Dôm hơlŭng teh đei sir hơmŏ tơ̆ groi teh unh hnam ƀok A Đúy, tơ̆ thôn Ngọc Leng, dar deh đei klơ̆p ƀenh hăm dôm dơnơm kaphê kon. Bơngai pơtruh tơđah, bơngai pơtăm đang kơ noh ruih đak. Lơ̆m minh ƀar jơ, pơgar teh hơdrol ki pơtăm ƀum ƀlang đĕch dang ei hlôi gam ƀenh đak kơ-ang jơk ƀlik 'nao.

Vă jê̆ 9 sao teh kơ unh hnam lơ̆m lơ sơnăm pơtăm ƀum ƀlang, tơdrong pơyua ưh đei sơđơ̆ng. 'Meh tơplih pơtăm kaphê mă lei jên răt hơdrĕch păng hơpah đe jang lơ dêh hnang. Ƀok A Đuý akhan, 'măng mă ou, tơm tơđah đei asong ăn hoh, tơdrong pơtăm adoi đei kang ƀô̆ păng khul jang tơ̆ tơring tơgŭm ăn unh hnam noh đei jơhngơ̆m jang vă pơtơm ăn minh trong jang xa 'nao: “Tơdrong mă đei asong ăn hơdrĕch cheh phê (kaphê) tơgŭm unh hnam da ƀiơ̆ jên huach asong jang mă blŭng păng gơh chă pơih să teh pơm jang. Unh hnam inh hơpơi 'meh tơm kaphê gô tŏk giơ̆ng 'lơ̆ng, pơyua lơ sơđơ̆ng hloh”.

Ưh hơdrô̆ unh hnam ƀok A Đúy, dôm jĭt unh hnam lơ̆m khul 'lŏ sơnăm, bơngai hơven hơvo, unh hnam hơdrô̆ hơdrăn tơ̆ Tu Mơ Rông adoi đei tơgŭm lơ̆m 'măng pơtơm jang mă blŭng. Đơ̆ng rŏng hloh 1 triu tơm hơdrĕch noh minh trong jang kăp gĭt hloh.  

Pơtăl kơ yua jên răt pơkao pơtruh hơ-iă ăn dôm tơdrong akŏm tơpôl, xah pơtơm tơdrong jang "Hop akŏm ưh đei pơkao", hơvơn jơhngơ̆m jang lơ̆m tơpôl vă chă răt găr hơdrĕch, pơtơm chă ơng rei păng vei lăng tơm tơđah, đang kơ noh asong ăn kơ kon pơlei. Dôm hơchô̆ pơkao hơ-iă hlôi đei tơplih hăm dôm tơđah kaphê kon, 'nhăk ba tơdrong hơpơi sô̆ gah minh trong jang xa kơjăp sơđơ̆ng ăn kon pơlei tơring groi kông.

Lơ̆m khei 7 ou, xah Tu Mơ Rông hơdrin keh đang tơdrong asong ăn kon pơlei pơtăm hloh 1 triu tơm kaphê lơ̆m hơnih teh să pơhlom 200 héc ta. Tơchơ̆t ưh hơdrô̆ hơtŏk gah teh 'long pơtăm mă oei brư̆ brư̆ pơjing tơring pơtăm akŏm, pơjing tơdrong tơm vă hơtŏk pơtăm kaphê kiơ̆ pơkăp đei yua lơ hloh.

Ƀok Võ Trung Mạnh, Ƀĭ thư Đảng uy xah Tu Mơ Rông ăn tơbăt, hloh 1 triu tơm kaphê đei pơtăm lơ̆m pơyan 'mi ou noh pơtơm pơih blŭng đĕch. Jăl jang 2026-2030, tơring tơchơ̆t tơgŭm ăn kon pơlei pơtăm 'nao 1.000 hectar kaphê; Hơdrin truh sơnăm 2030, tôm teh pơtăm kaphê lơ̆m xah gô đei pơhlom 1.588 hectar, pơkăp hăm rim unh hnam đei tŏ sĕt jat noh 1 hectar kaphê vă hơtŏk mŭk drăm unh hnam. Vă jang đei jơnei tơchơ̆t tơlĕch ou, xah Tu Mơ Rông pơtoi tơdrong asong ăn hoh hơdrĕch kaphê, asong jên ming man pơnơ̆ đak, pơtho gah kih thuơ̆t pơm jang, tơguăt hăm hơnih jang mŭk drăm răt iŏk tơmam pơtăm đei păng hơvơn asong pơm tơlĕch tơmam drăm kăl gĭt. Ning nai kơnh 'noh pơjing tơring pơtăm kiơ̆ pơkăp VietGAP, brư̆ brư̆ pơjing hơnăn kaphê kăp gĭt Tu Mơ Rông.

Ƀok Võ Trung Mạnh ăn tơbăt dơ̆ng: Mưh đei vei lăng 'lơ̆ng păng đei hơnih tĕch tơlĕch sơđơ̆ng, hloh 1 triu tơm kaphê ưh hơdrô̆ pơjơk dôm groi teh phui phang mă oei pơih trong hiôk vă tơplih trong jang xa ăn kơ rơbou unh hnam kon pơlei Xơ Đăng, dar deh 'nhăk kaphê jing 'long pơtăm dơnơm tơ̆ tơring teh ou: “Đảng ủy xah Tu Mơ Rông hlôi chih akŏm Tơdrong jang pơjing cheh phe kăp gĭt Tu Mơ Rông. Kiơ̆ kơ noh, nhôn gô pơtho ăn kon pơlei chă pơtăm, vei lăng, pơm jang kiơ̆ trŏ tơchơ̆t VietGAP, pơjing kơsô̆ pơkăp tơring pơtăm, atŭm hăm 'noh pơm jang hăm dôm hơnih jang mŭk drăm, hơp tak xah vă pơm jang hơdoi hăm kon pơlei, pơjing tơmam drăm kăp gĭt kơ xah Tu Mơ Rông, vei sơđơ̆ng hơnăn cheh phe Tu Mơ Rông gơh tĕch tơlĕch lơ̆m tơring kơjăp sơđơ̆ng 'lơ̆ng”.