Tơ̆ tơring kon pơlei kon kông, teh oei, teh choh jang sa păng tơdrong jang oei jing dôm tơdrong đei kon pơlei, bơngai tăh hla tôch kơ bơngơ̆t truh. Bơngai tăh hla Puih Kơk, oei tơ̆ plei Ia Grăng 1, xăh Ia Grai, dêh char Gia Lai, ‘meh Teh đak đei tơdrong jang tơgŭm trŏ lăp hăm dôm unh hnam mơmat tat.

“ ‘Meh teh đak bơngơ̆t truh teh oei păng teh choh jang sa kơ kon pơlei, tơgŭm hơdrol ăn dôm bơngai đei tơdrong hơrih sa mơmat tat dêh hloh, pơjing tơdrong jang tơ̆ hnam, tơ̆ pơlei vă hưtŏk tơiung mŭk drăm tơring”.

Kŭm hăm tơdrong bơngơ̆t truh găh tơdrong jang sa, bơngai tăh hla Rơ Mah Nhiên, oei tơ̆ plei Ia Răng 2, xăh Ia Grai, ‘meh đei dơ̆ng tơdrong jang kơtă anih, pơm dă ƀiơ̆ kơ tơdrong bơngai jang mơlôh athei năm jang hơtăih.

“Tơdrong jang tơ̆ tơring ưh kơ đei, đe buăl mơlôh tơ̆ Gia Lai năm jang hơtăih tôch kơ lơ, tơdrong jang kơtă hơnih ưh kơ đei. ‘Meh Đảng, Teh đak bơngơ̆t truh hloh ƀiơ̆ truh tơdrong ‘nâu vă tơgŭm kon pơlei hơtŏk tơiung mŭk drăm tơ̆ hơnăp kơnh”.

Bơngai tăh hla Ndong Brừm, bơngai K’Ho tơ̆ xăh Đam Rông 3, dêh char Lâm Đồng, hơmĕng Quốc hội tơgŭm hơdrol jên hơtŏk tơiung tơring kon pơlei kon kông, mă loi ‘noh jĭ anih jang kăl păng dôm tơdrong jang tơgŭm tơdrong jang sa.

“‘Meh Quốc hội bơngơ̆t truh tơmơ̆t jên jang trong nơnăm, pơgang, pơtho pơhrăm păng tơgŭm tơdrong jang sa ăn kon pơlei; klăh song jên trŏ lăp vă pơm tơjê̆ tơdrong hơtŏk tơiung đơ̆ng rim tơring, tơgŭm kon pơlei klăih đơ̆ng dơnuh hin kơjăp”.

Dôm nơ̆r tơgop đơ̆ng tơring kŭm tơlĕch ăn athei jang pơkeh tơdrong jang tơgŭm teh, vei sơđơ̆ng tơdrong đei yua trŏ lăp đơ̆ng kon pơlei păng hơmet pơ ‘lơ̆ng tơdrong tơhlăk lơ̆m kơplăh bơ̆jang. Bơngai tăh hla H Nhip BKrông, bơngai Ê Đê tơ̆ plei Cuôr, xăh Ea M’Droh, dêh char Đắk Lắk, ‘meh jăh hơmet pơ ‘lơ̆ng pơm hla ar tơklăh hla ar teh vă sơđơ̆ng jang sa.

“Mĕ ƀă chĕng ăn kơ inh 4 sào teh jê̆ anih jang xăh vă jang sa, mă lei truh dang ei oei tam mă klăih đei hla ar teh, Inh ‘meh đei hơmet pơ ‘lơ̆ng hla ar vă teh dơ̆ng hơnăn kơdih, sơđơ̆ng jơhngơ̆m jang sa”.

Ƀok Phạm Thanh Liêm, Kơdră Anih vei lăng kon pơlei tơring gĭt kăl Trường Sa, dêh char Khánh Hòa, athei hơnơ̆ng jang pơkeh tơdrong jang tơgŭm hơtŏk tơiung mŭk drăm đak dơsĭ păng trong jang tơgŭm hơdrô̆ ăn tơring achon đak dơsĭ.

“‘Meh Quốc hội hơnơ̆ng jang pơkeh tơdrong jang tơgŭm hơtŏk tơiung mŭk drăm đak dơsĭ, tơgŭm kon pơlei jang ka, tơmơ̆t jên jang anih jang tơgŭm tơdrong jang ka. Hơdrô̆ hăm tơring gĭt kăl Trường Sa, ‘meh vă Quốc hội hơnơ̆ng bơngơ̆t truh, jang đang tơdrong jang tơgŭm hơdrô̆ vă sơng đei jên ming man anih jang kăl, pơyua ăn hơtŏk tơiung mŭk drăm - tơpôl tơklep hăm hơmet ming khŭl linh, vei sơđơ̆ng”.

Bơngai Tây Nguyên – Nam Trung Bộ ‘meh vă, iŏk yua đơ̆ng ‘măng hop akŏm ưh khan lăp tơ̆ kơsô̆ hla ar đei tơlĕch ăn, mă oei tơ̆ tơdrong pơm hiôk jên jang, pơjing tơdrong jang sa kơjăp păng tơplih ‘lơ̆ng tơdrong hơrih sa kon pơlei.