Dĭng dĭng jơva hơgơ̆r đĭ jơ hŏk, oh Siu Nhi, hŏk tro lăm 8A, Hnam trưng teh đak rong jăl mônh păng jăl ƀar Ia Púch, kŭm hăm bôl boăl hơmet hla ar hŏk, pơma dơnuh chơt hơiă đơ̆ng rŏng kơ jơ hŏk pơgê. Đe bôl boăl hnam jê̆ hnam trưng ‘nŏh vih sŏng xa tơ̆ hnam; oei Siu Nhi păng đe boăl nai oei hơtăih hnam trưng ‘nŏh iŏk kơhôp por đei mĕ ƀă tăh hơmet đơ̆ng pơgê, sŏng xa hơdai đang kơ 'nŏh pơdơ̆h ngôi tơ̆ lăm vă hŏk tơ̆ kơsơ̆ dơ̆ng. 'Nâu jĭ trong jang pơgia vă tơgŭm vei kơjăp tơdrong hŏk pơhrăm 2 ‘măng 1 năr, lơ̆m khei ‘năr gô anih chĕp gŏ păng anih oei, tep pơdơ̆h đang man. Hăm Siu Nhi, hnam trưng 'nao hơnhăk ba ăn oh lơ tơdrong hơiă păng đei dơ̆ng đon adrin vă hŏk pơhrăm: "Hmă hmă, inh lăp ƀôh anih hŏk pơhrăm thoi âu lơ̆m tivi dăh mă tơ̆ dôm hnam trưng nai đĕch. Dang ei inh đei hŏk lơ̆m hnam trưng tih, xă păng 'lơ̆ng thoi âu, inh ƀôh tôch hơiă. Inh vă adrin hŏk mă rơgei, băt chu yom hai."

Dôm tơnơm 'long 'nao pơtăm lơ̆m cham Hnam trưng Ia Púch pơtơm bluh tơ ‘mơ̆ng plơ̆ng ‘lơ̆ng hơiă. Tơring sơlam dôm sơnăm adrol thĕng kơ kot, dang ei ơ ơ̆r ơ ăr ƀơ̆r đŏk ƀai. Jŭm dăr dôm lăm hŏk, dôm khul kŏng nhơ̆n oei tăh hơmet ‘măng, sơng hơmet dôm tơnăr lăm hŏk mă hơtuch, pơm pơkeh anih pai xa, hnam hum, anih pih, sơ̆k hơmet hơbăn ao tơ̆ anih oei xa. Ƀok Phan Thành Tiến- Thây hiê̆u trơng Hnam trưng teh đak rong jăl mônh-Jăl ƀar Ia Púch ăn tơbăt, tơdrong jang oei đei dơ̆ng ưh kơ lơ, mă lei ƀơm truh rim 'măng sŏng xa, tep pơdơ̆h păng oei xa rim năr kơ hŏk tro kơna athei dăr hơlen năng mă ‘lơ̆ng adrol kơ tơmât yua.

Hnam trưng đei teh xă hlŏh 5ha, hăm 23 lăm hŏk păng dôm anih jang, pơm lăp hăm tơdrong 'mĕh vă hŏk pơhrăm, oei xa kơ hlŏh 700 'nu hŏk tro. 'Ngoăih kơ bơngai jang kiơ̆ tơdrong hơgăt, dêh char Gia Lai ăn thim bơngai vei lăng, pơvih pơvăn păng bơngai vei lăng hŏk tro tơ̆ 'ngoăih jơ hŏk; atŭm hăm 'nŏh tơlĕch jên răt chô̆ camera tơ̆ dôm anih kăl lơ̆m cham hnam trưng. Ƀok Phan Thành Tiến ăn tơbăt, hnam trưng hlôi hơlen năng, hơmet khul thây kô, bơngai chĕp gŏ, bơngai vei lăng păng khul vei hŏk tro tơ̆ 'ngoăih jơ hŏk. Tơdrong tơm 'nŏh mưh hnam gŏ păng anih oei xa, tep pơdơ̆h đei man đang păng tơmât yoa, dôm tơdrong vei lăng, rong 'me păng vei lăng hŏk tro kŭm đei hơmet đang ‘lơ̆ng ‘năi:

“Lơ̆m sơnăm hŏk 'nao, anih dơ̆ng păng jơhngơ̆m đon kơ đe hŏk tro păng mĕ ƀă hŏk tro tôch hưch hanh, čhôk ‘nă yoa đei hnam trưng ‘nao 'lơ̆ng rŏ. Hnam trưng pơjing trong jang lăp hăm hnam trưng hŏk oei xa kơtă tơ̆ hnam hŏk păng tơdrong arih xa kơ đe oh hŏk tro tơ̆ tơring. Kăl hlŏh jĭ găh jơhngơ̆m đon adrin hŏk pơhrăm”.

Tơ̆ tơring sơlam teh đak, hnam trưng teh đak rong kŭm iŏk đei tơdrong pơngơ̆t đơ̆ng ƀô̆ đô̆i vei lăng tơring sơlam. Đại tá Đoàn Ngọc Báu, Phŏ Chính ủy Anih chĕp kơ̆l pơgơ̆r khul linh dêh char Gia Lai, ăn tơbăt: hnam trưng teh đak rong tơ̆ tơring sơlam ưh lăp kơjăp 'lơ̆ng găh tơmam drăm, lăm hŏk đĕch mă oei đei tơdrong 'lơ̆ng găh tơdrong oei xa-pơtâp pơhrăm vă đe oh gơ̆h tih vơ̆ djơ̆ ‘lơ̆ng tôm tơdrong. Yua thoi noh, khul linh vă tơgŭm ăn hnam trưng pơjing trong hŏk pơhrăm, ngôi pơchơt lăp hăm rim sơnăm.

“‘Nâu jĭ tơdrong jang tôch gĭt kăl. Nhôn pơtho ăn dôm kơđông linh vei lăng tơring sơlam et pơm 'nhŏng oh hăm dôm hnam trưng tơ̆ tơring sơlam; pơgơ̆r roi tơbăt ăn đe hŏk tro, thây kô pơtho găh tơdrong hơgăt. Dôm khul jang vang jang hơdai hăm khul linh tơ̆ tơring kŭm hăm thây kô vei kơjăp tơdrong hơgăt oei xa tơ̆ hnam trưng lơ̆m năr păng ki luơ̆t hŏk pơhrăm, pơm ‘lơ̆ng ăn đe kon mon gơ̆h oei xa, hŏk pơhrăm sơđơ̆ng ‘lơ̆ng đơ̆ng dôm năr blŭng hloi.”

Đơ̆ng dôm giĕng hŏk mă blŭng, mĭnh trong yak 'nao tŏk bŏk đei pơih hăm thây kô păng hŏk tro tơ̆ Hnam trưng Ia Púch. Ƀât tŏk bŏk tơring sơlam teh đak, ƀơ̆r hŏk tro re ang rim năr, pơjing dơ̆ng đon lui păng tưk tơiung dơ̆ng tơdrong hơpơi 'meh găh mĭnh chăl arih ‘lơ̆ng hơiă đơ̆ng hnam trưng âu./.