Ƀât tŏk bŏk khei 10, mŏ Bàn Mùi Diết, bơngai Dao, oei tơ̆ thôn 12, xăh sơlam Ia Rvê, đei măt đơ̆ng hrôih tơ̆ anih jang kơ Anih vei lăng kon pơlei xăh vă ƀŏk hla ar iŏk teh oei. Klo năm jang tơ̆ teh đak đe, mŏ oei tơ̆ hnam vei rong 2 'nu kon hơ 'lơ̆p. Hnam mŏ oei arih xa dang ei chă pơm pơgia lơ̆m teh mĕ ƀă. Tơdrong arih xa gơnơm đơ̆ng pơtăm 'nhot, rong iĕr, iŏk yoa ưh đei sơđơ̆ng kiơ. Yoa thoi noh, tơdrong đei chĕng song teh oei âu pơm ăn mŏ ưh kơ kĕ ôn jơhngâm đon čhôk ‘nă: "Ĭnh tôch hơiă, mưh đei teh đak chĕng song ăn teh oei, teh choh jang xa thoi âu, ĭnh hơiă dêh păng bơnê kơ Teh đak tôch lơ".

Kŭm hăm tơdrong chơt hơ iă ‘noh, ƀok Đặng Tòn San tơ̆ thôn 13, vă jê̆ 10 sơnăm arih xa tơ̆ tơring sơlam Ia Rvê mă lei ŭnh hnam oei tam mă đei teh oei, teh choh jang xa. Vă gơ̆h arih xa, ƀok San hơnơ̆ng năm jang ăn kơ đe tơ̆ jơ̆p tơring. Ƀât Teh đak tơlĕch tơdrong tơgŭm teh, ƀok San gô chang rim năr, hơpơi ‘meh iŏk đei teh, đơ̆ng noh gơ̆h đei tơdrong 'lơ̆ng vă jang xa kơtă tơ̆ tơring: "Adrol sơ̆ inh ưh đei teh, dang ei Teh đak tơgŭm teh ăn mih ma duch nă, bơnê dêh, adrol sơ̆ inh chă jang thuê ăn kơ đe đĕch, dang ei đei teh bơih 'noh vă adrin jang xa kơtă tơ̆ âu hloi."

Hăm dôm unh hnam kon pơlei nhen mŏ Diết, ƀok San, teh oei jĭ tơdrong 'lơ̆ng vă gơ̆h oei xa hiôk sơđơ̆ng; teh choh jang xa jĭ tơmam vă dar deh jang tŏk, tơjur ƀiơ̆ tơdrong chă jang ăn kơ đe kiơ̆ pơyan. Kiơ̆ tơdrong dăr hơlen đơ̆ng xăh sơlam Ia Rvê, lơ̆m xăh đei 155 unh hnam kăl đei tơgŭm teh oei păng pơm ăn hla ar teh. Lơ̆m noh, 92 unh hnam ưh kơmăh teh oei, teh choh jang xa; 6 unh hnam đei teh choh jang xa mă lei tam mă đei teh oei, kŭm hăm lơ unh hnam kăl đei tơgŭm pơm hơmet hla ar teh vă gơ̆h iŏk yoa sơđơ̆ng ‘lơ̆ng.

Pơm kiơ̆ tơdrong Tơchơ̆t kơsô̆ 104 đơ̆ng Thủ tướng teh đak găh atŏk tơiung mŭk drăm - tơpôl hơdai hăm vei kơjăp tơdrong sơđơ̆ng tơpôl tơ̆ tơring Tây Nguyên păng tơdrong Tơchơ̆t kơsô̆ 28 đơ̆ng Jơnŭm pơgơ̆r kon pơlei dêh char Đăk Lăk găh trong tơgŭm teh ăn kon pơlei kon kông, xăh Ia Rvê pơjing trong jang chĕng song teh mă lăp hăm tơdrong ‘mĕh vă tơ̆ yăn âu.

Teh oei, đei chĕng hơmet xă vă jê̆ 8 ha, ‘moi kiơ̆ trong pơlei đơ̆ng thôn 8 truh thôn 10, chĕng pơm 198 lô. Kiơ̆ trong jang, 1 unh hnam đei chĕng song 400 m², lơ̆m noh đei 200 m² teh oei păng 200 m² teh pơtăm 'long rim xơnăm.

Adrol kơ tơlĕch jang, hơnăn dôm ŭnh hnam đei xa yua, hla kak chih tơƀôh teh păng dôm tơdrong hơgăt ƀơm truh đei pơklep hơdăh lơ̆m 15 năr tơ̆ anĭh bơ̆ jang kơ Anĭh vei lăng kon pơlei xăh. Khŭl pơgơ̆r vei lăng kơdĭh tơ̆ dôm pơlei kŭm năm roi tơbăt vă kon pơlei băt, vang tơgop nơ̆r. 'Măng pơgơ̆r ƀŏk hla ar teh ƀât tŏk bŏk khei 10 'măn ăn 28 ŭnh hnam tam mă đei tĕh oei, đei pơgơ̆r rơđăh ‘lơ̆ng hăm tơdrong dơ̆ng lăng đơ̆ng khŭl kơdră tơring, Mặt trận Tổ quốc păng kon pơlei.

Ƀok Nông Văn Gióng, Ƀok pơgơ̆r thôn 4, xăh Ia Rvê, ăn tơbăt lơ̆m 'măng mă blŭng pơm kiơ̆ Tơdrong jang 104, pơlei đei 6 unh hnam đei iŏk teh. 'Nâu jĭ dôm unh hnam đei tơdrong arih xa pơmat tat dêh hlŏh, arih xa tơ̆ tơring lơ sơnăm mă lei tam mă đei teh choh jang xa păng anih oei xa sơđơ̆ng 'lơ̆ng: "Đei tơdrong pơngơ̆t đơ̆ng Đảng păng teh đak, 6 ŭnh hnam kon pơlei âu đei teh đak chĕng song teh 'noh đe sư tôch hơiă. Năr ‘nâu năm iŏk teh, 6 ŭnh hnam lơ̆m plei nhôn iung đơ̆ng hrôih păng năm tôm".

Đei tĕh oei ‘nŏh 'nao lăp hơmet 1 păh tơdrong pơmat tat đĕch. Vă kon pơlei gơ̆h arih xa hiôk sơđơ̆ng tơpă, đei tơdrong ‘lơ̆ng vă jang tŏk klăih đơ̆ng dơnŭh hin, xăh Ia Rvê oei hăt pơm pơkeh hla ar, chĕng hơmet 266 ha tĕh chŏh jang xa tơ̆ dôm thôn 7, 12 păng 13. Kiơ̆ trong vă jang đơ̆ng tơring, 1 ŭnh hnam gô đei chĕng song 1 ha. Kŭm hăm tĕh chŏh jang xa, tơring oei vă tơlĕch lơ trong tơgŭm asong tŏk iŏk jên hăm jên kon tŏ sĕt, pơtho tơƀôh ki thuơ̆t jang, rơ̆ih hơdrĕch tơđăh 'long, kon yŏng mă lăp hăm tŏ 'mi kial păng tơdrong jang xa kơ rim ŭnh hnam.

Ƀok Nguyễn Huy Tiến, Bí thư Đảng xăh Ia Rvê roi tơbăt, tơring vă hơnơ̆ng hơlen năng bơngai, tĕh păng hơtŏk hrĕnh tơdrong jang kiơ̆ tơdrong tơgŭm, hơdai hăm 'nŏh tơmât tơdrong tơgŭm tĕh hăm pơjing tơdrong jang xa ăn kon pơlei: “Tơ̆ hơnăp kơnh, Khul kơdră chĕp kơ̆l Đảng, Anih vei lăng kon pơlei xăh hơnơ̆ng pơtho ăn Anih jang mŭk drăm hơlen lăng vă tơlĕch trong chĕng song teh oei păng teh choh jang xa, tơgŭm ăn kon pơlei đei tơmam jang xa, vang tơgop pơm sơđơ̆ng tơdrong arih tơ̆ tơring sơlam Ia Rvê. Hơdai hăm chĕng song teh, xăh kŭm đei lơ trong jang vă pơjing tơdrong jang xa, tơplih tơdrong jang vă kon pơlei gơ̆h đei tơdrong arih xa hiôk sơđơ̆ng, oei xa đunh đai tơ̆ tơring sơlam."

Đơ̆ng dôm lô teh oei mă blŭng trŭh trong chĕng song tĕh chŏh jang xa, tơdrong tơgŭm teh tơ̆ Ia Rvê oei dar deh yak kiơ̆ trong sek tơlang 'lơ̆ng dôm tơdrong 'mĕh vă tôch tơgăl  đơ̆ng kon pơlei kon kông. Tơdrong đei yoa đơ̆ng tơdrong tơgŭm ư̆h lăp ƀât kơsô̆ ŭnh hnam đei pơjao teh đĕch, mă oei đei lơ̆m tơdrong gơ̆h tơgŭm ăn kon pơlei đei hnam oei sơđơ̆ng ‘lơ̆ng, đei teh, tơmam vă jang xa păng hơnhăk ba iŏk yua đunh đai. 'Nâu kŭm jing tơdrong gĭt kăl vă kon pơlei hơđơ̆ng jơhngơ̆m jang xa, oei xa đunh đai tơ̆ tơring sơlam, vang tơgop ăn tơdrong jang atŏk tơiung mŭk drăm-tơpôl păng vei lăng kơjăp ‘lơ̆ng tơdrong sơđơ̆ng tơ̆ tơring.