Tơ̆ plei Chăm Lâm Thuận, xăh Hàm Thuận Bắc, dêh char Lâm Đồng, ƀok Thông Long đei băt truh jĭ 1 ‘nu ngê̆ nhơ̆n hlôm kơ klel saranai tôch hiôk. Ưh lăp thoi noh đĕch ƀok pơtho tơƀôh ăn lơ kon hơ ‘lơ̆p lơ̆m pơlei, tơgŭm ăn bơngai Chăm chĕp vei đei jơva re đơ̆ng kơ klel âu, vang tơgop vei lăng ‘lơ̆ng rim tơdrong juăt đơ̆ng hơdrĕch hơdrung.

Yă Thông Thị Hạnh, Bơngai vei lăng Khul jang mặt trân plei Lâm Thuận, xăh Hàm Thuận Bắc, ăn tơbăt, ƀok Long ưh lăp tơnăp ‘lơ̆ng lơ̆m tơdrong jang xa, atŏk tơiung mŭk drăm, pơjing tơring tơrang ‘nao đĕch, mă oei jang tôch tơnăp lơ̆m tơdrong tơiung pơjing Đảng, pơjing anih jang chinh trĭ, vei kơjăp păng tưk tơiung dôm tơdrong juăt ‘lơ̆ng đơ̆ng sơ̆ kơ tơpôl bơngai Chăm.

“Adrol sơ̆, unh hnam ƀok Thông Long kŭm tôch mơmat, mă lei gơnơm đơ̆ng adrin jang xa dang ei mŭk drăm lơ̆m hnam kŭm đei ƀôh bơih. Ƀok Long oei hơnơ̆ng chĕp vei tơdrong juăt hlôm kơ klek saranai, păng chă pơtho ăn kon sâu hlôm kơ klel saranai vă pơvih ăn dôm tơdrong lêh lơ̆m pơlei. Hrei ‘nâu ƀok đei lơ hŏk tro kiơ̆ hŏk tơdrong hlôm kơ klel saranai”.

Dang ei mă đơ̆ng đĭ kră bơih mă lei ƀok Thông Long oei ‘măn jơhngâm đon vă tưk tơiung ăn tơpôl bơngai Chăm tơ̆ âu. Hơdai hăm vang tơgop jơhngâm kŭm hăm Khul pơgơ̆r plei Lâm Thuận, xăh Hàm Thuận Bắc, ƀok oei đei pôk pơm kră pơlei, bơngai vei lăng rim tơdrong et soi tơ̆ hnam soi Pô Chei tơ̆ âu, vang tơgop vei kơjăp dôm tơdrong juăt jŏh ayŏ kơ dŏ xoang đơ̆ng bơngai Chăm lơ̆m pơlei.

Ƀlep ƀât pơyan he, ƀok Thông Long pơgơ̆r pơtho hlôm kơ klel saranai ăn đe hơioh păh iung. Vă jơva kơ klel saranai păr djrang mât hơdai hăm hơgơ̆r ghi năng, paranưng athei bơngai hlôm tôch gơ̆h ‘mơ̆i, mă loi ‘nŏh jĭ tơdrong iŏk hơi mưh hlôm. Kơlih thoi noh mă ưh kơsĭ bu bu kŭm gơ̆h hlôm kơ klel ‘nâu.

Ƀok Thông Long tơroi, mă đơ̆ng bơngai hŏk ưh đei lơ mă lei ƀok ƀôh tôch hơiă păng pơtho tơƀôh tôch pơneh. Dang ei dôm bơngai đei ƀok pơtho hlôm kơ klel saranai hlôi tơplih ăn ƀok truh hlôm lơ̆m dôm tơdrong lêh, et soi kơ kon pơlei tơ̆ âu. 

“Inh kŭm kiơ̆ ƀok thây hŏk hlôm kơ klel saranai đunh bơih, gơnơm đei hlôh vao adrol kơna hŏk kŭm hrĕnh mơ̆n. Inh hlôm kơ klel saranai đơ̆ng noh truh dang ei, tơ̆ hơnô̆ hơnăp kơnh inh vă pơtho ăn đe ‘lơ ‘lơ̆p lơ̆m pơlei, pơtho ăn kon sâu lơ̆m unh hnam dơ̆ng. Inh ‘mĕh tơgop jơhngâm vei kơjăp tơdrong juăt ‘lơ̆ng đơ̆ng bơngai Chăm nhôn, vă sư huei hiơt hiong, kŭm hơpơi ‘mĕh kon sâu ning mônh chĕp vei, pơm kiơ̆ mă trŏ lơ̆m dôm tơdrong lêh, et soi đơ̆ng yă ƀok sơ̆, vă gơ̆h chĕp vei kơjăp tơdrong juăt đơ̆ng bơngai Chăm, pơm ăn sư roi đunh roi ‘lơ̆ng hơiă hlŏh dơ̆ng”.

Hăm bơngai Chăm, jơva kơ klel saranai jĭ nhak tôch sĭt, tơguăt kơjăp hăm tơdrong soi kơ yang pơ ‘nhang hơdrĕ. Jơva kơ klel âu ưh đei lai yơ hiong yoa hlôi đei bơngai kon sâu, đei đe hŏk tro đơ̆ng ƀok pơtho chep vei. Mưh jơva kơ klel saranai đei hlôm hơdai hăm hơgơ̆r ghi năng, paranưng ƀât tŏk bŏk pơlei Chăm ‘nŏh jĭ jơva re đơ̆ng chă kră sơ̆ kơ hơdrĕch hơdrung, tơtă ăn rim bơngai găh hơnăp jang athei vei kơjăp tơdrong juăt, jŏh ayŏ kơ dŏ xoang đơ̆ng rim chăl adrol sơ̆, vei kơjăp jơva kơ klel saranai păng hơpơi ‘mĕh đei 1 tơdrong arih xa sơđơ̆ng ‘lơ̆ng hơiă păng hiôk chơt./.