Lơ̆m teh xă 5ha kơ tơdrong jang man Hnam trưng teh đak rong jăl mônh păng jăl ƀar Ia Púch, dêh char Gia Lai, đe linh kŭm hăm khul ki sư, công nhân đei klăih song pơm lơ khul grŭp, vang tơgŭm ăn tơdrong ming man lơ anih nhen man hnam hŏk, man anih đŏk hla ar, hnam pơtâp pơhrăm, anih tep kơ đe hŏk tro...

Dôm tơpang ti adrol ki pôm juăt chĕp phao dăr joang, vei lăng tơdrong pơm tơm tơ̆ tơring sơlam, dang ei vang pơdŭ tơƀlô, lŭk chuơh, tô tơnăr, pơgĕnh jang pơkĕh hnam trưng ‘nao ăn đe kon hơ ‘lơ̆p tơ̆ tơring sơlam. Sut đak hŭl hal tơ̆ muh măt, Trung úy Cao Kiến Giang, linh đơ̆ng Kơđông linh vei lăng ‘Măng jang sơlam Lệ Thanh tơroi: "Vang bơ̆ jang, ƀât lăp inh oei tam mă gan băt mă lei đei nơ̆r pơtho tơƀôh đơ̆ng đe ma, đe duch tơ̆ âu, inh hơmet đei dôm tơdrong pơmat tat păng jang đang ‘lơ̆ng tơdrong jang đei pơjao. Rim năr brŏk đơ̆ng jang tôch lap, inh kŭm iŏk đei đon pơngơ̆t, tơgŭm đơ̆ng ƀok yŏng găh tơdrong sŏng xa, pơdơ̆h ngôi kơna inh kŭm hăm bôl boăl oei hơnơ̆ng năm bơ̆ jang hiôk chơt rim năr”.

Trung tá Phạm Tiến Sỹ, Phŏ ƀok yŏng Kơđông linh vei lăng tơring sơlam Ia Pnôn- yŏng khul linh vei lăng tơring sơlam vang năm jang tơgŭm tơroi: khul linh năm bơ̆jang tơgŭm chă dăr hơlen năng, pơjao tơdrong jang mă lăp hăm tơdrong gơ̆h jang, hăm jơhngâm pran rim bơngai; atŭm hăm ‘nŏh vang jang hơdoi kơjăp hăm anih ming man vă gơ̆h bơ̆ jang đei yoa hlŏh. Tơdrong jang tơgŭm kŭm đei bơ̆ jang tôm ‘lơ̆ng, đơ̆ng anih sŏng xa, tep pơdơ̆h truh tơdrong bơ̆ jang, tơgŭm ăn kăn ƀô̆, linh hơđơ̆ng jơhngâm vang man hnam trưng.

"Nhôn vang jang hơdoi hăm anih ming man, ăn khul bơngai jang mă lăp, khoa hŏk, pơm ‘lơ̆ng, dôm khul jang gơ̆h tơgŭm băl bơ̆ jang ‘lơ̆ng tơdrong jang đei pơjao. ‘Nâu jĭ tơdrong jang chinh trĭ tôch gĭt kăl, jĭ jơhngâm đon đơ̆ng đe kăn ƀô̆, linh ƀô đô̆i vei lăng tơring sơlam ‘măn ăn kon pơlei tơ̆ tơring sơlam. Nhôn hơnơ̆ng pơtho ăn kăn ƀô̆, linh găh tơdrong chinh trĭ, tơpôl păng tơdrong ‘lơ̆ng đơ̆ng hnam trưng. Đơ̆ng noh pơm ăn đe ‘nhŏng oh adrin jang, khŏm hơmet ming dôm tơdrong pơmat tat, jang đang ‘lơ̆ng rim tơdrong đei pơjao."

Vă tơgŭm ăn dôm tơring păng anih ming man man đang hnam trưng trŏ năr hơgăt, đơ̆ng tŏk bŏk khei 5/2026 truh dang ei, kŭm hăm khul linh Ƀô đô̆i vei lăng tơring sơlam, Anih chĕp kơ̆l pơgơ̆r khul linh dêh char Gia Lai, Quân đoàn 34 păng Công an dêh char Gia Lai krao akŏm hlŏh 500 ‘nu kăn ƀô̆, linh vang năm jang tơgŭm tơ̆ 7 tŏ hnam trưng. Ưh lăp vang ming man đĕch, dôm khul linh oei pơtho tơƀôh ăn kăn ƀô̆, linh băt hơdăh tơdrong gĭt kăl đơ̆ng hnam trưng, pơm kiơ̆ ‘lơ̆ng ki luơ̆t, năng kăl tơdrong juăt kơ kon pơlei tơ̆ tơring. Kiơ̆ đơ̆ng noh pơm hơtŏk tơdrong pơvei, mât 1 ƀơ̆r đon đơ̆ng linh hăm kon pơlei, vei kơjăp tơdrong sơđơ̆ng chinh trĭ păng tơdrong sơđơ̆ng lơ̆m tơpôl tơ̆ tơring sơlam. 

Hạ sĩ Hà Minh Hùng, linh tơ̆ Kơđông linh vei lăng tơring sơlam Ia Chía, ăn tơbăt: "Lơ̆m khei ‘năr bơ̆ jang, inh hơnơ̆ng adrin vei lăng ‘lơ̆ng găh bơngai păng tơmam. Hăm kơdih kâu păng bôl boăl, nhôn iŏk đei nơ̆r pơtho tơƀôh đơ̆ng đe ƀok yŏng găh tơdrong gĭt kăl đơ̆ng hnam trưng hăm kon hơ ‘lơ̆p tơ̆ tơring, đơ̆ng noh tơgŭm ăn ‘nhŏng oh đei jơhngâm đon bơ̆ jang ‘lơ̆ng ƀiơ̆, hơmet ming dôm tơdrong pơmat tat vă gơ̆h jang kĕh đang tơdrong jang”.

Tơdrong jang man 7 tŏ hnam trưng teh đak rong jăl mônh păng jăl ƀar tơ̆ dôm xăh sơlam kơ dêh char Gia Lai đei jên jang hlŏh 1.500 ti. Truh dang ei, đĭ đăng tơdrong jang hlôi man đang dang 47% tơdrong jang bơih. Mă đơ̆ng lơ anih iŏk jang hlôi pơtruh lơ kơmăy kơmŏk, tơmam păng khul bơngai, mă lei tơdrong jang ming man oei ƀiơ̆ đơ̆ng 15 truh 40 năr pơting hăm năr hơgăt.

Tơdrong vang tơgŭm đơ̆ng khul linh hlôi tơgop kŭm hăm anih ming man vang bơ̆ jang, adrin jang đang trŏ năr hơgăt đơ̆ng dêh char. Ƀok Nguyễn Trung Quyến, dơ̆ng tang ăn anih ming man tơ̆ Hnam trưng teh đak rong jăl mônh păng jăl ƀar Ia Púch, ăn tơbăt: "Khei ‘năr vă man đang, tơmât yoa hnam trưng ưh pă đei đunh bơih. Ƀât măt dang ei ‘nŏh jĭ pơyan phang, kơna tơdrong hơtŏk hrĕnh ming man ‘nŏh jĭ tơdrong tôch gĭt kăl, ưh đei trong jang yơ pha. Hăm anih pơyoa ăn kon pơlei, ‘nŏh 1 trong jang tôch gĭt kăl jĭ hơtŏk bơngai jang. Tơdrong khul linh ăn khul jang năm tơgŭm 1 păh yơ ‘nŏh sư pơm tơjur ƀiơ̆ tơdrong pơmat tat găh bơngai jang đơ̆ng anih iŏk jang, vă hơtŏk hrĕnh tơdrong man hnam trưng."

Tơdrong vang jang đơ̆ng khul linh Ƀô đô̆i vei lăng tơring sơlam kŭm hăm dôm khul linh, công an dêh char Gia Lai ưh lăp tơgop hơmet pơ ‘lơ̆ng pơmat tat găh bơngai jang, hơtŏk hrĕnh tơdrong ming man đĕch mă tơƀôh hơdăh đon jang tơnăp, tơdrong vang yak hơdoi đơ̆ng khul linh hăm tơdrong pơtho pơhrăm tơ̆ tơring sơlam găh pơmât kơ dêh char Gia Lai dơ̆ng.