Tơdrong jang pơjing ming tơring oei xa ‘nao ăn tơring đa đei ‘mi tih đak lip tơ̆ xăh Ia Hiao (dêh char Gia Lai) đei pơm tơ̆ plei Điểm 9, lơ̆m teh xă hlŏh 15 héc-ta, akŏm đĭ đăng jên tơmât jang hlŏh 120 ti. Tơdrong jang chĕng hơmet teh oei ăn hlŏh 180 unh hnam. Hrei ‘nâu, dôm anih jang ming man oei pơm hơmet trong, chô̆ unh điên, man dôm anih kăl nhen pơm anih pơtruh đak yoa, hnam hŏk hôp tơpôl, hnam trưng mâm non.

Ƀok Ksor Tin jĭ 1 lơ̆m dôm unh hnam mă blŭng tơ̆ plei Chư Plah Jai, xăh Ia Hiao, truh iŏk teh ‘nao vă pơm hnam tơroi: “Nhôn năm tơ̆ âu lăng teh, teh tơ̆ âu ‘lơ̆ng dêh. Tơ̆ âu jê̆ hnam hŏk, đei sân đă ƀŏng lŏng tôm tĕch. Teh tơ̆ âu kơpal groi kông kơjung, tôch ‘lơ̆ng, oei xa hiôk sơđơ̆ng ƀiơ̆ ăn kon hơ ‘lơ̆p păng mih ma duch nă; ưh pă đei hăt hot kơdâu veh kơ ‘mi tih đak lip nhen dôm sơnăm adrol sơ̆ bơih; tơ̆ âu tôch ‘lơ̆ng pơting hăm adrol ki. Đei teh đak tơgŭm, khul kơdră pơgơ̆r dêh char chưk hơmet teh tơ̆ plei hle ăn kon pơlei, inh ưh băt pơma kiơ bơih, bơnê tôch lơ”.

Vă kon pơlei chu lĕch đơ̆ng plei so hlôi oei xa đơ̆ng sơ̆ mă đơ̆ng hơnơ̆ng tơjră hăm ‘mi tih đak lip vă tŏk oei tơ̆ plei hle, khul kơdră tơring pơgơ̆r lơ ‘măng tơƀâp, mơ̆ng nơ̆r pơma, tơdrong hơpơi ‘mĕh păng tơl tơblang tôm tơdrong kon pơlei oei tơtăm. Mih ma duch nă oei đei lăng rup phĭn dôm tơring hơnơ̆ng đei đak lơ̆p, hơlen năng tơdrong jang pơjing tơring oei xa ‘nao, lăng năng dôm tơdrong tơgŭm hai. Rim unh hnam gơ̆h rơih kơdih hnam vă pơm, ƀŏk hla ar vă iŏk teh păng truh năng tơ̆ anih vă pơm hnam oei tơ̆ plei hle.

Unh hnam ‘nhŏng Nay Chúc tơ̆ plei Sô Ma Lơng, jĭ 1 lơ̆m 67 unh hnam mă blŭng truh oei tơ̆ plei hle, chơt hơiă mưh ƀŏk đei teh ƀât anih tôch ‘lơ̆ng “’lơ̆ng hlŏh kơdih ‘mĕh vă”: “Hnam nhôn adrol ki arih jê̆ đak krong hloi, tôch hơmơt teh hơlih. Inh pŭn ƀŏk đei teh kơsô̆ 63, jê̆ hnam trưng mâu yăo, ƀlep ƀât kon inh sơnăm ‘nâu mât hŏk lăm mâu yăo hloi”.

Adrol kơ pơgơ̆r tơgŭm ăn kon pơlei pôk rĭ hnam tŏk oei tơ̆ plei hle, xăh pơgơ̆r năm bơ̆jang "Man hnam ‘nao – Pơjing anih oei xa rơgŏh ‘lơ̆ng" tơ̆ tơring oei xa ‘nao. Tơ̆ âu, kơdră chĕp kơ̆l xăh, dôm khul grŭp tơpôl kŭm hăm kon pơlei pơtăm 250 tơnơm ‘long ƀang Đài Loan tơter trong pơlei. Lêh năm jang tơƀôh hơdăh đon pơhnŏng đơ̆ng rim anih jang chinh trĭ păng tơdrong tơgŭm đơ̆ng kon pơlei vă pơjing anih oei xa ‘nao sơđơ̆ng ‘lơ̆ng păng dơ̆ng kơjăp.

Ƀok R’Ô Thí – Phŏ Kơdră Anih jang mŭk drăm xăh Ia Hiao ăn tơbăt, tơdrong jang vă jang đang bơih, gơ̆h sơng iŏk đĭ đăng dang 180 unh hnam kon pơlei tŏk oei tơ̆ âu lơ̆m 1,2 khei truh: “Khei ‘năr âu ki, xăh Ia Hiao hlôi jang ‘lơ̆ng tơdrong roi tơbăt, krao hơvơn dôm unh hnam hơnơ̆ng đei ‘mi tih đak lơ̆p tơ̆ tơring thŭng tŏk oei tơ̆ âu, truh dang ei hlôi đei 100 unh hnam. Tơchĕng adrol lơ̆m khei 8, khei 9 hơnơ̆ng krao hơvơn đĭ đăng unh hnam oei đei dơ̆ng mât oei tơ̆ tơring oei xa ‘nao, vă gơ̆h vei lăng sơđơ̆ng ‘lơ̆ng tơdrong arih păng tơmam drăm ăn kon pơlei”.

Kŭm hăm tơdrong tơgŭm đơ̆ng teh đak, khei ‘năr âu ki, dôm khul linh oei tơ̆ dêh char kŭm chă hơlen năng, bơ̆ jang lơ trong tơgŭm ăn kon pơlei pôk rĭ hnam, pơdŭ tơmam tŏk oei tơ̆ plei hle tơ̆ Ia Hiao. Hlŏh 50 ‘nu kăn ƀô̆, linh găh Đại đội linh teh 1, Anih tang găn sar bar tơring 3 – Thống Nhất (Anih chĕp kơ̆l pơgơ̆r khul linh dêh char Gia Lai) hlôi truh tơ̆ Ia Hiao vă tơgŭm ăn kon pơlei yuih hnam, pơdŭ tơmam păng man dơ̆ng hnam plơ̆ng tơ̆ plei hle.

Mĭnh tơring oei xa ‘nao oei pơjing vă đang kơpal teh Điêm 9. Đơ̆ng dôm anih hơnơ̆ng đei đak lơ̆p tôch hơmơt, kon pơlei Ia Hiao chơt hơiă tŏk oei hơdai tơ̆ âu, đei trong, đei anih jang, hnam hŏk păng kăl hlŏh dơ̆ng 'nŏh jĭ đei tơdrong arih hiôk sơđơ̆ng, ‘lơ̆ng hơiă.