Đơ̆ng rŏng hơgrop hăm Ninh Thuận, Khánh Hòa hlôi jing groi teh akom đei lơ tơdrong rơvơn hui kơ đei: jih đak dơsĭ, kơjung hơtăih hloh Việt Nam, đak dơsĭ bol đak dơsĭ ‘lơ̆ng liĕm, lơ ving păng jih đak dơsĭ đe ư hơhang ang hơnhăk nhen Nha Trang, Vân Phong, Cam Ranh, Ninh Chữ, Vĩnh Hy, atŭm hăm bri kông, groi chuơh păng hơnih gru gra gĭt kăl dăr sơnăm sơ̆ ki. ‘Nou jing tơdrong tơm vă dêh char atok tơ iung rim tơdrong jang nhen tơmang pơhiơ̆ rơgoh ‘lơ̆ng, ŭnh hơyuh rơgoh ‘lơ̆ng, trong nơnăm ‘lơ̆ng liĕm păng hơdrong hơrih sa kon pơlei ‘lơ̆ng hơ iă.

Mă lei, Khánh Hòa oei gơnang lơ̆m mĭnh ƀar tơmoi kăl păng ƀônh đei ƀơm ưh kơ ‘lơ̆ng kơ yuơ đei tơdrong tơplih lơ̆m plei teh.

Tơ̆ Hop akŏm, lơ bơngai joăt jang pơchoh trong athei Khánh Hòa kăl hrôih pơjing đei trong pơkăp tơmang pơhiơ̆ rơgoh ‘lơ̆ng, tơlĕch jang truh sơnăm 2030 đei 80% hnam tep pơdơ̆h đei pơkăp ‘lơ̆ng. Ƀôh hơdăh đơ̆ng mĭnh ƀar hơnih tơmang pơhiơ̆ ‘lơ̆ng hơ iă tơ̆ tơring đei ƀôh, atok tơ iung rơgoh ‘lơ̆ng mĭnh păh pơm hơtŏk đei lơ tơmoi năm tơmang pơhiơ̆, mĭnh păh tơgop lơ̆m sơđơ̆ng hơrih sa jang sa tơpôl. Kiơ̆ đơ̆ng ƀok Phạm Minh Nhựt, Kơdră chĕp pơgơ̆r Khul jang Tơmang pơhiơ̆ Nha Trang- Khánh Hòa, ‘nou jĭ trong kăl hloh vă pơm hơtŏk kĕ pơjei, pơjing đei tơdrong jang kơjăp ‘lơ̆ng păng sơđơ̆ng ăn tơdrong oei sa jang sa đunh đai tai sơnăm:“Tơmang pơhiơ̆ rơgoh ‘lơ̆ng, tơmang pơhiơ̆ kơjăp ‘lơ̆ng ưh khan lăp kơ bruh mă lei jing tơdrong kăl hloh kơ rim hơnih mơdro sa bơ̆ jang tơmang pơhiơ̆. Mă kăl, hơnih jang mơdro găh hnam oei, hơnih mơdro kơ hơnih truh kăl iung jang hloi vei lăng cham char atum hăm tơdrong jang tơmang pơhiơ̆ kơ đe sư. Pơm lơ liơ vei kơjăp vei lăng năng tông cham char ‘lơ̆ng liĕm gô vei kĕ đei kơjăp ‘lơ̆ng, pơtih gia, ƀơ̆t măt ‘noh iŏk yua tơmam drăm ‘lơ̆ng hơ iă hăm cham char. Dăh mă rim tơdrong jang chă hium akŏm, hơmet pơ ‘lơ̆ng rơ̆m rĕk”.

Ƀok Nguyễn Long Biên, Kơ iĕng Kơdră chĕp pơgơ̆r Hơnih vei lăng kon pơlei dêh char Khánh Hòa tơbăt, dêh char gô hơlen tôch brĕ dôm nơ̆r tơgop lơ̆m trong bơ̆ jang, hơvơn khul tơpôl, pơtrŭt hơnih mơdro sa tơmơ̆t jên jang; adoi tơmơ̆t jang dôm trong jang kăl đơ̆ng Trung ương vă hrôih jang keh đang rim trong tơlĕch jang truh rơgoh ‘lơ̆ng tôm tong:“Khánh Hòa ‘meh vă hơnơ̆ng sơng iŏk đei tơdrong lăng tông nông gia, yak hơdoi đơ̆ng Trung ương, hơnih mơdro sa, khul joăt jang păng tơpôl vă iung jang kiơ̆ ‘lơ̆ng jơnei dôm tơdrong hơpơi ‘meh vă đei jing hơnih tơm tơmang pơhiơ̆ đak dơsĭ apŭng plenh teh, hơnih kơdrơ̆m rơgoh ‘lơ̆ng-gơh hơgei, trong nơnăm rơgoh ‘lơ̆ng-kơjăp ‘lơ̆ng, tơgop lơ̆m trong tơlĕch jang tŏk mŭk drăm ƀar kơsô̆ lơ̆m jăl jang 2025 – 2030”.