Tơ̆ plei Hwiê, phường Ea Kao, tơdrong chă iŏk nơ̆r tơgop găh trong tơmât hơdai pơlei đei tơlĕch truh tơ̆ rim unh hnam. Kiơ̆ kơsô̆ vei lăng, đơ̆ng rŏng kơ tơmât hơdai, plei Hwiê ‘nao đei 454 unh hnam hăm 1.914 ‘nu bơngai, xă hlŏh 496 ha. Tơdrong tơmât hơdai 2 pơlei iŏk đei tơdrong drơ̆ng nơ̆r tơgŭm đơ̆ng kon pơlei lơ̆m lơ sơnăm âu ki, đei lơ kon pơlei oei xa tơ̆ âu đunh ngăl bơih.

Mŏ H’Trang Buôn Yă, oei tơ̆ plei Hwiê so ăn tơbăt: “Rim ‘măng đei bơngai iŏk unh om dăh mă nê̆ năn kâu đe sư hơnơ̆ng năm hơpong ngôi băl tơ̆ âu, kơna oh ƀôh 2 pơlei pơvei băl tôch ‘lơ̆ng. Dang ei tơmât hơdai inh ƀôh tôch lăp ‘năi, ƀôh tơdrong tơmât hơdai âu roi hơiă, roi ‘lơ̆ng hlŏh dơ̆ng. Inh hơpơi ‘mĕh bơngai chĕp kơ̆l jê̆ kon pơlei, hlôh vao tơdrong juăt đơ̆ng kon pơlei vă plei nhôn roi đunh roi tŏk pơdrŏng ƀiơ̆.”

Tơdrong tơgŭm đơ̆ng kon pơlei tơ̆ plei Hwiê đei tơƀôh kiơ̆ đơ̆ng kơsô̆ chih truh 96% nơ̆r pơma đơ̆ng bơngai tăh hla drơ̆ng nơ̆r tơgŭm ăn tơdrong tơmât hơdai âu. Kăl hlŏh dơ̆ng, kon pơlei ưh lăp tơgŭm ăn tơdrong hơmet ming pơlei đĕch, mă oei hơmĕng plei ‘nao gô đei dơ̆ng tơdrong ‘lơ̆ng vă jang tŏk mŭk drăm, vei kơjăp dôm tơdrong juăt ‘lơ̆ng đơ̆ng sơ̆ păng pơm hơtŏk đei tơdrong arih xa roi hiôk jơnap. ‘Nŏh kŭm jing trong jang mă Khul chĕp kơ̆l đảng tơ̆ pơlei Hwiê chih hơdăh iŏk đơ̆ng đei tơmât hơdai.

Ƀok Y Vui Ayun, Bí thư chi ƀô̆ plei Hwiê tơroi: “2 pơlei đơ̆ng rŏng kơ tơmât hơdai drơ̆ng nơ̆r vă jang atŏk tơiung chă tơmang lăng lơ̆m tơpôl păng tưk tơiung dôm tơdrong juăt ‘lơ̆ng đơ̆ng bơngai Rađe nhen hơbăn ao tanh, dôm tơdrong joh ayŏ kơ dŏ xoang tơ̆ pơlei, trong jang mă nhôn vă tưk tơiung tơdrong tanh brai vai khăn tơ̆ tơring. Nhôn kŭm ‘mĕh tơlĕch nơ̆r apinh hăm Anih chĕp kơ̆l Đảng pơih lăm pơtho tôn chĭng vă đe kon sâu ning mônh kơnh gơ̆h chĕp vei tơdrong juăt ‘lơ̆ng đơ̆ng yă ƀok sơ̆.”

Đơ̆ng tơdrong tơroi tơ̆ plei Hwiê gơ̆h ƀôh, vă 1 trong jang tih gơ̆h mât lơ̆m tơdrong arih xa, tơdrong kăl hlŏh ưh kơsĭ lăp pơm lăp hăm dôm tơdrong hơgăt găh kơsô̆ kon pơlei dăh mă teh xă, teh iĕ đĕch, mă oei athei vei kơjăp tơdrong pơvei lơ̆m tơpôl păng dôm kơjă kăp gĭt đơ̆ng joh ayŏ kơ dŏ xoang đei tơiung pơjing kiơ̆ lơ jơhnơr. Hăm jơhngâm đon ‘nŏh, phường Ea Kao hlôi pơjing trong tơmât hơdai đơ̆ng 25 pơlei jing pă 18 pơlei, atŭm hăm ‘nŏh tơgŭm vei lăng ‘lơ̆ng dôm tơdrong juăt tơ̆ pơlei pơla arih xa đunh đai păng đei lơ tơdrong juăt, jŏh ayŏ kơ dŏ xoang ‘lơ̆ng hơiă đơ̆ng kon pơlei Rađe.

Ƀok Đặng Gia Duẩn, Bí thư Đảng phường Ea Kao ăn tơbăt: “Đei lơ tơdrong hơgăt pơih trong ăn tơdrong tơmât hơdai âu, tơdrong kăl đơ̆ng chăl arih so đei tơchĕng truh hơdrol hlŏh. Hăm dôm tơring đei lơ tơdrong juăt đơ̆ng sơ̆ nhen dôm pơlei pơla bơngai Rađe adrol ki ‘nŏh adrin vei lăng vă gơ̆h vei kơjăp păng tưk tơiung dôm kơjă kăp gĭt đơ̆ng joh ayŏ kơ dŏ xoang so. Kon pơlei kŭm đei đon tơtăm đơ̆ng rŏng kơ tơmât hơdai ‘nŏh dôm tơdrong pơm hla ar vei lăng thoi yơ? Truh âu kơnh, Anih chĕp kơ̆l Đảng vă pơtho ăn kăn ƀô̆ jur truh tơ̆ pơlei pơla, kueng kơphô̆ đơ̆ng rŏng kơ tơmât hơdai vă pơm hơmet dôm hla ar kăl ăn kon pơlei păng kon pơlei gơ̆h năm tơ̆ Anih pơm hla ar ăn tơpôl vă pơm ming dôm hla ar kăl đơ̆ng rŏng kơ tơmât hơdai, kăl hlŏh dơ̆ng dôm hla ar âu gô đei pơm đĕch ưh đei nôp jên.”

Trong jang đơ̆ng phường Ea Kao kŭm jing trong jang atŭm đơ̆ng dêh char Đắk Lắk: tơmât hơdai ưh lăp kiơ̆ kơsô̆ kon pơlei dăh mă teh xă, iĕ đĕch, mă oei athei tơchĕng truh tơdrong jŏh ayŏ kơ dŏ xoang păng tơdrong pơvei lơ̆m tơpôl dơ̆ng.

Đon pơhnŏng đơ̆ng Đắk Lắk ‘nŏh tơjur kơsô̆ pơlei pơla, kueng kơphô̆ đơ̆ng 2.801 pơlei jur pă 1.556 pơlei.

Ƀok Vũ Lê Các, Phŏ Kơdră Anih jang Nô̆i vŭ dêh char Đắk Lắk ăn tơbăt, lơ̆m tơdrong pơjing trong jang, Đắk Lắk hơnơ̆ng năng kăl truh rim tơdrong juăt, tơdrong ‘lơ̆ng đơ̆ng rim tơring: “Hăm dêh char Đắk Lắk, tơring đei lơ kon pơlei kon kông arih xa, nhôn tôch tơrek truh tơdrong chĕp vei dôm kơjă kăp gĭt đơ̆ng joh ayŏ kơ dŏ xoang păng vei kơjăp tơdrong pơvei lơ̆m tơpôl. Yoa thoi noh, hăm dôm tơring đei lơ tơdrong ‘lơ̆ng hơiă hơdrô̆ nhen tơ̆ tơring hơtăih yăih, tơring sơlam, tơring đei trong yak pơmat tat dăh mă dôm pơlei đei tơdrong juăt, jŏh ayŏ kơ dŏ xoang ‘lơ̆ng hơiă, dôm tơring chă hơlen năng tôm tơdrong kăl kiơ̆ tơdrong hơgăt adrol vă tơlĕch tơdrong tơchơ̆t tơmât hơdai.”

Gơh pơma đơ̆ng rŏng kơ tơmât hơdai, mĭnh ƀar hơnăn pơlei gô ưh pă đei yoa lơ̆m hla ar bơih. Mă lei tơdrong juăt ‘lơ̆ng đơ̆ng sơ̆ oei đei chĕp vei hơnơ̆ng, tơdrong pơvei băl lơ̆m pơlei pơla đei tưk tơiung păng kon pơlei hơnơ̆ng ƀôh kơdih kâu jĭ tơ ‘ngla tơm dơnơm lơ̆m tơdrong tơplih ‘nao, ‘nŏh rim tơdrong tơmât hơdai gô ưh đei hiong tơdrong kiơ, mă sư jing hơyak blŭng a ăn 1 anih jang tŏk ‘nao đơ̆ng dôm pơlei pơla tơ̆ groi kông Đắk Lắk./.