Ƀât tŏk bŏk ‘năr dơ̆ng, yă Y H’Xuân – Bí thư chi ƀô̆ pơm hloi Bơngai pơgơ̆r plei Kon H’Ring, xăh Đăk Tô, dêh char Quảng Ngãi truh tơ̆ hnam mŏ Y Nai vă pơlung kon mon năm hŏk. Mŏ Y Nai, tơroi, ưh đei hơdrô̆ unh hnam mŏ đĕch, mă yă H’Xuân oei hơnơ̆ng pơngơ̆t truh tơdrong arih xa kơ rim unh hnam  bơngai Xơ Đăng tơ̆ Kon H’Ring dơ̆ng: ‘’Yă Y H’Xuân jĭ 1 ‘nu kăn ƀô̆ jang tôch tơnăp, yă hơnơ̆ng krao hơvơn, pơtho tơƀôh ăn kon pơlei jang tŏk mŭk drăm, pơtho tơƀôh kon hơ ‘lơ̆p hŏk pơhrăm. Yă jĭ bơngai đei kon pơlei lơ̆m plei nhôn hŏk kiơ̆ vă ning mông kơnh, tơƀôh trong chong glung ăn kon hơ ‘lơ̆p rok kiơ̆ ‘năi.”

Hăm tơdrong krao hơvơn păng tơƀôh trong đơ̆ng yă Y H’Xuân, đĭ đăng kon hơ ‘lơ̆p bơngai kon kông tơ̆ Kon H’ring năm hŏk tôm ngăl. Yă akhan “‘Meh klăih đơ̆ng tơnuh ‘nŏh athei hŏk chư. Hlôh vao ‘mơ̆i na gơ̆h băt trong jang xa, gơ̆h hŏk đei dôm tơdrong ‘nao”. Kŭm gơnơm đơ̆ng hŏk pơhrăm mă tơdrong arih xa kơ kon pơlei roi đunh roi đei tơplih ‘lơ̆ng, roi phĭ tơnŏ, hiôk jơnap.

Plei Kon Hring đei hlŏh 400 unh hnam, vă đĭ đăng kon pơlei tơtă bơngai Xơ Đăng ngăl, dang ei lăp oei đei pă 6 unh hnam tơnuh păng 7 unh hnam vă jê̆ tơnuh. Hăm tơdrong tơgŭm đơ̆ng teh đak, hrei ‘nâu đĭ đăng unh hnam lơ̆m pơlei đei hnam man kơjăp ‘lơ̆ng, hơđơ̆ng jơhngâm choh jang xa.

Tơroi truh tơdrong jang tŏk klăih đơ̆ng tơnuh hin đơ̆ng kon pơlei, yă Y H’Xuân, bơngai đei vă jê̆ 20 sơnăm pơm Kơdră pơgơ̆r pơlei, bí thư chi ƀô̆ plei Kon H’Ring, tơroi dơ̆ng: ‘’Inh hơnơ̆ng krao hơvơn kon pơlei pơjing tơring tơrang ‘nao, tơplih ming tơdrong arih xa, cham hnam athei var hơmet, ‘you rơgoh, trong pơlei athei pơtăm pơkao vă pơlei pơla roi đunh roi ‘lơ̆ng. Inh krao hơvơn kon pơlei tơplih ming ‘’đon tơchĕng, trong jang xa’’ hŭt lê̆ dôm trong jang xa so ưh đei yoa. Sơ̆ kon pơlei bơ̆n jang ƀa 1 pơyan đĕch, dang ei jang 2 pơyan lơ̆m 1 sơnăm. Teh mir đei tơplih ming ‘long pơtăm. Lơ̆m pơgar hnam păng kơtu ‘nŏh pơtăm ‘long kăp gĭt vă pơm hơtŏk iŏk yoa. Lơ̆m pơlei dang ei hlôi tơplih tôch lơ, jơhnơr mơlôh pơnam choh jang xa, pơjei băl choh jang, lơ unh hnam răt đei gre hon đa, gre công nông, gre choh, kơmăy ot ƀa, ot cheh phe, vă rim hnam răt đei tôm tơmam, kơmăy kơmŏk pơyoa ăn tơdrong choh jang xa’’.

Pơma găh drŏ kăn Bí thư chi ƀô̆ Y H’Xuân, yă Lê Thị Kim Hiển – Kơdră Anih vei lăng jŏh ayŏ kơ dŏ xoang, tơpôl xăh Đăk Tô, dêh char Quảng Ngãi, ăn tơbăt, ‘nâu jĭ bơngai đei đon adrin păng jang tôch tơnăp. Yă Y H’Xuân jĭ 1 lơ̆m hui kăn ƀô̆ bơngai kon kông tơ̆ tơring mă đơ̆ng kră bơih ră mă lei oei gơ̆h yoa mang tơpôl, Zalo vă pơma nuh găh tơdrong jang. Dôm tơdrong jang đơ̆ng xăh tơlĕch tơ̆ pơlei Kon H’Ring đei bơ̆ jang hrĕnh, hiôk hian.

Yă Lê Thị Kim Hiển, ăn tơbăt: ‘’Duch Y H’Xuân jĭ 1 lơ̆m dôm ‘nu bơngai jang rơgei hăm tơdrong jang kơdih kŭm nhen tơdrong jang tơpôl. ‘Nao âu plei Kon H’Ring đei pơgơ̆r Hop akŏm pơjei băl ‘mêm kơ teh đak, xăh chih tơbăt pơlei đei lơ tơdrong tơgop lơ̆m tơdrong jang atŏk tơiung mŭk drăm tơ̆ tơring kon kông đơ̆ng 2020 – 2025. Kơdih kâu duch ‘nŏh đei pôk pơ ư tơ̆ Hop akŏm, jĭ đảng viên tôch tơnăp, bơ̆ jang ‘lơ̆ng tơdrong krao hơvơn, pơtho tơƀôh ăn kon pơlei jang tŏk mŭk drăm’’.

Hăm jơhngâm đon jang tơnăp, gơ̆h hơgei, hơnơ̆ng năm hơdrol đơ̆ng bơngai đảng viên, yă Y H’Xuân jing bơngai đei kon pơlei Xơ Đăng tơ̆ Kon H’ring gơnang yoa, vang tơgop atŏk tơiung mŭk drăm tơpôl, pơm tơplih um ai tơring tơrang 'nao, tơgŭm ăn kon pơlei đei tơdrong arih xa roi đunh roi đei ƀôh, phĭ tơtŏ dơnŏ 'lơ̆ng.