Tơ̆ Anih pơm hla ar ăn tơpôl xăh Tây Sơn, lăp tam truh 10 pơnĭt, ‘nhŏng Nguyễn Minh Phi, tơ̆ Kueng Tây Xuân, hlôi pơm đang hla ar tĕch mơdro tơmam ăn unh hnam hăm kơmăy sô̆. Đơ̆ng tơdrong nôp hô sơ trư̆k tuyê̆n, chih hăm điên tư truh kla jên ưh đei kla hăm jên măt, rim tơdrong đei kăn ƀô̆ pơtho tôch hơlen tơ̆ “Anih tơgŭm tơplih hăm kơmăy sô̆”. ‘Nhŏng chơt hơiă pơma: “Inh ƀôh pơm hla ar tĕch mơdro ăn unh hnam tôch hrĕnh. Adrol ki ‘nŏh 3 năr mă lei dang ei pơm tôch hrĕnh, da ƀiơ̆ hiong lơ jơ. Kăn ƀô̆ tơgŭm tôch ‘lơ̆ng, bơ̆ jang tôch tơnăp.”

Tơdrong tơplih âu đei đơ̆ng pơgơ̆r jang hrơ̆ch ‘lơ̆ng hăm kơmăy sô̆ tơ̆ Anih pơm hla ar ăn tơpôl xăh Tây Sơn, tơgŭm ăn kon pơlei lăp pơm 1 vât lơ̆m kơmăy điên tư đĕch tơplih ăn athei lơ ‘măng năm vih vât nhen adrol ki.

Đơ̆ng blŭng sơnăm truh dang ei, Anih pơm hla ar ăn tơpôl xăh Tây Sơn iŏk pơm hlŏh 3.400 blăh hô sơ; đĭ đăng đei pơm đang trŏ năr mă ưh ‘nŏh hơdrol kơ năr pơkă, pơm trư̆k tuyê̆n păng chih tơmât tôm lơ̆m kơmăy. Truh hơtuch khei 7/2026, tơring jang đang păng hlŏh kơ nơ̆r hơgăt đei 9/10 tơdrong jang vă pơjing xăh jang pơlong năng hăm kơmăy sô̆, đĭ đăng kon pơlei lăp đon ngăl.

‘Nhŏng Trần Lam Sơn, Bí thư Đoàn xăh Tây Sơn ăn tơbăt, dang ei xăh oei pơgơ̆r jang hrơ̆ch ‘lơ̆ng ăn dôm grŭp jang kơmăy sô̆ tơ̆ đĭ đăng 10 pơlei: “Grŭp jang kơmăy sô̆ nhôn ăn bơngai jang năm tơgŭm ăn mih ma duch nă kai iŏk dôm ứng dụng kơmăy sô̆. Hăm 10 pơlei, tơdrong pơgơ̆r năm jang đei hơnơ̆ng rim năr, mă loi ‘nŏh kai iŏk ứng dụng iGiaLai tơgŭm ăn kon pơlei pơhrăm, jang kiơ̆ kơmăy kơmŏk.”

Ưh lăp dơ̆ng ƀât hơmet ming trong pơm hla ar đech, tơplih hăm kơmăy sô̆ tơ̆ Tây Sơn oei lang xă truh tơ̆ lơ tơdrong jang lơ̆m tơdrong arih xa. Khul kơdră pơgơ̆r hăm kơmăy sô̆; kơchơ tĕch tơmam oei dar deh tơplih jing tĕch hăm kơmăy sô̆; HTX păng dôm unh hnam tĕch mơdro iŏk yoa hla ar tĕch hăm điên tư; anih jang pơgang oei chih tơmât hô sơ jơhngâm pran lơ̆m điên tư; tơdrong hŏk pơhrăm kŭm chih hla ar hŏk ƀă hăm kơmăy sô̆ păng hnam trưng rơgei. Dôm tơdrong ‘nâu oei pơjing tơdrong jang hăm kơmăy sô̆ iŏk đơ̆ng xăh hloi.

Ƀok Đỗ Thành Quyết, Phŏ Kơdră Anih jŏh ayŏ kơ dŏ xoang – tơpôl xăh Tây Sơn, dêh char Gia Lai ăn tơbăt, lơ̆m 1 sơnăm âu ki, tơring pơgơ̆r 34 ‘măng hop akŏm ưh đei hla ar, tơlĕch trong pơjing kơchơ kơsô̆ hăm 155 ‘nu bơngai pơdro kla jên tơmam ưh đei yoa jên măt păng tơdrong pơih hơyuih 5G tŏk truh 99,3% kơsô̆ kon pơlei. Vă vei kơjăp păng pơm hơtŏk tơdrong đei yoa đơ̆ng xăh jang ‘lơ̆ng tơdrong tơplih hăm kơmăy sô̆, xăh hlôi tơlĕch jang tơ̆ 37 tơdrong jang tôch hơdăh kiơ̆ trong jang đơ̆ng dêh char Gia Lai tơlĕch:

“Xăh Tây Sơn năng kăl tơdrong Pơjing Anih pơm hla ar ăn tơpôl bơ̆ jang rơgei ‘lơ̆ng. Truh dang ei, anih jang hlôi jang đang dôm tơdrong jang đei tơlĕch. Tơ̆ hơnăp kơnh, xăh adrin jang hơdoi hăm dôm anih jang kơpal, khul pơgơ̆r jang vă gơ̆h jang đang ‘lơ̆ng kiơ̆ trong jang đơ̆ng dêh char.”

Dôm tơdrong jang đei blŭng a tơ̆ xăh Tây Sơn hlôi pơjing đei tơdrong ‘lơ̆ng, gĭt kăl vă dêh char Gia Lai pơjing trong tơlĕch jang “xăh tơplih hăm kơmăy sô̆” lĕch tơ̆ 30 xăh tơ̆ hơnăp kơnh. Ƀok Lâm Hải Giang, Phŏ Kơdră vei lăng kon pơlei dêh char Gia Lai, ăn tơbăt, tơdrong pơih xă ưh lăp ‘moi kiơ̆ trong jang đơ̆ng xăh Tây Sơn đĕch, mă vă năm truh tơdrong pơjing Anih tơplih hăm kơmăy sô̆ hrơ̆ch ‘lơ̆ng tơ̆ rim xăh, tơklep hăm tơdrong ‘mĕh vă tơ̆ yăn âu păng hơnhăk ba tơdrong đei yoa ăn kon pơlei. Đon pơhnŏng đunh đai ‘nŏh pơjing khul kơdră pơgơ̆r tơring hăm kơmăy sô̆, jang mŭk drăm hăm kơmăy sô̆ păng tơpôl iŏk yoa kơmăy sô̆ kơtă đơ̆ng tơring hloi, vă tơplih hăm kơmăy sô̆ gơ̆h jing jơhngâm pran atŏk tơiung mŭk drăm, tơpôl kơ dêh char lơ̆m chăl ‘nao:

“Dôm trong jang ‘nao găh hơmet ming trong pơm hla ar păng tơplih ‘nao rơgei pơjing đei lơ tơdrong ‘lơ̆ng, hiôk hian ăn kon pơlei, anih tĕch mơdro mưh pơm hla ar, vang tơgop pơm tơjur ƀiơ̆ jơnăr pơm hla ar. Lơ anih chih răk kơsô̆ hlôi đei hơmet đang, pơjing tơdrong ‘lơ̆ng vă khul kơdră tơring bơ̆ jang chĕp kơ̆l pơgơ̆r ‘moi kiơ̆ kơsô̆ đei chih răk, băt hơdăh rim tơdrong tơ̆ yăn âu vă tơlĕch dôm tơdrong tơchơ̆t pơvih roi ‘lơ̆ng ƀiơ̆ ăn tơdrong jang tŏk atŭm kơ dêh char.”

Đơ̆ng mĭnh trong jang pơlong năng, xăh Tây Sơn oei ăn ƀôh, tơplih hăm kơmăy sô̆ ưh lăp jing tơdrong tơroi găh kơmăy kơmŏk đĕch, mă sư oei pơm tơplih trong vei lăng păng pơvih ăn kon pơlei. Mưh dôm tơdrong đei yoa đơ̆ng kơmăy sô̆ đei ƀôh tơ̆ rim hla ar chih, rim tơdrong tĕch mơdro păng rim tơdrong pơvih pơvăn lơ̆m tơpôl, trong jang "xăh jang ‘lơ̆ng tơdrong tơplih hăm kơmăy sô̆" gô jing kơmŏng kơjăp vă Gia Lai pơjing khul kơdră pơgơ̆r tơring hăm kơmăy sô̆, jang mŭk drăm hăm kơmăy sô̆ păng tơpôl iŏk yoa kơmăy sô̆ kơtă đơ̆ng tơring, pơjing jơhngâm pran ‘nao ăn tơdrong jang tŏk hrĕnh păng pran kơjăp tơ̆ hơnăp ning mônh kơnh./.