Hăm mŏ Phạm Thị Thu Hằng oei tơ̆ phuơng Tân Lập, dêh char Dak Lăk, dôm tơmam drăm gĭt kăl kơ dêh char ‘noh nhen: chehphe, krô̆i hroi, plei ƀơ, ưh khan lăp tơmam choh jang sa-tơmam sa. Bơngai tơchăr pơm phơ̆m Pơ Lang hlôi pơjing ăn dôm tơmam drăm choh jang sa, tơmam sa gĭt kăl ‘noh đei tơdrong hle-vei lăng năng tông muh măt ‘lơ̆ng. Đơ̆ng rŏng 5 sơnăm jô̆ đơ̆ng pơjing tơdrong jang, mŏ hlôi chă tơchĕng-pơm tơlĕch đei 11 tơmam phơ̆m đơ̆ng tơmam drăm choh jang sa gĭt kăl kơ pơlei pơla, đei tơmoi răt yoa lơ. Mŏ Phạm Thị Thu Hằng sơkơ̆t hơdăh, ‘moi kiơ̆ dôm tơmam drăm đei lơ̆m tơring gô jing tơdrong rơvơn ăn tơpôl pơjing tơdrong jang sa:“Atŏk tơ iung rim tơmam drăm pơm tơlĕch ‘lơ̆ng đơ̆ng tơmam choh jang sa lơ̆m tơring păng lăng truh tơmam drăm rơgoh ‘lơ̆ng, pơm tơlĕch ‘lơ̆ng, iŏk yoa ‘lơ̆ng. Lơ̆m khei ‘năr pơjing tơdrong jang kơ nhôn ‘noh kiơ̆ kơ nhôn ‘nou jĭ mĭnh trong iung jang kăl hloh păng ‘moi kiơ̆ rim trong tơgŭm djru đơ̆ng hơnih mơdro sa pơjing đei ƀơm ‘lơ̆ng truh tơpôl adoi nhen hơnih mơdro sa ‘lơ̆ng, jang sa ‘lơ̆ng, jơnei ‘lơ̆ng”.

Hăm bơngai drŏ kăn Raglai, K’Ho păng Chăm oei tơ̆ tơring Phan Sơn, dêh char Lâm Đồng ‘nhĕm ‘nhot Kataya ‘noh jĭ ‘nhĕm ‘nhot joăt joe kơ kon pơlei. Mă lei hăm mŏ Tạ Huyền Thuật, ‘nou jĭ hơnih gơnang gĭt kăl hloh ăn pơjing tơdrong jang sa. Jei oei iŏk yoa găh ka, ƀoh đơ̆ng đak dơsĭ, khul kơ mŏ Thuật pai hrou hla ‘nhot, hla ‘long pơgang kơ tơring; hơmet ming tơdrong ƀăt, pơm hơmet măt lăng ‘lơ̆ng, vă đei jing tơmam drăm yoa đei tĕch răt jơ̆p jang. Mŏ Tạ Huyền Thuật tơroi tơbăt, Kataya tơdrong joăt joe dang ei hlôi tơplih ‘nao đei jing hơnăn tơmam drăm ‘lơ̆ng, hơnhăk đei iŏk yoa kơjăp.“Tơmam sa kơ nhôn ƀou phu tru hut kơ bri kông, kơ yuơ nhôn chă phĕ dôm hla ‘long pơgang đơ̆ng bri vă pai ‘nhot sa. ‘Nhôn krao ‘noh jĭ “ ‘Nhĕm ‘nhot bri kông-jơhngơ̆m đon kon pơlei”. Kơ yuơ tơmam sa aou, lơ pơmai oh drŏ kăn, mă kăl rim đe mĕ tŏk bŏk rong ‘me kon oei ‘lơ̆p sơ̆ ưh kơ đei tơdrong jang sơđơ̆ng, dang ei hlôi đei tơdrong jang sa sơđơ̆ng, lui dơ̆ng tơ̆ hơnăp păng đei rơvơn atŏk tơ iung đunh đai tai sơnăm”.

Adoi nhen lơ̆m tơdrong jang trong nơnăm, dôm trong teh tŏk bŏk đei ming man păng pơprŏ tơ iung pơjing đei trong glung ‘lơ̆ng, dôm tơmam drăm lơ̆m tơring tơ̆ Dak Lăk jei đei kon pơlei pơjing tơdrong jang proh hơmet, atŏk tơ iung đei jing hơnăn. ‘Nhŏng Lê Anh Thông, mĭnh starup hăm tơmam drăm ‘nhĕm rơmo-iĕr tơ̆ tơring Sơn Hòa akhan, rơmo hmă, iĕr hmă jei gô đei jing tơdrong kăp gĭt hơnhăk iŏk yoa kơjăp tơdăh đei proh hơmet trong jang trŏ lăp. Mă lei vă pơjing đei hơnăn ‘nao, kăl đei tôm kon jên jang, kon tơrong, kon kơlap păng bơngai jang: “Găh mơmat tat hloh hrei ou ‘noh ưh kơ măh kon jên jang, tơchă iŏk đei tơdrong tơgum djru choh jang sa oei mơmat tat; mă ƀar ‘noh ưh kơ gan đei bơngai vang iung jang hơdoi. Ĭnh hơpơi ‘meh vă Teh đak lăng ba tơgŭm djru kon jên jang sa, tơƀôh tơbăt tơmam drăm lơ̆m rim tơdrong rapor pơdăh tivi tơring, adoi pơjing rơvơn vă iung jang akŏm, đei dơ̆ng lơ ŭnh hnam vang mơ̆t jang, tơgop atŏk tơ iung mŭk drăm kơjăp ‘lơ̆ng ăn tơring.”

Tơring Tŏk bŏk  – Tây Nguyên, tơring teh hăm lơ tơdrong joh ayŏ, lơ mŭk drăm bri – đak dơsĭ, tŏk bŏk đei hơtŏk hăm kơ̆l 'ngok hơgei, tơdrong hơpơi pơm pơdrŏng, vei răk tơƀăk mong joh ayŏ păng vei lăng 'lơ̆ng cham char. Dôm tơmam drăm phơ̆m pik đei pơm đơ̆ng plei ƀơ, ka peh Kataya dah mă 'nhĕm rơmo sơ̆k kro... ăn ƀôh mưh băt tơguăt tơdrong hlôh vao hăm tơdrong đei kơ tơring, dôm tơdrong kăp gĭt juăt jue gơh pơjing đei tơmam drăm tĕch răt ah chăl 'nao dang ei, păng gơh tĕch tơlĕch lơ̆m tơring.