Đơ̆ng rŏng kơ hơmet ‘lơ̆ng bơ̆n tơmam săng sa lơ̆m kơƀang chih nhôm, anih jang kơpal đŏk đei chư chih: “LINH LÔCH TANG ĂN TEH ĐAK - NGUYỄN THANH TRÌ - LÔCH 18/5/70”, kiơ̆ đơ̆ng noh băt hơdăh đei hơnăn linh lôch tang ăn teh đak Nguyễn Thanh Trì. Thoi noh, jô̆ truh dang ei Khŭl K52 hlôi iŏk akŏm đei 6 kơting linh lôch tang ăn teh đak tơ̆ hơnih mir điều tơ̆ plei Bi, xăh Ia Dom.

Lơ̆m kơsô̆ âu, 1 kơting hlôi băt hơdăh đei hơnăn ‘noh linh lôch tang ăn teh đak Nguyễn Thanh Trì; 5 kơting linh lôch tang ăn teh đak uơ oei dơ̆ng tam mă băt hơdăh đei hơnăn. Anih pơgơ̆r jang sir tơchă, kôch iŏk akŏm păng băt hơdăh hơnăn linh lôch tang ăn teh đak dêh char Gia Lai ‘meh vă dôm đe linh so, bôl buăl, anih jang păng kon pơlei chă tơroi, tơbăt ƀơm truh linh lôch tang ăn teh đak Nguyễn Thanh Trì păng unh hnam, tơgop băt hơdăh tơdrong kơtơ̆ng ang, jăh tơchă đei unh hnam linh lôch tang ăn teh đak.