‘Năr 10/8/1947, tơ̆ plei Ma Hinh, dang ei ‘nŏh plei Đất Bằng, Chi ƀô̆ Đảng mă blŭng kơ apŭng Cheo Reo (găh dêh char Gia Lai so) đei pơjing hăm 3 ‘nu đảng viên: Ksor Ní, Rơchơm Thép păng Rơchơm But. Ƀok Ksor Ní đei pôk pơm Bí thư Chi ƀô̆. Lơ̆m dôm sơnăm kăch mang oei tơƀâp lơ pơmat tat, đe đảng viên hlôi pơjing anih jang chinh trĭ, krao hơvơn, pơchôp kon pơlei, dar deh hơnhăk tơdrong jang kăch mang yak tŏk. ‘Nao âu, anih pơjing Chi ƀô̆ mă blŭng kơ apŭng Cheo Reo đei Anih vei lăng kon pơlei dêh char Gia Lai tơlĕch jên pơjing pơm Anih ƀlŏk hơdơ̆r lơ̆m teh xă dang 1,7 ha. Anih âu jing “anih ƀrê” vă pơtho pơhrăm tơdrong jang kăch mang ăn rim jơhnơr.

Ƀlep ƀât tơbăt 81 sơnăm Kăch mang khei 8 păng Quốc khánh 2/9, năm ngôi dơ̆ng tơ̆ anih Ƀlŏk tơbăt âu, ƀok Trịnh Thanh Khiết – Phó Bí thư Đảng xăh Phú Túc pơma hơdăh: “Ƀai hŏk tih hlŏh đơ̆ng tơdrong pơjing Chi ƀô̆ đảng mă blŭng tơ̆ Cheo Reo ƀât dŏh sơ̆ jĭ tơdrong oei xa hơdai kơjăp ‘lơ̆ng đơ̆ng đe kăn ƀô̆ đảng viên hăm kon pơlei kon kông păng kon pơlei lơ̆m tơring… athei oei xa kơjăp hăm kon pơlei, jê̆ kon pơlei ‘mơ̆i...”

Jê̆ kon pơlei, oei hơdai hăm kon pơlei ‘nŏh jĭ ƀai hŏk kăl đơ̆ng dôm năr blŭng pơjing Chi ƀô̆ Đảng tơ̆ Cheo Reo (Gia Lai) truh dang ei oei hơnơ̆ng đei chih hơdăh hăm lơ trong jang tôch tơnăp đơ̆ng rim kăn ƀô̆, đảng viên tơ̆ tơring. Đơ̆ng rŏng kơ hơmet ming pơlei, dang ei plei Đất Bằng đei vă jê̆ 800 unh hnam, hăm hlŏh 3.180 ‘nu bơngai, mă lơ ‘nŏh jĭ bơngai Jarai. Chi ƀô̆ dang ei đei 73 ‘nu đảng viên, jĭ khul jang tơm kŭm hăm Mặt trận Tổ quốc păng dôm khul tơpôl vang roi tơbăt, krao hơvơn kon pơlei bơ̆ jang kiơ̆ trong jang đơ̆ng Đảng, tơdrong tơgŭm, khôi luơ̆t đơ̆ng teh đak; jang atŏk tơiung mŭk drăm, pơjing tơdrong arih xa ‘lơ̆ng hơiă.

Jĭ kăn ƀô̆ mơlôh hlôi hŏk đang đăi hŏk, ‘nhŏng Rơchơm Bết, (bơngai Jarai), Bí thư Chi ƀô̆ pơm hloi Ƀok pơgơ̆r plei Đất Bằng pơma hơdăh: “Kơdih kâu inh jĭ Bí thư Chi ƀô̆ pơlei, hơnơ̆ng băt hơdăh hơnăp jang đơ̆ng kơdih kâu ‘nŏh chă roi tơbăt, krao hơvơn kon pơlei jang atŏk tơiung mŭk drăm tơpôl, pơm kiơ̆ mă ‘lơ̆ng trong jang đơ̆ng Đảng, tơdrong tơgŭm, khôi luơ̆t đơ̆ng teh đak… Hăm dôm tơdrong oei tơhlăk, tơdrong ‘nao đei tơ̆ pơlei, nhôn kơchăng chă hơlen năng vă tơtom sek tơlang…”

Tơdrong chĕp kơ̆l pơgơ̆r đơ̆ng Khul chĕp kơ̆l đảng tơ̆ Đất Bằng akŏm lơ̆m dôm tơdrong tôch rơđăh lơ̆m tơdrong arih xa. Lơ̆m khei 7 âu ki, Chi ƀô̆ jang hơdoi hăm Mặt trận, khul tơpôl chă hơlen năng vang tơgŭm ăn vă jê̆ 200 unh hnam chih tơmât hla ar teh lơ̆m kơmăy kơsô̆. 60 unh hnam đei xa yoa tơdrong tơgŭm lơ̆m tơpôl đei pơlung iŏk jên kiơ̆ tài khoản tơplih ăn iŏk jên măt. Kŭm hăm ‘nŏh jĭ dôm tơdrong jang tơgŭm ăn unh hnam đei kŏng, tơgŭm ăn bơngai pơmat tat, khăm hơmet jĭ ăn bơngai kră, tang găn tơdrong jĭ jăn.

Kŭm hăm roi tơbăt, krao hơvơn, đe kăn ƀô̆, đảng viên tơ̆ Đất Bằng oei hơnơ̆ng năm hơdrol lơ̆m tơdrong tơplih ming đon tơchĕng, trong jang, mă loi lơ̆m tơdrong choh jang xa. Đất Bằng hrei ‘nâu hlôi pơjing đei dôm tơring teh pơtăm kơtao, ƀum, jang chŭn na ƀa đak; lơ trong năm tơ̆ chŭn mir đei tơlĕch jên man kơjăp ‘lơ̆ng, pơjing tơdrong ‘lơ̆ng vă kon pơlei jang tŏk mŭk drăm.

Đảng viên mơlôh Kpă Tuyên jĭ 1 lơ̆m dôm bơngai yak hơdrol lơ̆m tơdrong jang kiơ̆ khoa hŏk ki thuơ̆t mưh jang xa, tơplih ăn trong jang xa thoi so: “Jĭ 1 ‘nu Đảng viên, kơdih kâu inh hơnơ̆ng hŏk pơhrăm păng jang kiơ̆ dôm bơngai jang xa rơgei hơdrol. Sơ̆, tơdrong choh jang xa tơtă mơ̆ng kơ tŏ ‘mi, pơyan choh jang ngăl, kơna ưh đei iŏk yoa dôm yơ… Dang ei, gơnơm đei trong jang ‘lơ̆ng, đon kơchăng jang kiơ̆ khoa hŏk – ki thuơ̆t, choh jang hăm kơmăy kơmŏk, iŏk yoa kơmăy pruih đak… jang kiơ̆ kơmăy kơmŏk ‘nao, tơgŭm ăn tơdrong jang xa roi đei yoa ‘lơ̆ng.”

Đơ̆ng “găr hơdrĕch” blŭng a đei rei tơ̆ plei Ma Hinh 79 sơnăm sơ̆, truh dôm bơngai đảng viên hrei ‘nâu, tơdrong jang kăch mang tơ̆ plei Đất Bằng, xăh Phú Túc, dêh char Gia Lai oei hơ̆ng đei jang kiơ̆ hăm dôm tơdrong jang tôch hơdăh, tôch đei yoa. ‘Nŏh jĭ jê̆ kon pơlei, hlôh vao kon pơlei, kŭm hăm kon pơlei hơmet pơ ‘lơ̆ng dôm tơdrong pơmat tat; ‘nŏh jĭ hơnơ̆ng năm hơdrol lơ̆m tơdrong jang atŏk tơiung mŭk drăm, tơmât yoa khoa hŏk ki thuơ̆t, pơjing tơdrong arih xa roi đunh roi ‘lơ̆ng rŏ.