon kơchăng vang truh hăm Năr chơt tih kơ đĭ đăng kon pơlei./.