VOV4.Bahnar - Vă hơlen dôm tơdrong rơvơn, tơnap tap, pơma dơnŭh trong hơmet ming, pơgĕnh tơdrong rơvơn vă vei kơ jăp atŏk tơ iung sơđơ̆ng hơnĭh jang hơdang lơ̆m khei ‘năr hle, pơgê năr 16/7, tơ̆ Hà Nội, Dơnŏ anĭh tơm vei lăng Chŏh jang sa păng Atŏk tơ iung chŏh jang sa pơgơ̆r hop akŏm trư̆k tuyên găh “Trong atŏk tơ iung hơnĭh jang hơdang sơnăm 2021 păng tơlĕch jang kiơ̆ Tơdrong tơchơ̆t đơ̆ng Thủ tướng Tĕh đak găh Kĭ tơchơ̆t Trong jang kăl atŏk tơ iung ka hơdang Việt Nam trŭh sơnăm 2030, lăng trŭh sơnăm 2045”. Lơ̆m 6 khei blŭng sơnăm au, hơdang đak tơnglêu iŏk đei 371.000 tân, tŏk 12% pơtêng hăm khei au sơnăm 2020. ‘Ngoăih tơdrong iŏk đei jơnei, hơlen atŭm găh hơnĭh jang hơdang Việt Nam đei ƀô̆h, oei tơ jră mŭh măt hăm tơnap tap păng tơdrong long, tơdrong jĭ hơbŭh Covid-19 păng pơjei dĭh băl mơdro sa jei tôch mơmat tat. Tơlĕch jang Trong jang kăl atŏk tơ iung ka hơdang Việt Nam trŭh sơnăm 2030, lăng trŭh sơnăm 2045 hlôi đei Thủ tướng tĕh đak kĭ tơchơ̆t gô yak trŭh trong jang atŏk đei jơnei kơ jăp 3% trŭh 4% lơ̆m sơnăm; akŏp rôp iŏk đei 9 trĭu tân 8 tă; tĕch mơdro tơ̆ tĕh đak đe iŏk đei đơ̆ng 14 trŭh 16 ti dolar păng tơmơ̆t ăn hlŏh 3 trŭh 500.000 ‘nu bơngai jang.

Tơblơ̆ nơ̆r: Amazưt