Til pơgê hrôih pă đei kơtơ̆ng gơglang klel gre kơdou kiơ̆ trong glung 14, trong glung mơ̆t lơ̆m pơlei koĕt koĕl ‘moi kiơ̆ pơbŭng hnam, dôm mir pơgar chehphe, sâu riêng ƀlĭk ƀlăk, pơkao chôh blang ƀrông ƀrang tơ̆ jih trong. "Pơbŭng hnam kơ Kathy” hlôi jing ‘lơ̆ng hơ iă, hăm kung ‘lơ̆ng liĕm atŭm hăm cham ƀĕnh pơkao chôh rang tơbŭk tơbăk. Ƀou phu đơ̆ng hnam gŏ sa roi pơm ăn jơhngơ̆m hưch hanh hloh dơ̆ng.

Pơm keh đang lơ̆m sơnăm 2023, 2 sơnăm ou ki, jô̆ hơtŏ mĭnh sơnăm “Pơbŭng hnam kơ Kathy” sơng đei 200 ‘nu tơmoi, 80% măt bơngai tơmoi ou ‘noh bơngai teh đak đe, lơ hloh ‘noh đơ̆ng teh đak Phalăng, Mi, Anh, Thụy Điển... Tơmoi mơ̆t ngôi păng oei hloi lơ̆m homstay "Pơbŭng hnam  kơ Kathy” gô đei hơrih sa hơdoi hăm kon pơlei bơngai Êđê tơ̆ ou, vang pai sa, năm tơ̆ mir, vang dui brai vai tanh khăn, et tơdrô ge … Mŏ H’Belly chơt hơ iă tơroi:“Tơmoi tôch chơt hơ iă mưh hao gre kŏng nŏng, chă tơmang lăng lơ̆m pơlei, chă lăng đe tôn bơ̆n chĭng chêng, chĭng kham, hơbĕn ao tanh păng hơsoang.Nhôn jang mơdro găh tơmoi ‘noh kla ăn jên, hơnhăk đei iok yoa ‘lơ̆ng hơ iă ăn kon pơlei. Ba hưch hanh hloh kơ yuơ ưh khan jang sa iŏk đei mă oei vei kơjăp păng lang să tơdrong oei sa joăt joe sơ̆ ki kơ hơdrĕch hơdrung.

Mĭnh ‘nu tơmoi đơ̆ng Indonesia dreng ngôi pơlei ƀuôn Tuor păng homstay kơ mŏ Belly tơbăt jơhngơ̆m đon chơt hơ iă:“ ‘Nou ‘măng mă blŭng ĭnh năm tơmang Việt Nam. Tơdrong ĭnh hơ iă hloh ‘noh ưh khan ‘năr rơngơp ‘lơ̆ng, mă lei tơdrong hơrih sa kơ kon pơlei tơ̆ ou tôch gơh găt. Tơdrong hơrih sa ưh kơ gan rơ ông rơ ang, hơ iă dêh. Dôm ‘nhĕm ‘nhot ‘lơ̆ng liĕm chrih kơ măt, tơroi tơbăt găh bơngai Êđê, truh mĭnh năr chă tôn reh tơmam drăm tôn reh kon kông ‘noh, ba hơ iă dêh.

Tơmoi jei ba dôm tơdrong hle ăn kơ mŏ Belly hăm kon pơlei lơ̆m pơlei. ‘Noh tơdrong chă pơjoăt ăn đe hơ ioh pơdơ̆h iok yoa điên thoăi đơ̆ng mĭnh ‘nu bơngai mĕ kơ bơngai Phalăng; ‘noh tơdrong chă pơma dơnuh dih băl kơ ‘năr đơ̆ng tơmoi teh đak Anh ... Hlôi hlôh vao pơma nơ̆r Phalăng, mŏ Belly ưh kơ ‘nhoen chă hŏk pơhrăm dơ̆ng nơ̆r teh đak đe nhen nơ̆r Anh, nơ̆r Anh Mi, nơ̆r Thụy Điển vă gơ̆h pơjing tuor kiơ̆ tơdrong ‘meh vă đơ̆ng tơmoi, chă pơma dơnuh hăm tơmoi lơ hloh dơ̆ng găh tơdrong oei sa joăt joe kơ hơdrĕch hơdrung kơ dih. Hăm kon pơlei pơla kơ dih, mŏ H Belly pơchoh trong ăn kon pơlei hưch hanh, tơklep kơjăp hăm dôm tơdrong jang joăt joe đơ̆ng sơ̆ ki: “Ba ‘meh vă pơtrŭt kon pơlei dui brai vai tanh khăn, pai tơdrô ge, tôn ching chêng. Ba gô jing bơngai tơm chă răt iŏk dôm tơmam drăm ‘noh vă pơvih pơvăn ăn tơmoi. Mưh đei lơ tơmoi truh, ba gô atŭm hăm kon pơlei chă pơvih pơvăn. Tơdrong ƀôh tơmoi đơ̆ng Phalăng, Mi dreng ngôi jei hlôi pơm ăn kon pơlei bơ̆n chơt hơ iă hloh bơih. Mưh ƀôh tơmoi teh đak đe đơ̆ng Phalăng, rim teh đak châu Âu truh chă răt hơbĕn ao tanh, ‘nhot plei ‘long, tơmam drăm pơsư̆, kon pơlei hlôi lui ba pơma tơpă. Đơ̆ng noh kon pơlei mă ƀôh hơdăh kơdih ba jei jing bơngai hơlam lơ̆m tơbăt hơdăh tơdrong oei sa kơ hơdrĕch hơdrung bơ̆n”.

Dôm khul tơmoi năm truh roi năr roi lơ, hơnhăk ba jơhngơ̆m đon ‘meh vă hlôh vao păng lui yom tơdrong oei sa joăt joe ‘lơ̆ng hơ iă, pơjing đei jơhngơ̆m đon hưch hanh hơmanh bơnê kơ kon pơlei Êđê ƀuôn Tuor. Đei dơ̆ng pơbŭng hnam pơtăm đei tơ iung pơjing, ming hơmet vă pơ yoa ăn tơdrong jang tơmang pơhiơ̆; rim gơmăng hơnơ̆ng pơgơ̆r tôn chĭng chêng, joh hơri atŭm dih băl kơ tơmoi hăm kon pơlei. Yă H Drian Niê, 80 sơnăm, chơt hơ iă hăm dôm tơdrong tơplih kơ pơlei, yă pơma: “Ba hơ iă dêh mưh ƀôh roi năr roi đei lơ tơmoi năm tơ̆ pơlei, pơ đĭ lơ̆m teh đak păng teh đak đe năm tơ̆ Ƀuôn Tuôr. Đe sư ưh khan lăp hưch hanh hăm tơdrong hơrih sa chơt hiôk tơ̆ ou mă oei lŭ lăp hăm ‘nhot sa bơ̆n chă phĕ đơ̆ng mir dơ̆ng. Ba Ƀuôn Tuôr roi năr roi atŏk tơ iung păng hơvơn đei lơ tơmoi truh, tơdrong chă pơma dơnuh hăm nơ̆r Anh, nơ̆r Phalăng ‘noh jĭ tôch gĭt kăl. Hơpơi đe kôn mon kon sou hơdrin chă hŏk pơhrăm nơ̆r teh đak đe hloh dơ̆ng. Tơdrong mă ou gô tơgŭm ăn bơ̆n gô hơvơn đei lơ tơmoi teh đak đe truh, ba ƀuôn Tuôr jing mĭnh pơlei truh ‘lơ̆ng hơ iă hloh dơ̆ng.”