Unh hnam ‘nhŏng Điểu Đên jĭ 1 lơ̆m 60 unh hnam kon pơlei kon kông tơ̆ plei Bu Lum, xăh Quảng Trực, dêh char Lâm Đồng tŏk ‘nao lơ̆m hnam ‘nao man yoa teh đak tơgŭm ăn. Tơdrong hơiă đơ̆ng ‘nhŏng kŭm hăm mih ma duch nă roi lơ mưh hnam ‘nao đei hloi unh điên, jê̆ hnam trưng, hnam pơgang. ‘Nhŏng Điểu Đên tơroi, unh điên tơ̆ hnam ‘nao tôch jăng păng sơđơ̆ng, hui kŭp điên kơna ‘nhŏng iŏk 2 triu hlak jên đei teh đak tơgŭm vă răt gŏ điên, gŏ rơ̆ đak hăm điên. Dang ei klo kăn ‘nhŏng oei mong jên vă răt dơ̆ng hơtuh sơngieu, kơmăy mơ̆ng brŏ păng ‘nhŏng ‘mĕh dôm tơring kon kông oei nai tơ̆ xăh kŭm thoi noh ‘năi.

‘Nhŏng Điểu Đên tơroi: "Inh ƀôh Đảng, Teh đak pơngơ̆t truh kon pơlei kon kông tơ̆ tơring sơlam tôch lơ. Lơ̆m plei ‘nâu mih ma duch nă tôch kơ hơiă, đe hŭt lê̆ hnam tơ̆ hơtăih vă vih oei xa tơ̆ âu yoa tơ̆ âu ‘lơ̆ng ƀiơ̆, đei unh điên hiôk hian ƀiơ̆. Inh hơpơi ‘mĕh teh đak hơlen năng, pơngơ̆t truh, tơgŭm ăn dôm pơlei nai hai, dôm unh hnam tam mă đei điên vă đe sư gơ̆h đei unh điên yoa lơ̆m tơdrong arih xa nhen tơ̆ âu."

Jê̆ plei Bu Lum ‘nŏh jĭ plei Bu Dắr. Đơ̆ng đei unh điên teh đak, lơ hnam chô̆ kơƀŏng điên păng camera tơguĕch păih trong, vă tơ̆k hơdăh trong vih vât lơ̆m kơmăng ‘mi kial hai, vă tơtom tơgŭm ăn bơngai mưh đei tơdrong pơ̆k gre păng vă tang găn đe tơtông klĕ hai. Tơdrong vei lăng pơlei đơ̆ng Ƀok pơgơ̆r plei Bu Dắr - ‘nŏh Vũ Minh Tiến yoa thoi noh kŭm hiôk ƀiơ̆, đei yoa ƀiơ̆ hai: "Unh điên truh ‘nŏh tơplih ‘nao lơ tơdrong ăn um ai tơ̆ xăh sơlam, kon pơlei tôch hơiă. Lơ̆m plei ‘nâu đơ̆ng 2-3 unh hnam ‘nŏh yoa hơdai 1 công-tơ vă tơruih ăn ‘long pơtăm lơ̆m pơyan choh jang, yoa điên 3 pha mưh iŏk yoa sư hiôk ƀiơ̆ kơ pruih đak hăm kơmăy. Điên tơ̆k hơdăh vang tơgop pơm tơjur ƀiơ̆ gre tâm preh băl, lơ unh hnam oei chô̆ hloi camera vă tang găn đe tơtông klĕ”.

Tơdrong chô̆ unh điên teh đak truh tơ̆ tơring sơlam hlôi pơjing tơdrong ‘lơ̆ng vă anih jang bơ̆ jang đei yoa tơdrong vei lăng, vang vei lăng ‘lơ̆ng tơdrong pơm tơm, tơdrong sơđơ̆ng tơ̆ tơring sơlam teh đak. Kiơ̆ Thượng tá Phan Văn Khá, Kơdră jang Chinh trĭ tơ̆ Kơđông linh vei lăng ‘măng jang sơlam Bu P'Răng, unh điên teh đak đei chô̆ truh, hơmet kơjăp păng vei lăng sơđơ̆ng ‘lơ̆ng rim tơdrong, pơvih tôch đei yoa ăn tơdrong chĕp kơ̆l pơgơ̆r, pơm ‘lơ̆ng ăn tơdrong roi tơbăt mưh bơ̆ jang. 

Thượng tá Phan Văn Khá pơma dơ̆ng: "Tơdrong chô̆ unh điên truh tơ̆ tơring hơtăih yăih vang tơgop ăn tơdrong jang tŏk mŭk drăm păng vei sơđơ̆ng teh đak. Hăm kon pơlei, mưh đei unh điên ‘nŏh gơ̆h jang kiơ̆ kơmăy kơmŏk, khoa hŏk ki thuơ̆t vă jang tŏk mŭk drăm, vei sơđơ̆ng tơdrong arih xa. Hăm kăn ƀô̆, linh tơ̆ kơđông, unh điên vang tơgŭm bơ̆ jang ‘lơ̆ng tơdrong jang vei lăng teh đak, vei lăng tơring sơlam, hơtŏk tơdrong tơplih hăm kơmăy sô̆ lơ̆m tơdrong jang." 

Ƀok Trần Minh Huy, Kơdră vei lăng Unh điên Tuy Đức, Công ty jang unh điên Lâm Đồng (găh Công ty tơm jang unh điên tơring Pơbăh), ăn tơbăt tơ̆ tơring sơlam, tơring hơtăih yăih, tơdrong pơtruh unh điên sơđơ̆ng ‘lơ̆ng păng hơnơ̆ng ưh lăp vă pơyoa ăn tơdrong jang tŏk mŭk drăm, tơpôl đĕch mă oei tơgop kŭm hăm khul kơdră pơgơ̆r tơring păng khul jang kơpal vei kơjăp tơdrong sơđơ̆ng teh đak, pơjing tơring sơlam sơđơ̆ng ‘lơ̆ng hơiă dơ̆ng: "Tuy Đức jĭ tơring sơlam kơna anih jang, trong, unh điên oei tôch pơmat tat mă lei gơnơm đei tơmât jên jang kơna truh dang ei tơring hlôi đei unh điên sơđơ̆ng’lơ̆ng, 99% tơring đei unh điên. Dôm tơdrong jang pơm sơđơ̆ng tơdrong arih xa ăn kon pơlei tơ̆ tơring sơlam nhen tơdrong jang tơm kơ teh đak mưh pơgơ̆r bơ̆ jang pơm trong, man anih jang, chô̆ unh điên hơnơ̆ng đei jang ‘lơ̆ng, athei pơtruh măh mai unh điên ăn kon pơlei oei xa tơ̆ tơring sơlam, pơtruh măh mai unh điên ăn tơdrong vei lăng sơđơ̆ng teh đak".

Kŭm nhen thoi noh mơ̆n, unh điên teh đak tơpă mơ̆n vang tơgop tôch ‘lơ̆ng ăn tơdrong jang tŏk mŭk drăm, vei lăng sơđơ̆ng tơdrong arih, vei kơjăp tơdrong sơđơ̆ng tơ̆ tơring hơtăih yăih, tơring sơlam xăh Đắk Wil, dêh char Lâm Đồng. Dôm sơnăm âu ki, unh điên teh đak hlôi jing jơhngâm pran gĭt kăl vă jang tŏk mŭk drăm tơ̆ tơring. Đei unh điên sơđơ̆ng tơgŭm ăn kon pơlei pơ̆n tơlĕch jên răt kơmăy kơmŏk, kơmăy pruih đak, jang kiơ̆ khoa hŏk ki thuơ̆t mưh choh jang xa, hơtŏk tơmam jang đei păng jang đei tơmam roi ‘lơ̆ng hăm dôm kơloăi ‘long pơtăm tơm nhen cheh phe, tiu, sầu riêng păng dôm kơloăi ‘long xa plei nai.

Kơdră vei lăng kon pơlei xăh Đắk Wil Hoàng Văn Tám pơma akhan: "Tơring tơchĕng ‘lơ̆ng tơdrong vang tơgop đơ̆ng anih jang unh điên mưh tơlĕch jên chô̆ hơmet unh điên tơ̆ tơring sơlam Đắk Wil, pơm tơjur ƀiơ̆ tơdrong ưh hơtŏ băl đơ̆ng pơlei pơla tơ̆ xăh hăm dôm tơring nai. Unh điên đei pơtruh măh mai ăn tơdrong jang xa, arih xa, pơm tơplih um ai tơring tơrang, pơm ‘lơ̆ng ăn tơring đei unh điên tơ̆k hơdăh, kon pơlei yak vih vât hiôk hian, vei lăng sơđơ̆ng ‘lơ̆ng tơ̆ trong nơnăm, vei kơjăp tơdrong sơđơ̆ng păng tang găn tơdrong pơm glăi.".

Unh điên ưh lăp pơyoa ăn tơdrong arih xa, jang xa kơ kon pơlei đĕch, mă oei pơtruh ăn dôm tơring oei xa, dôm kơđông linh păng khul linh oei bơ̆ jang prăt măng prăt năr vă vei lăng tơring sơlam teh đak. Mă loi, dôm tơdrong jang vei lăng sơđơ̆ng tơdrong arih xa ăn kon pơlei tơ̆ tơring sơlam ‘nŏh jĭ trong jang tih đơ̆ng teh đak; lơ̆m noh, unh điên đei năng jĭ 1 lơ̆m dôm tơdrong gĭt kăl vă kon pơlei gơ̆h đei tơdrong arih xa, jang xa hiôk sơđơ̆ng, ‘lơ̆ng hơiă.