Dôm sơnăm adrol ki, 'nhŏng Briu Chéo, bơngai Cơ Tu, tơ̆ xăh groi kông Bến Giằng, pơlei tơm Đà Nẵng (apŭng Nam Giang, dêh char Quảng Nam so) hơnơ̆ng jang mir roh, jang thuê tôm tơdrong mă lei tơdrong arih oei tôch tơnuh đĕch. 'Nhŏng Briu Chéo năm tŏk iŏk jên đơ̆ng anih mong jên hloh 200 trĭu, đei khul kơdră tơring tơgŭm ăn tơđăh ‘long, kon yŏng, 'nhŏng Briu Chéo pơih xă hơdrong vă rong rơmo, nhŭng, pơtăm long xa plei. Dang ei 'nhŏng Briu Chéo rong đei vă jê̆ 200 tŏ rơmo, nhŭng păng pơgar long xa plei….

Trong jang đơ̆ng 'nhŏng Briu Chéo đei lơ bơngai truh lăng, hŏk jang kiơ̆. Ŭnh hnam yơ lơ̆m pơlei, pơla kueng ƀôt pơmat tat, 'nhŏng Briu Chéo chă trong tơgŭm ăn: “Unh hnam nhôn đei tŏk iŏk jên hăm jên kon tŏ sĕt kơna adrin jang xa, tơgŭm ăn unh hnam đei tơdrong arih xa sơđơ̆ng păng roi đei ƀôh ƀiơ̆, tơdrong arih xa kơ unh hnam hiôk jơnap ƀiơ̆ kơ adrol ki bơih. Tơ̆ hơnăp kơnh hơpơi 'meh khul kơdră tơring pơjing tơdrong ‘lơ̆ng, asong nhôn tŏk iŏk jên dơ̆ng, vă vei lăng, rong kon tơrong lơ̆m tơdrong jang atŏk tơiung mŭk drăm. Kon pơlei tơ̆ tơring, unh hnam yơ kăl inh tơƀôh ăn trong jang xa ‘nŏh inh truh, vă đe sư gơ̆h jang tŏk mŭk drăm păng pơjing tơdrong ‘lơ̆ng tơgŭm kon pơlei đei dơ̆ng tơdrong jang”.

Mŏ Bhnướch Thị Blắc, bơngai Cơ Tu oei tơ̆ xăh A Vương, pơlei tơm Đà Nẵng (apŭng Tây Giang, dêh char Quảng Nam so) rơnĕh lơ̆m unh hnam pơmat tat. Năr iŏk unh om, jur oei kơdih, mŏ pơma nuh hăm klo pơih anih tĕch mơdro tơmam ăn mih ma duch nă lơ̆m pơlei. Gơnơm mong đei jên tŏ sĕt, mŏ tŏk iŏk dơ̆ng jên đơ̆ng anih mong jên, răt rong kon tơrong păng pơtăm 'long xa plei. Truh dang ei, mŏ Blắc pơtăm đei hlŏh 2 hek tar 'long kam Vinh, hăm 800 tơnơm păng krô̆i dreng phĕ tĕch đei dôm jĭt triu hlak jên 1 pơyan. Tơgĕch iŏk tĕh xă păng tơmam hiĕm đei kơtă lơ̆m pơgar, mŏ Blắc pơm hơdrong rong nhŭng, iĕr păng tơlĕch jên pơtăm 'long pơm tơ̆r.

Ŭnh hnam mŏ Blăc hlôi tŏk klăih đơ̆ng ŭnh hnam tơnŭh păng đei măh mai mŭk drăm, man hnam 'lơ̆ng, răt gre ô tô vă jang xa. Mŏ Bhnươch Thị Blăc oĕi chă tơdrong jang ăn lơ bơngai tơnŭh tơ̆ tơring, đei jên khei sơđơ̆ng ‘lơ̆ng. Đơ̆ng rŏng trư tôm jên jang, 1 sơnăm ŭnh hnam mŏ Bhnươch Thị Blăc đei iŏk yoa đơ̆ng trong jang mŭk drăm âu vă jê̆ 200 triu hlak jên: "Adrol sơ̆, ŭnh hnam mơmat tat dêh, đơ̆ng đei Anih mong jên tơgŭm ăn tơpôl asong tŏk iŏk jên, ŭnh hnam pơih xă dơ̆ng dôm trong jang xa nhen pơtăm kam, 'long keo păng rong kon tơrong, đơ̆ng noh tơdrong arih xa kơ ŭnh hnam roi tŏk. Dang ei tơdrong arih xa sơđơ̆ng, jang xa đei iŏk yua kŭm păi mơ̆n. Đơ̆ng rŏng kơnh, klo kăn vă tŏk iŏk dơ̆ng kon jên vă tưk tơiung tơdrong jang xa roi xă ƀiơ̆".

Vă pơjing tơdrong 'lơ̆ng ăn kon pơlei jang atŏk tơiung mŭk drăm, hơtŏk iŏk yua, khŭl kơdră pơgơ̆r xăh A Vương tơgŭm hơdrĕch 'long, kon yŏng, tơgŭm ăn kon pơlei jang tŏk mŭk drăm. Ƀok Lưu Văn Khương, Phŏ Kơdră Anih vei lăng kon pơlei xăh sơlam A Vương, pơlei tơm Đà Nẵng ăn tơbăt, tơring hơnơ̆ng chih hơdăh tơdrong jang tơjur dơnuh hin 'noh jĭ tơdrong jang chĭnh trĭ, tơlĕch jang mă pran 'lơ̆ng dôm trong jang, tơdrong tơgŭm đơ̆ng Trung ương, pơlei tơm vă krao hơvơn, tơgŭm kon pơlei bơ̆jang sut pơđĭ pơngot, tơjur dơnuh hin. "Lơ ŭnh hnam pơ̆n tŏk iŏk jên vă pơ̆ih xă tơdrong jang xa, đei lơ ŭnh hnam jing ŭnh hnam jang xa, tĕch mơdro hơgei. Pơtih gia nhen ŭnh hnam mŏ Blăk, ŭnh hnam 'nhŏng Khánh, kŭm hăm mĭnh ƀar ŭnh hnam tơ̆ dôm pơlei pơla anai dơ̆ng. Tơring pơjing ‘lơ̆ng tôch pơnĕh, pơtruh nơ̆r hăm anih mong jên tơgŭm ăn tơpôl, anih mong jên choh jang xa hơtŏk jên asong tŏk iŏk vă kon pơlei đei jên jang xa sơđơ̆ng ‘lơ̆ng, tơgŭm ăn đe sư atŏk tơiung đei tơdrong choh jang xa".

Pơlei tơm Đà Nẵng dang ei đei hlŏh 50.000 ‘nu bơngai jang chŭn mir rơgei, lơ̆m nŏh đei lơ bơngai jang rơgei 'nŏh jĭ bơngai Cơ Tu. Rim sơnăm, Khŭl Choh jang xa kơ plt Đà Nẵng jang hơdoi hăm dôm anĭh jang, tơring tơrang, Anih mong jên vang tơgŭm kon pơlei tŏk iŏk jên hăm jên kon tŏ sĕt, pơtruh hơdrĕch 'lŏng, kon yŏng, tơgŭm ăn bơngai jang atŏk tơiung tơdrong jang mŭk drăm. Lơ ŭnh hnam kon pơlei bơngai Cơ Tu pơ̆n tơlĕch jên jang atŏk tơiung mŭk drăm ăn ŭnh hnam, vang tơgop ăn tơdrong jang pơjing tơring tơrang ‘nao./.