Lơ̆m hnam tơ̆r kơjăp ‘lơ̆ng, ƀok Kơ Să Ha El ‘măn lăm tŏk bŏk hnam hơtol Rup Ƀok Hô păng lơ ƀăng khen, lơ̆m noh đei Hla ar chih tơbăt 30 sơnăm jang Đảng. Adrol sơ̆ ƀok hlôi iŏk jang lơ kơchư̆k gĭt kăl tơ̆ tơring nhen Bí thư Đảng xăh Dà Chais, đang kơ ‘nŏh Kơdră vei lăng Khul kon pơlei jang chŭn mir apŭng Lạc Dương. Ƀok iŏk jang kơchư̆k Phŏ Kơdră Anih jang Tuyên giáo apŭng Lạc Dương, dêh char Lâm Đồng so, păng pơdơ̆h hưu sơnăm 2022.

Hăm tơdrong rơgei păng bưng ai đơ̆ng kơdih, mưh vih tơ̆ pơlei, ƀok Kơ Să Ha El hơnơ̆ng đei pôk pơm Bí thư Chi ƀô̆ plei Dà Blah, xăh Lạc Dương. Ƀok chơt hơiă tơroi truh tơdrong tơplih ‘nao tơ̆ pơlei pơla: “Adrol sơ̆ kon pơlei tơ̆ âu tôch tơnuh, trong kơnê̆, tơdrong jang xa nhen kơ đei kiơ… Truh sơnăm 1992, đei tơgŭm tơđăh cheh phe đơ̆ng khul kơdră tơring hlôi pơih đei jơhngâm pran, đon hlôh vao ăn kon pơlei jang tŏk. Nhôn krao hơvơn kon pơlei lê̆ pă kŏh phă bri, pơlung kon pơlei pơtăm ‘long cheh phe, ‘long hồng, rong kon tơrong nhen kơpô, rơmo...đei yoa lơ.”

Đơ̆ng bơ̆jang tơdrong jang tơm kơ teh đak pơjing tơring tơrang ‘nao, unh hnam đảng viên Kơ Să Ha El hơnơ̆ng năm hơdrol. Ƀok kŭm hăm Khul chă sek tơlang lơ̆m pơlei jur pơlung kon pơlei chĕng song teh pơm trong, man anih jang pơyoa ăn tơdrong arih xa kơ kon pơlei. Mă hơdăh, unh hnam ƀok chĕng song hlŏh 20m teh tơter trong đei kơjă truh kơti hlak jên ăn teh đak pơm hơmet trong gre 27C. Dang ei teh đak tơlĕch tơdrong jang pơih xă dơnâu Rơhoa, unh hnam ƀok chu hŭt hơchăng dơ̆ng 2,5 sao teh oei pơtăm chĕh phe.

Jơhngâm đon tơnăp, hơnơ̆ng năm hơdrol păng tơdrong plang pơyơ̆r đơ̆ng unh hnam đảng viên Kơ Să Ha El đei tơpôl tơ̆ tơring băt truh păng vang tơgŭm jơhngâm pơjing tơring tơrang ‘nao, adrin choh jang xa, pơm hơtŏk iŏk yoa. Sơnăm sơ̆, iŏk yoa jô̆ păh lăp kiơ̆ kơ̆l bơngai tơ̆plei Dà Blah đei 45 triu hlak jên 1 ‘nu. Pơlei ưh pă đei unh hnam tơnuh, lăp pă 2,3 unh hnam vă jê̆ tơnuh đĕch.

Yă Cil Pam K’Quyên, sơ̆ pơm Bí thư Chi ƀô̆ plei Dà Blah, xăh Lạc Dương, ăn tơbăt: “Hăm nhôn, ƀok Kơ Să Ha El hơnơ̆ng jĭ bơngai jang tơnăp, ling lang năm hơdrol, tơƀôh trong chong glung. Ƀok jĭ gơng tơƀưh tôch hơđơ̆ng đơ̆ng Đảng hăm kon pơlei, nơ̆r ƀok pơma hơnơ̆ng đei kon pơlei mơ̆ng păng pơm kiơ̆.”

Xăh Lạc Dương hrei ‘nâu đei pơjing kiơ̆ đơ̆ng tơmât hơdai 3 xăh Đạ Sar, Đạ Nhim, Đạ Chais kơ apŭng Lạc Dương so. Đei teh xă vă jê̆ 830 km2, Lạc Dương jing xăh xă hlŏh kơ dêh char Lâm Đồng, hăm kơsô̆ bơngai kon kông đei hlŏh 82%.

Ƀok Ya Tiong - Bí thư Đảng xăh Lạc Dương, ăn tơbăt, jăl jang đơ̆ng 2025 – 2030, xăh hơnơ̆ng jang tŏk, iŏk tơdrong choh jang xa pơm tơm; chă tơmang lăng jĭ tơdrong kăl. Vă jang đei dôm tơdrong tơchơ̆t đơ̆ng Đảng hơnơ̆ng pơm hơtŏk tơdrong arih xa ăn kon pơlei, xăh năng kăl truh hơnăp jang đơ̆ng khul kơdră chĕp kơ̆l Đảng, tưk tơiung hơnăp jang đơ̆ng đe đảng viên tơ̆ tơring kon kông.

“Tơring âu đei lơ đảng viên đunh sơnăm, nhen thoi ƀok Kơ Să Ha El, mă đơ̆ng đĭ pơdơh hưu bơih, mă lei hrei ‘nâu, yoa bôl boăl jang hơdoi, yoa ‘nhŏng oh, yoa mih ma duch nă lơ̆m pơlei, ƀok oei hơnơ̆ng plang pơyơ̆r jơhngâm vang tơgop kŭm hăm Khul kơdră tơring vang tơgop jơhngâm ăn tơdrong jang atŏk tơiung mŭk drăm, tơpôl kơ Lạc Dương âu.

Jơhngâm đon tơnăp ‘lơ̆ng đơ̆ng đảng viên Kơ Să Ha El hlôi tơgop hơmet kơjăp đon lui đơ̆ng kon pơlei hăm Đảng, tơiung đon adrin jang tŏk, vang pơjing pơlei pơla Lạc Dương, dêh char Lâm Đồng roi đunh roi ‘lơ̆ng rŏ./.