Tơ̆ Hnam trưng teh đak rong jăl mônh – jăl ƀar Dục Nông, hnam trưng hlôi man pơkeh dôm anih mă hơtuch. Hơdai hăm ming man, hnam trưng kŭm oei pơgơ̆r chă rơih hŏk tro mât hŏk vă pơm ‘lơ̆ng, hơmet tôm tơdrong vă hnam trưng gơ̆h pơtho pơhrăm đơ̆ng sơnăm hŏk ‘nao 2026-2027. Kiơ̆ trong jang, Hnam trưng teh đak rong jăl mônh – jăl ƀar Dục Nông đei dang 1.680 ‘nu hŏk tro. Lơ̆m noh, hlŏh 1.140 ‘nu hŏk tro iŏk đơ̆ng Hnam trưng jăl mônh păng jăl ƀar Đắk Dục; dang 550 ‘nu hŏk tro ‘nao iŏk năm hŏk kơtă lơ̆m tơring vă ăn hŏk oei hloi tơ̆ hnam trưng.

Đơ̆ng rŏng đei pơjao tơdrong hơgăt, hnam trưng pơjing Anih pơgơ̆r jang, Khul chă rơih hŏk tro mât hŏk; jang hơdoi hăm khul kơdră pơgơ̆r tơring, dôm khul grŭp tơpôl păng Khul jang Mặt trận tơ̆ rim pơlei năm truh tơ̆ rim unh hnam roi tơƀôh mă rơđăh rim tơdrong tơgŭm ‘măn ăn hŏk tro hŏk oei kơtă tơ̆ hnam trưng. Ƀok Trần Đức Thư, Hiê̆u trơng Hnam trưng teh đak rong jăl mônh păng jăl ƀar Dục Nông ăn tơbăt, truh dang ei, hnam trưng hlôi iŏk thim dơ̆ng hlŏh 360 ‘nu hŏk tro ‘nao, iŏk đei loi 65% tơdrong hơgăt. Mă lei, yoa ‘nâu jĭ trong jang mă blŭng đei tơlĕch tơ̆ tơring kơna tơdrong chă rơih hŏk tro kŭm oei tơƀâp pơmat tat yoa lơ bơngai oei tơtăm, pơngơ̆t găh tơdrong rong ‘me păng vei lăng kon hơ ‘lơ̆ng kơdih: "Adrol sơ̆ tam mă đei hnam trưng teh đak rong, hŏk oei kơtă tơ̆ hnam trưng kơna lơ mĕ ƀă hŏk tro oei pơngơ̆t. Hnam trưng jang hơdoi hăm Anih chĕp kơ̆l đảng, khul kơdră tơring hơnơ̆ng krao hơvơn, roi tơbăt vă đe mĕ ƀă hŏk tro hlôh vao, lui păng hơđơ̆ng jơhngâm ăn kon năm hŏk tơ̆ hnam trưng".

Kŭm hăm chă rơih hŏk tro mât hŏk, tơring kŭm pơjing trong rơih hơmet khul thây kô pơtho vă pơm ‘lơ̆ng ăn  tơdrong pơtho, hŏk pơhrăm đơ̆ng sơnăm hŏk mă blŭng hloi. Kơplăh dang ei, hnam trưng vă iŏk pơđĭ thây kô so tơ̆ Hnam trưng jăl mônh păng jăl ƀar Đắk Dục ki; đang kơ ‘nŏh chă hơlen năng dơ̆ng, hơmet ming  păng pơm hla ar pơkăp iŏk bơngai pơtho kiơ̆ tơdrong ‘mĕh vă tơ̆ yăn âu.

Kiơ̆ ƀok Trần Cao Bảo Việt, Kơdră vei lăng kon pơlei xăh Dục Nông, tơdrong tơmât jên man hnam trưng teh đak rong jăl mônh păng jăl ƀar iŏk đei tơdrong tơgŭm tôch ‘lơ̆ng đơ̆ng kon pơlei. Kơsô̆ hŏk tro chih măt apinh mât hŏk, oei xa hloi tơ̆ hnam trưng lơ hlŏh kơsô̆ tơdra hơdrol, tơƀôh hơdăh tơdrong hơmĕng đơ̆ng mĕ ƀă hŏk tro hăm anih hŏk pơhrăm ‘nao. Tơring hlôi athei dôm anih jang kơpal hơtŏk dơ̆ng kơsô̆ thây kô pơtho lơ̆m sơnăm 2026 vă pơm lăp hăm tơdrong ‘mĕh vă pơtho pơhrăm mưh hnam trưng đei tơmât yoa. Hăm Anih oei tơ̆ hnam trưng, dôm lăm đei pơm xă ‘lơ̆ng, đei tôm tơmam yoa kăl. Lăng kiơ̆ kơsô̆ hŏk tro đei chih tơ̆ yăn  âu, tơring vă tơroi ăn anih jang kơpal hơlen năng, asong dơ̆ng lơ hŏk tro mât oei tơdăh pơm lăp hăm dôm tơdrong hơgăt. 

Ƀok Trần Cao Bảo Việt, Kơdră vei lăng kon pơlei xăh Dục Nông ăn tơbăt: “Đơ̆ng rŏng chă iŏk hŏk tro mât hŏk gô lăng kiơ̆ kơsô̆ hŏk tro tơ̆ yăn âu tơ̆ rim lăm, vă roi tơbăt, apinh nơ̆r đơ̆ng Anih vei lăng kon pơlei dêh char Quảng Ngãi păng apinh nơ̆r pơtho tơƀôh đơ̆ng Anih jang Nô̆i vŭ dêh char Quảng Ngãi vă hơmet ming kơsô̆ thây kô mă lăp hăm dôm môn hŏk. Atŭm hăm 'nŏh nhôn kŭm apinh nơ̆r Anih jang Nô̆i vŭ dêh char păng Anih vei lăng pơtho pơhrăm dêh char Quảng Ngãi găh tơdrong iŏk thim dơ̆ng thây kô lơ̆m sơnăm 2026 ăn xăh Dục Nông”.

Tơ̆ xăh Sa Loong, tơdrong hơmet ăn Hnam trưng  teh đak rong jăl mônh păng jăl ƀar kŭm đei pơgơ̆r bơ̆ jang hrơ̆ch ‘lơ̆ng. Hnam trưng đei jên man vă jê̆ 209 ti, adrin jang đang ƀât hơtuch khei 7 sơnăm ‘nâu vă pơyoa ăn sơnăm hŏk ‘nao.

Xăh Sa Loong krao akŏm dôm khul jang vang jang hơdoi hăm hnam trưng năm truh tơ̆ rim pơlei vă roi tơbăt ăn mĕ ƀă hŏk tro găh tơdrong hŏk pơhrăm, oei xa tơ̆ hnam trưng kŭm nhen dôm tơdrong tơgŭm ‘măn ăn hŏk tro. 

Ƀok Xiêng Thanh Phú, Kơdră vei lăng kon pơlei xăh Sa Loong, dêh char Quảng Ngãi pơma hơdăh, truh dang ei, tơdrong chă rơih hŏk tro mât hŏk hlôi jang đang kiơ̆ trong đei tơlĕch bơih: "’Moi kiơ̆ tơdrong tơchơ̆t kơsô̆ 71 đơ̆ng Anih tơm Chinh trĭ, Anih chĕp kơ̆l Đảng păng Anih vei lăng kon pơlei xăh Sa Loong chih hơdăh vă pơm hơtŏk tơdrong ‘lơ̆ng đơ̆ng pơtho pơhrăm, mă loi ‘nŏh hơmet mă khul thây kô, jĭ 1 lơ̆m dôm tơdrong jang tơm lơ̆m jăl jang đơ̆ng 2025 - 2030. Tơring vă hơnơ̆ng hơtŏk tơdrong pơtho pơhrăm ming thây kô tơ̆ dôm môn hŏk oei ưh kơmăh, atŭm hăm ‘nŏh pơgơ̆r rơih iŏk dơ̆ng khul thây kô rơgei, vă pơm lăp hăm tơdrong ‘mĕh vă tơplih ‘nao pơtho pơhrăm păng lăp hăm rim tơdrong đei tơ̆ yăn âu tơ̆ tơring".

Vă hơmet ăn sơnăm hŏk 2026-2027, Anih vei lăng kon pơlei dêh char Quảng Ngãi hlôi kĭ ăn trong rơih iŏk hŏk tro mât hŏk tơ̆ 4 hnam trưng teh đak rong jăl mônh păng jăl ƀar tơ̆ dôm xăh sơlam tơ̆ kông. Hŏk tro đơ̆ng lăm 1 truh lăm 9 đei rơih iŏk kiơ̆ trong set hơlen, ưh đei pơgơ̆r thi. Bơngai vă iŏk hŏk ‘nŏh jĭ hŏk tro oei tơ̆ dôm xăh sơlam păng dôm xăh sơlam jŭm dăr kơ ‘nŏh kiơ̆ tơdrong hơgăt.

4 hnam trưng đei pơjao hơdăh kơsô̆ vă iŏk hŏk tro mât hŏk đei Dục Nông, Mô Rai, Rờ Kơi păng Sa Loong hăm hlŏh 5.600 ‘nu hŏk tro, lơ̆m noh đei vă jê̆ 1.250 ‘nu hŏk tro hŏk oei kơtă tơ̆ hnam trưng.

Ƀok Nguyễn Ngọc Thái, Kơdră Anih vei lăng pơtho pơhrăm dêh char Quảng Ngãi ăn tơbăt, kŭm hăm tơdrong hơtŏk hrĕnh ming man dôm hnam trưng teh đak rong, anih pơtho pơhrăm oei jang hơdoi hăm dôm tơring rơih hơmet hŏk tro mât hŏk, hơmet ming tôm tơmam vă dôm hnam trưng gơ̆h tom sơng iŏk hŏk tro mât hŏk lơ̆m sơnăm hŏk ‘nao: “Nhôn roi tơƀôh ăn Anih vei lăng kon pơlei dêh char Quảng Ngãi pơtho tơƀôh, krao akŏm rim khul jang pơgơ̆r bơ̆ jang tăng ka, tăng kip, jang kơmăng, adrin jang đang hrôih. Adrin lơ̆m khei 8/2026 athei bơ̆ jang hơlen năng dôm hơyak kăl, lăng năng dơ̆ng tơdrong pơm hla ar, hơpuih hơmet mă ‘lơ̆ng păng ăn hŏk tro mât hŏk sơnăm hŏk ‘nao trŏ hăm tơdrong hơgăt đơ̆ng dêh char”./.