Xăh Vụ Bổn, dêh char Đắk Lắk đei 8 hnam hŏk đơ̆ng lăm mầm non truh jăl ƀar. Kiơ̆ trong vă hơmet ming, xăh lăp oei đei pă 3 hnam trưng, đei 2 hnam trưng jăl mônh, jăl ƀar păng 1 hnam trưng mầm non. Ƀok Nguyễn Huy Hoàng, Kơdră vei lăng kon pơlei xăh Vụ Bổn ăn tơbăt, trong jang đei pơjing ‘moi kiơ̆ đơ̆ng chă hơlen năng tơ̆ rim hnam trưng, iŏk nơ̆r tơgop đơ̆ng Anih chĕp kơ̆l Đảng, kơdră vei lăng dôm hnam trưng păng tơchĕng hơlen rim tơdrong đei tơ̆ yăn âu lơ̆m tơring:

“Mưh pơjing trong jang, nhôn chă iŏk nơ̆r tơgop đơ̆ng Anih chĕp kơ̆l Đảng, khul kơdră vei lăng dôm hnam trưng, ‘moi kiơ̆ đon tơchĕng iŏk bơngai hŏk pơm tơm. Hăm 1 tơring hơtăih yăih, tơring pơmat tat nhôn oei pơkăp jang kiơ̆ ‘lơ̆ng trong jang đơ̆ng Đảng, Teh đak păng lăp hăm rim tơdrong tơ̆ yăn âu”.

Kŭm hăm hơmet pơ ‘lơ̆ng trong jang, dôm hnam trưng oei hơtŏk tơdrong roi tơbăt, chih iŏk dôm tơdrong ‘mĕh vă đơ̆ng kăn ƀô̆, thây kô păng mĕ ƀă hŏk tro. Dôm tơdrong ƀơm truh hnam trưng, lăm hŏk, khul thây kô păng tơdrong hŏk pơhrăm đei pơma nuh, tơl tơblang mă hơdăh vă gơ̆h drơ̆ng 1 ƀơ̆r đon adrol kơ tơlĕch jang. 

Yă Võ Thị Cẩm Hoa, Hiê̆u trơng Hnam trưng Mẫu giáo Hoa Ban Trắng, xăh Dliê Ya, dêh char Đắk Lắk ăn tơbăt: “Nhôn roi tơbăt truh tơ̆ rim kăn ƀô̆, thây kô, bơngai jang vă gơ̆h hơđơ̆ng jơhngâm, hơmet ming jơhngâm đon bơ̆ jang kiơ̆ trong jang tơmât hơdai hnam trưng đơ̆ng teh đak. Mă 2, roi tơbăt lơ̆m grŭp Zalo hăm mĕ ƀă hŏk tro vă đe sư gơ̆h sơđơ̆ng jơhngâm ‘năi; mă đơ̆ng tơmât hơdai hnam hŏk, kon hơ ‘lơ̆p bơ̆n kŭm oei đei anih jê̆ hlŏh, ‘lơ̆ng hlŏh vă hŏk pơhrăm”.

Oei tơ̆ Hnam trưng jăl mônh Nguyễn Trãi, xăh Vụ Bổn, dôm tơdrong tơtăm blŭng a găh tơdrong hơmet ming hnam hŏk kŭm đei pơma nuh, tơl tơblang tôch rơđăh. Kiơ̆ đơ̆ng chih iŏk nơ̆r pơma, đei lơ kăn ƀô̆, thây kô păng mĕ ƀă hŏk tro tơgŭm ăn trong jang. Ƀok Trần Hải Đường, Hiê̆u trơng hnam trưng tơroi: "’Nâu jĭ trong jang tôch trŏ vă tơjur ƀiơ̆ anih pơtho pơhrăm păng hơtŏk kơsô̆ thây kô pơtho. Yoa hrei ‘nâu, kơsô̆ thây kô pơtho đei tơring rơkăh, đei tơring ưh kơmăh. Găh jơhngâm đon, kiơ̆ đơ̆ng chă hơlen năng ‘nŏh khul kăn ƀô̆, thây kô păng mĕ ƀă hŏk tro vang tơgŭm ăn ngăl. Dar deh vă pơjing hnam trưng lăp hăm tơdrong hơgăt ‘lơ̆ng kơ teh đak, kŭm nhen pơm hơtŏk đon hlôh vao ăn kon pơlei roi đunh roi kơjung."

Lơ̆m dêh char Đắk Lắk dang ei đei 1.267 anih pơtho pơhrăm đơ̆ng teh đak. Đơ̆ng rŏng lơ ‘măng hơlen năng, trong jang ‘nao hlŏh vă tơjur dang 646 anih, hơtŏ hăm hlŏh 50% kơsô̆ hnam hŏk. Tơ̆ jơ bơ̆ jang hăm dôm Anih jang kơpal, ƀok Lương Nguyễn Minh Triết, Kơdră jang lơ̆m Trung ương Đảng, Bí thư Đảng dêh char Đắk Lắk athei, tơdrong hơmet ming ‘moi kiơ̆ trong jang đơ̆ng Trung ương, tơjur anih vei lăng hơdai hăm hơmet ming khul jang kiơ̆ trong tơjur ƀiên chê̆ bơngai vei lăng, hơtŏk ƀiên chê̆ ăn bơngai pơtho:

“Thây kô bơ̆ jang vei lăng gơ̆h jur pơtho dơ̆ng, mă ưh ‘nŏh jur tơ̆ xăh phường hơtŏk thim dơ̆ng kăn ƀô̆ vei lăng tơ̆ xăh, phường. Vei kơjăp kơsô̆ hŏk tro tơ̆ dôm hnam hŏk, hơmet ming mă ‘lơ̆ng, đei yoa khul thây kô pơtho vă hơtŏk tơdrong vei lăng, tơmât jên jang păng hơtŏk tơdrong ‘lơ̆ng mưh pơtho hŏk pơhrăm. Ưh gơ̆h lê̆ đei tơdrong ƀơm ưh ‘lơ̆ng truh hŏk pơhrăm đơ̆ng đe hŏk tro.”

Hơmet ming hnam trưng tơ̆ Đắk Lắk tŏk bŏk đei bơ̆ jang kiơ̆ trong tơjur anih pơtho pơhrăm, iŏk yoa ‘lơ̆ng tơmam drăm păng khul jang, mă lei oei vei lăng sơđơ̆ng tơdrong hŏk pơhrăm. Tơdrong kơchăng đơ̆ng Khul kơdră pơgơ̆r tơring, anih pơtho pơhrăm kŭm hăm dôm hnam trưng oei pơjing tơdrong drơ̆ng nơ̆r đơ̆ng kăn ƀô̆, thây kô păng mĕ ƀă hŏk tro, pơjing trong vă tơdrong pơgơ̆r hơmet ming hnam hŏk gơ̆h sơđơ̆ng ‘lơ̆ng, huei ƀơm kơnê̆ truh tơ̆ hŏk tro, mă loi tơ̆ tơring hơtăih yăih păng tơring sơlam.