Sơnăm 2022, đơ̆ng rŏng kơ pơdơh hưu đơ̆ng jang Kơdră Jơnŭm kon pơlei jang mir xah Quảng Trực, ƀok Điểu Dray pơtoi đei pôk jang Phŏ ƀĭ thư chi ƀô̆, kơdră pơlei Bu Prăng 1, adoi jang hloi Phŏ kơdră Jơnŭm vei lăng trong sơlam teh. Hăm rim kơchư̆k jang yơ, ƀok adoi jang tơnăp, dăp đon dăp bơnôh kơyuơ kon pơlei pơla.

Lơ̆m tơdrong pơm jang, ƀok Điểu Dray jĭ bơngai yuk hơlou gah tơplih hơdrĕch 'long pơtăm, choh hơmet var pơgar, pơyua lơ gah mŭk drăm. Sơnăm 2010, Tơdrong tơchơ̆t jang hơtŏk choh jang xa kơ teh đak tơlĕch pơtăm tơm măk ka pơtăm tơ̆ tơring sơlam Quảng Trực. Lơ̆m kơplah lơ unh hnam tam mă pơ̆n, noh unh hnam ƀok Điểu Dray iŏk pơtăm hloh 1ha măk ka. Tơdrong jang đei jơnei mă blŭng, unh hnam ƀok pơtoi pơih să teh pơtăm măk ka hrou hăm kaphê, tiu. Kră pơlei Điểu Dray ăn tơbăt: “Dang ei, teh pơtăm măk ka kơ unh hnam inh noh truh 8 ha, lơ̆m noh 1 ha 5 sao tŏk bŏk oei đei yua, 1 sơnăm pĕ yua 2 'măng, rim 'măng pơhlom đei 2 tơ̆n, tĕch hăm kơjă pơhlom 70 triu hlj 1 tơ̆n ah pơyan jang (khei 3–4), oei pơyan jang tơm (khei 9 –10) noh tĕch kăp hloh”

Vă gơh pơm jang kơjăp sơđơ̆ng, unh hnam ƀok Điểu Dray hlôi mơ̆t jang lơ̆m Hơp tak xah choh jang xa tơ̆ tơring. Ƀok hăt hot hŏk hơlen vă hơtŏk kih thuơ̆t, tơdrong vei lăng, pĕ yua, pơm tơlĕch tơmam drăm choh pơtăm kiơ̆ pơkăp kơjăp sơđơ̆ng. Ƀok adoi hơvơn kon pơlei vang jang lơ̆m hơp tak xah vă tơguăt hơtŏk mŭk drăm sơđơ̆ng hloh.

Truh dang ei, xah Quảng Trực, dêh char Lâm Đồng đei pơhlom 1.500 ha măk ka, pơih trong hiôk pơm pơdrŏng ăn kon pơlei jang mir, mă hăt noh hăm kon pơlei kon kông. Tơ̆ pơlei Bu Prăng 1, đei dôm jĭt unh hnam pơtăm măk ka; lơ unh hnam đei iŏk yua sơđơ̆ng rim sơnăm truh minh ƀar hrĕng triu hlj. Ƀok Đoàn Lê Anh – Kơdră Anih jang MTTQ Việt Nam xah Quảng Trực ăn tơbăt, vă gơh đei tơring pơtăm măk ka nhen dang ei, đei tơdrong tơgop kăp gĭt đơ̆ng kră pơlei Điểu Dray: “Ƀok Điểu Dray 'noh kră pơlei hơgei, sơ̆ jang Kơdră Jơnŭm kon pơlei jang mir xah, noh tơdrong chă tơroi tơbăt, pơhrăm choh jang xa đơ̆ng ƀok đei kon pơlei lui yom. Ƀok adoi jing bơngai vang jang lơ̆m tơdrong tơchơ̆t pơtăm măk ka mă blŭng tơ̆ Bu Prăng 1, Bu Prăng 2, đơ̆ng noh kon pơlei hŏk pơhrăm păng jang kiơ̆, tơgŭm ăn dôm pơlei pơla sơlam teh roi năr roi tơplih 'lơ̆ng”

Ưh hơdrô̆ yuk hơlou lơ̆m tơdrong choh jang, kră pơlei Điểu Dray oei tơrĕk truh tơdrong vei răk tơƀăk mong joh ayŏ kon pơlei M’Nông. Yơ̆ng ou ki, đơ̆ng rŏng kơ pơtôch pơyan pĕ yua tơmam choh pơtăm, bơngai M'nông tơ̆ xah Quảng Trực pơgơ̆r Et jur xa lơ̆m jơva chĭng chêng păr ang. Kră pơlei Điểu Dray ang hơdah hrŭk hơbăn ao tanh chĕp kơ̆l khul chĭng chêng Bu Prăng 1. Yă Thi Sư, kang ƀô̆ Anih jang gah Joh ayŏ Tơpôl xah Quảng Trực tơroi: kră pơlei Điểu Dray atŭm hăm khul chĭng chêng đei iŏk lơ tơdrong hơpah lơ̆m dôm tơdrong pơlong joh ayŏ kơdŏ suang kră sơ̆: “Ƀok hăt hot lơ̆m dôm tơdrong jang kơ pơlei pơla, jing bơngai yuk hơlou chă hơvơn kon pơlei vei răk khôi juăt kră sơ̆. Jing kơdră chĕp kơ̆l khul chĭng chêng, ƀok akŏm pơdah lơ̆m dôm tơdrong et xa, akŏm joh ayŏ, chă pơtho pơhrăm ăn đe sơnăm mơlôh pơhrăm păng vei răk tơdrong joh ayŏ kon kông”

Tơ̆ jăl trong sơlam Quảng Trực, dêh char Lâm Đồng, kră pơlei Điểu Dray đei băt truh nhen minh “tơm jrăng hơrih”. Khei  6 sơnăm sơ̆, ƀok đei Anih tơm pơgơ̆r Khul linh vei sơlam teh pôk hơnăn “bơngai đei kon pơlei lui yom gơh hơgei tơ̆ tơring sơlam, achon teh” lơ̆m tơdrong jang “Anih gơnơm kơ pơlei pơla”. Kră pơlei Điểu Dray jang Phŏ kơdră Jơnŭm vei lăng trong sơlam teh tơ̆ Quảng Trực. Ƀok hăt hot jang hơdoi hăm khul ƀô đô̆i vei lăng sơlam teh; hơnơ̆ng tơroi tơbăt ăn kon pơlei nĕ chă mơ̆ng kiơ̆ nơ̆r khul kơnê̆ pơhlŭ pơhlôm, vang jang tơdrong jang “Tôm kon pơlei vei lăng tơdrong pơgơ̆r kơdih tơring teh, vei sơđơ̆ng tơpôl tơring sơlam”.  Ƀok Điểu Minh Nhật, Phŏ Kơdră Anih jang MTTQ, Ƀĭ thư Đoan Hơdruh Tơdăm CS Hồ Chí Minh xah Quảng Trực ăn tơbăt, kră pơlei Điểu Dray jĭ um rŭp hơgei ăn đe sơnăm mơlôh rok ƀoi: “Đoan xah jang hơdoi hăm rim pơlei pơla, khul jang vei lăng trong sơlam teh atŭm hăm Kơđông linh vei lăng sơlam teh, vei sơđơ̆ng tơpôl tơring sơlam. Kră pơlei Dray oei jang hơdoi hăm Đoan Hơdruh Tơdăm xah pơgơ̆r akŏm tôn chĭng chêng tơroi tơbăt hơdruh tơdăm athei vei răk joh ayŏ, pơm kiơ̆ khôi luơ̆t teh đak, vei lăng bri, ưh đei mơ̆ng kiơ̆ nơ̆r pơhlŭ năm pơm jang tơdrong glăi...”

Dôm tơdrong hơdrin jang hơnơ̆ng đơ̆ng Kră pơlei Điểu Dray hlôi tơgŭm ăn pơlei Bu Prăng 1, xah sơlam teh Quảng Trực (dêh char Lâm Đồng) vei sơđơ̆ng tơpôl, hơtŏk mŭk drăm, vei răk tơƀăk mong joh ayŏ. Kơdih po ƀok kră pơlei lơ 'măng đei jơnei pơgơ̆r tơring păng ƀô̆ đô̆i vei sơlam teh pôk bơnê kơyuơ pơm jang hơgei lơ̆m tơdrong hơvơn pơtho kon pơlei, pơjing tơring tơrang 'nao păng vei lăng tơring sơlam teh.