Tơ̆ rim jăl trong truh xah Đơn Dương, dêh char Lâm Đồng, rơngơp jơk ƀlik pơgar 'nhot, ƀrông ƀrăng dôm pơgar pơkao tŏk bŏk ah khei iŏk yua păng muh măt sô̆ hơ-iă kơ bơngai jang mir. Hăm hloh 8.400ha 'long pơtăm, lơ̆m noh đei hloh 3.000ha 'nhot, pơkao pơtăm kiơ̆ trong 'nao atŭm hăm khul rơmo iŏk đak toh jê̆ 19.000 tŏ... hlôi pơm ăn tơdrong hơrih kon pơlei tơ̆ tơring ou phĭ tơtŏ dơnŏ 'lơ̆ng. Ƀok Nguyễn Tiến Khánh, oei tơ̆ thôn 1, xah Đơn Dương ăn tơbăt, tơdrong mă xah pơjing đei dôm tơdrong jang kăp gĭt – tĕch dôm tơmam drăm tơm nhen đak toh, 'nhot plei 'long xa hlôi hơtŏk choh jang xa kơjăp sơđơ̆ng păng hơtŏk iŏk yua ăn kon pơlei:  “Xah Đơn Dương iŏk yua tơdrong atŭm kơ apŭng Đơn Dương hơdrol ki, mă kăl apŭng Đơn Dương jĭ apŭng mă blŭng kơ dôm dêh char Tây Nguyên đei jơnei tơchơ̆t tơring tơrang 'nao, um rŭp tơring tơrang hloh kơ hơdrol ki. Tơdrong hơrih kon pơlei đei hơtŏk, hnam man kơjung tăl, gre hơyuh nhen tơ̆ tơring nhôn ou pă đei unh hnam hin dơnuh mă hloh 7% 'noh unh hnam pơdrŏng ngăl”

Đơ̆ng năr 1/7 ou ki dêh char Lâm Đồng yak ah jăl hơtŏk tơ-iung 'nao hăm mŭk drăm, tơdrong hiôk ang hơdah păng cham char pơih să đơ̆ng bri jur tơ̆ đak dơsĭ. Dêh char đei teh să hloh 24.000km2 să hloh kơ jơ̆p teh đak păng tơdrong jang mŭk drăm dơ̆ng mă 8. Tơdrong tơmơ̆t hơdai 3 dêh char adoi pơm ăn Lâm Đồng lơ tơdrong jang mŭk drăm chĕp kơ̆l lơ̆m jơ̆p teh đak, nhen kŏng ngĭp bô xít –  alumin – nhôm hăm bô xít jô̆ hơlen đei yua hloh 5,4 tih tơ̆n; tơdrong jang tơmang pơhiơ̆ hăm hơnăn tơmang pơhiơ̆ kơ teh đak Đà Lạt, Cham pơhiơ̆ hơgơp tơmo Đăk Nông đei hơgơp tơmo unh tih hloh Đông Nam Á, dơnou đak Tà Đùng nhen “Ving  Hạ Long tơ̆ Tây Nguyên”, tơmang pơhiơ̆ đak dơsĭ hăm Phan Thiết - Mũi Né, mă kăl noh tơring Phú Quý; choh jang xa noh đei pơkao, 'nhot, che lŭa pơm đơ̆ng hơdrông, ka đak hơngeo... chĕp kơ̆l kơ jơ̆p teh đak.

Ƀok Nguyễn Hoài Bão, sơ̆ jang Ƀĭ thư Tĭnh uy, Kơdră Khul jang tang măt ăn Kuôk hô̆i jăl 10 dêh char Lâm Đồng lui ngeh akhan:  “Dang ei Lâm Đồng đei sơlam teh, đei đak dơsĭ, teh dang ei noh să dơ̆ng hơlou kơ jơ̆p teh đak noh đei mŭk drăm tih tên tơpă. Lâm Đồng 'nao pơkăp jang 'nao, tơchơ̆t 'nao păng kăp gĭt hloh noh tôm atŭm minh jơhngơ̆m. Kon pơlei lui kơ Đảng hăm kơ̆l 'ngok hơgei kơ bơngai Việt Nam vă jang tơnăp sơnong jang păng hơpơi 'meh Việt Nam yak hơdoi hăm rim teh đak pran kơtang lơ̆m plei teh nhen Ƀok Hô hlôi pơtho”.

Dêh char Lâm Đồng adoi oei pơtơm pơklaih anih tơhlăk tơhlĭn hăm lơ tơdrong jang tơm gah trong nơnăm, sir kôch tơmo kăp gĭt, unh hơyuh, pơkăp anih oei 'nao... hăm kơsô̆ jên asong jang truh dôm jĭt tih hlj vă asong ăn tơdrong jang teh đak pơm trong ăn tơdrong jang mŭk drăm hơtŏk tơ-iung.     

Ƀok Y Thanh Hà Niê Kđăm, jang lơ̆m Trung ương Đảng, Ƀĭ thư Tĭnh uy Lâm Đồng ră hơdah: “Drŭt hơtŏk mŭk drăm vei sơđơ̆ng tơchơ̆t hơtŏk tơ-iung ah sơnăm 2025 kơ dêh char Lâm Đồng đei jơnei hloh 8%. Tơchơ̆t tơlĕch dang ei noh athei vei sơđơ̆ng 'lơ̆ng tơdrong jang kơ jăl jang po, atŭm hăm noh tơgŭm tơtom ăn jăl ah hơla. Vei sơđơ̆ng rah jơnŭm pơgơ̆r jang vei lăng kiơ̆ pơkăp jang 'nao, hơtŏk rah ăn tơdrong iŏk yua mŭk drăm kơtang kơ dêh char mă lei akŏm rah jơhngơ̆m pran ăn jăl jang hơtŏk tơ-iung đơ̆ng rŏng kơnh”.

Đảng ƀô̆, jơnŭm pơgơ̆r tơring păng kon pơlei dêh char Lâm Đồng tŏk bŏk akŏm đei tơdrong tơguăt tơguăl, gơh hơgei, khŏm mă pơjing pơlei pơla roi năr roi pơdrŏng 'lơ̆ng rŏ, gơh hơgei, tơgăl hăm đon lui păng tơdrong hơpơi 'meh đơ̆ng Đảng, đơ̆ng Ƀok Hô.