'Nao hŏk đang kao đẳng mă lei tam mă chă đei tơdrong jang trŏ ƀlep, pơmai H’Đoái Byă, tơ̆ pơlei Ê Rang, phương Thành Nhất, dêh char Đăk Lăk hlôi chih măt hŏk lăm sơ kâ̆p Ki thuơ̆t pai tơmam xa kơyuơ tơring pơih. Pơmai H’Đoái sơkơ̆t hơdah ou jĭ tơdrong pơhrăm atăm, jing hloi trong pơtơm tơdrong jang mưh tam mă chă tơdrong jang trŏ nhen tơdrong hlôi đei hŏk:  “Dôm lăm hŏk thoi ou akŏm lơ tơdrong kăl păng pơtho tơnăp hloh, ning mônh kơnh đei băt lơ tơdrong hloh gah 'nhot xa, hlôh vao hơdah hloh gah trong pai xa, pơ-'lơ̆ng tơmam drăm xa. Inh hơpơi 'meh ah hŏk đang 'măng khuă ou 'noh gơh năm jang tơ̆ dôm nhà hàng dah mă kŏng ti”.

Pơmai H’Đoái Byă jĭ minh lơ̆m 60 bơngai hŏk kon kông năm hŏk lăm sơ kâ̆p Kih thuơ̆t pai xa kơyuơ Hơnih vei lăng kon pơlei phương Thành Nhất jang atŭm hăm Hnam trưng Kao đẳng Buôn Ma Thuột pơgơ̆r. Lơ̆m 2 khei, bơngai hŏk đei hŏk gah dôm tơdrong pai xa, vei lăng tơmam drăm xa, vei rơgoh 'lơ̆ng tơmam xa păng pơrŏ tơmam xa.

Kiơ̆ kơ ƀok Nguyễn Hữu Luật, Phŏ Kơdră Hơnih juăt jang kơ Hơnih vei lăng kon pơlei phương Thành Nhất, dêh char Đăk Lăk 'noh, lăm hŏk đei pơtơm kiơ̆ Tơdrong pơkăp jang 3, Tơdrong jang 5 gah hơtŏk pơtho tơdrong jang păng asong tơdrong jang ăn bơngai jang tơ̆ tơring kon kông păng groi kông. 'Nou jĭ lăm pơtho tơdrong jang mă blŭng phương pơtơm đơ̆ng jên asong jang kơ sơnăm 2026 đơ̆ng rŏng kơ pơtơm jơnŭm pơgơ̆r tơring 2 tăl. Tơdrong chă rơih tơdrong jang đei tơring kiơ̆ kơ tơdrong kăl đơ̆ng kon pơlei păng tơdrong gơh jang đơ̆ng rŏng kơ hŏk tơdrong jang. Dôm lăm đơ̆ng rŏng duh gô đei hơlen lăng vă pơtrŏ hloh hăm tơdrong kăl pơm jang dang ei: “Phương Thành Nhất kŭm pơtoi pơih lăm pơtho tơdrong jang trŏ ƀlep hăm tơdrong kăl dang ei vă tơgŭm ăn kon pơlei băt hơdah gah chă tơdrong jang trŏ ƀlep, vă đơ̆ng noh kon pơlei kŭm nhen bơngai hŏk gơh rơih minh tơdrong jang đei xa yua vă pơvih ăn tơdrong hơrih xa”.

Pơtơm Tơdrong jang pơkăp 3 lơ̆m Tơdrong jang 5 lơ̆m Tơdrong tơchơ̆t jang kơ teh đak 1719, rim tơring tơ̆ Đăk Lăk pơtoi chă hơlen lăng tơdrong kăl, jang hơdoi hăm hơnih pơtho tơdrong jang pơih lăm hŏk trŏ ƀlep hăm rim khul bơngai jang. Tơdrong pơtho pơm jang ưh hơdrô̆ pơdơh ah pơtho hlôh vao, mă roi tơguăt hloh hăm tơdrong gơh chă đei tơdrong jang, kơdih pơjing tơdrong jang ăn kơ po păng đei xa yua đơ̆ng rŏng kơ hŏk đang.

Tơ̆ phương Tân An, pơmai H’Ju Êban, oei tơ̆ pơlei Kmrơng Prŏng, hlôi pơih đei hơnih pơm guăng tơ̆ pơlei đơ̆ng rŏng kơ hŏk đang lăm pơguăng muh măt hơkou jăn kơyuơ tơring pơgơ̆r. Dang ei pơmai H’Ju hlôi đei yua sơđơ̆ng bơih: “Inh đei hŏk lăm gah make-up kơyuơ phương Tân An pơgơ̆r. Pơtơm đơ̆ng blŭng sơnăm 2026 inh pơih hơnih pơm guăng, tơdrong jang ou asong ăn kơ unh hnam inh đei xa yua sơđơ̆ng hloh”.

Pơm kiơ̆ dôm tơchơ̆t tơlĕch jang kơ teh đak gah tơjur hin dơnuh, pơjing tơring tơrang 'nao păng hơtŏk mŭk drăm – tơpôl tơ̆ tơring kon pơlei kon kông đơ̆ng sơnăm 2016-2024, dêh char Đăk Lăk hlôi pơtho tơdrong jang ah jăl sơ kâ̆p ăn hloh 34.000 bơngai jang tơ̆ tơring. Đơ̆ng rŏng hơgrop, sơnăm 2025 đei pơhlom 5.400 bơngai jang pơtoi đei hŏk. Truh hơtuch sơnăm 2025, kơsô̆ bơngai jang đei hŏk tơdrong jang tơ̆ tơring đei truh 70%, lơ̆m noh 27% đei ƀăng, hla bar pơkăp tơdrong jang.

Vă dôm lăm pơtho tơdrong jang lơ̆m tŏ sĕt khei năr gơh chă đei tơdrong jang hiôk hian hloh, tơdrong pơtho athei hơlen lăng truh tơdrong kăl yua bơngai jang đơ̆ng rŏng kơ hŏk đang. Hăm rim hơnih pơtho tơdrong jang, khei năr pơtho gơh pơm kơđeh mă lei gah tơdrong pơhrăm jang đei tơrĕk hloh vă bơngai hŏk gơh hrôih iŏk yua dôm tơdrong đei hŏk.

Ƀok Trần Quốc Cường, Phŏ Kơdră Hnam trưng Kao đẳng Buôn Ma Thuột, dêh char Đăk Lăk ăn tơbăt, đơ̆ng rŏng kơ sơđơ̆ng jơnŭm pơgơ̆r, hnam trưng pơtoi jang atŭm hăm rim tơring chă hơlen lăng tơdrong kăl, pơih lăm pơtho tơdrong jang mă trŏ ƀlep hăm tơdrong kăl kơ tơring: “Tơrĕk truh tơdrong kăl lơ̆m tơpôl, dang ei hơnih jang mŭk drăm tŏk bŏk oei kăl yă kiơ, tơpôl oei kăl dôm tơdrong jang ayơ, noh hnam trưng gô jang hơdoi hăm hơnih vei lăng kon pơlei rim xah, phương vă chă pơtho, tơgŭm ăn bơngai hŏk đei hŏk lơ̆m tŏ sĕt khei năr mă lei akŏm tôm tơdrong kăl kơ jang, hơnơ̆ng noh hŏk đơ̆ng 3-6 khei. Nhôn gô akŏm pơhrăm lơ̆m 2 khei đĕch, vă tơgŭm ăn bơngai jang ah hŏk đang noh gơh năm jang hloi mă tơring oei kăl dang ei”.

Kiơ̆ Tơchơ̆t tơplih 'nao, hơtŏk 'lơ̆ng tơdrong pơtho pơm jang tơ̆ tơring pơsĕl truh sơnăm 2030, Đăk Lăk tơlĕch ăn rim sơnăm pơtho tơdrong jang ăn pơhlom 10.000 'nu bơngai jang tơ̆ tơring pơsĕl, kơsô̆ bơngai đei tơdrong jang đơ̆ng rŏng kơ hŏk noh hloh 85%; asong ăn hơdrol hăm bơngai jang tơ̆ tơring kon kông, tơring hơtaih yaih.

Ƀok Nguyễn Quang Thuân, Phŏ Kơdră Hơnih jang Nô̆i vŭ dêh char Đăk Lăk akhan, vă tơchơ̆t jang ou gơh đei yua tơnăp, tơdrong tơroh đơ̆ng hơnih pơtho tơdrong jang păng hơnih iŏk yua bơngai jang đei sơkơ̆t hơdah jĭ minh tơdrong kăp gĭt hloh:  “Rim hnam trưng, hơnih pơtho tơdrong jang athei jang atŭm hăm hơnih jang mŭk drăm, tơguăt hăm hơnih jang mŭk drăm lơ̆m păng 'nguaih kơ dêh char, phơ phŏ 'noh hăm hơnih jang mŭk drăm teh đak đe hloi, vă hơtŏk 'lơ̆ng tơdrong pơtho pơm jang, kŭm nhen pơtho tơdrong jang ăn đe hŏk tro, sinh viên; vă đơ̆ng rŏng kơ đei bằng, hla bơ-ar pơkăp jang, đe oh gơh chă đei tơdrong jang, ưh đei chă pơtho jang dơ̆ng hăm rim hơnih jang mŭk drăm”.

Minh lăm hŏk tơdrong jang lơ̆m minh ƀar khei, mă lei tơdrong kăp gĭt ưh đei pơdơh ah hla bar pơkăp đĕch. Tơdrong kăp gĭt hloh noh bơngai hŏk gơh chă đei tơdrong jang, gơh pơjing tơdrong jang ăn kơdih po păng đei xa yua đơ̆ng noh. Ah tơdrong jang đei rơih trŏ hăm tơdrong kăl noh tơdrong pơtho pơm jang đơ̆ng tơdrong tơchơ̆t jang kơ teh đak pơtơm đei tơmơ̆t lơ̆m tơdrong hơrih, pơih đei trong hiôk vă kon pơlei, mă kăl noh kon pơlei kon kông, kơchăng gơh hơtŏk tơ-iung.