Sơnăm 2024, pơmai Y Khương, bơngai Xơ Đăng tơ̆ xah Tu Mơ Rông (dêh char Kon Tum so)  pơ̆n pơtăm pơhlom 6 sào kaphê (chehphe), pơih trong pơm jang 'nao atŭm hăm rong rơmo. Đei tơring tơgŭm ăn hơdrĕch 'long pơtăm trŏ hăm tŏ 'mi kial păng kang ƀô̆ juăt jang pơtho gah kih thuơ̆t, pơgar kaphê kơ unh hnam tŏk giơ̆ng 'lơ̆ng. Tơdrogn kăp gĭt noh đon bơnôh kơchăng hŏk hơlen, pơnam jang xa hăm tơdrong 'meh pơjing trong pơm jang đunh đai. Pơmai Y Khương tơroi:  “Xah tơgŭm ăn tơđah chehphe păng pơtho gah trong pơtăm, vei lăng. Inh hơdrin jang mă 'lơ̆ng vă hơtŏk iŏk yua, đơ̆ng rŏng kơnh pơih să teh pơtăm, tơgŭm kon pơlei lơ̆m thôn băt hơdah gah trong jang xa”.

Mưh nhen pơmai Y Khương rơih kaphê vă hơtŏk tơdrong hơrih, 'noh pơmai Lê Thị Ánh, bơngai Ca Dong, tơ̆ xah Sơn Tây Thượng pơm pơdrŏng đơ̆ng kơdih tơmam choh pơtăm juăt jue. Hăm tơdrong jang Kơdră Hơp tak xah Choh jang xa jang gah bri păng Tĕch pơdro Sơn Bua, pơmai pơgơ̆r pơm tơlĕch tơmam choh pơtăm, hơtŏk kơjă kăp gĭt hăm tơmam drăm păng asong tơdrong jang ăn kon pơlei tơ̆ tơring.

Hơp tak xah pơjing tơring pơtăm prit, asong ming man hnam pơm tơlĕch tơmam drăm, kơmăi kơmŏk vă pơm jang. Tơmam drăm đei pơm đơ̆ng prit noh prit sơ̆k kro, đak sut prit, tơdrô prit; atŭm hăm noh iŏk tơ-'mơ̆ng ôi bri, tơƀăng pơle vă pơjing đi tơmam drăm kăp gĭt kơ bri kông. Truh dang ei, đei 7 tơmam drăm kiơ̆ tơchơ̆t OCOP 3 sao. Pơmai Lê Thị Ánh ăn tơbăt:  “Mă lơ bơngai yua đe băt hơdah tơmam drăm 'lơ̆ng sĭt. Đe lăp chă yua 'noh đe vih hơlơ̆k dơ̆ng. Đơ̆ng tơdrong hơlen băt hơdah noh mă hơp tak xah nhôn ƀôh đei tơdrong pran ou vă pơtoi pơm jang. Ưh hơdrô̆ hăm tơmam drăm hla che tơ-'mơ̆ng ôi mă khei năr ou kơnh hơp tak xah gô pơm tơlĕch tơmam drăm đơ̆ng tơ-'mơ̆ng ôi 'lơ̆ng hloh”.

Pơmai Y Phượng, bơngai Gia Rai, Kơdră thôn Cô Xia, xah Măng Ri, pơjing tơdrong jang mŭk drăm choh pơtăm tơguăt hăm rong kon tơrong. Đơ̆ng rŏng 7 sơnăm jang kơdră thôn, pơmai yuk pơm jang hơlou păng hơvơn kon pơlei jang kiơ̆. Truh dang ei unh hnam pơmai đei 4 hektar teh pơtăm kaphê păng 23 tŏ rơmo. Pơmai Y Phượng tơroi: “Jang hloi kơdră thôn noh inh athei jang hơdrol ăn unh hnam. Sơnăm kơnh, inh gô pơih să teh pơtăm chehphe, pơtăm hloh 1 hectar dơ̆ng. Tơ̆ ou, tơm chehphe chăt sơdrai, mă lei klah sơdrai iơ iĕ đĕch. Inh pơtăm kiơ̆ ki thuơ̆t 'nao. Inh ƀôh tơm chehphe pơyua sơđơ̆ng, trŏ tơdrong tơchơ̆t bơih. Tơ̆ tơring groi kông xah Măng Ri 'noh 'mi lơ, ưh đei ruih lơ đak, da ƀiơ̆ huach jên ăn tơdrong ruih đak. Gơnơm thoi noh, kon pơlei đei yua sơđơ̆ng hloh”. 

Ƀok Phạm Xuân Quang, Kơdră Hơnih vei lăng kon pơlei xah Măng Ri, dêh char Quảng Ngãi ăn tơbăt, tơring hơvơn kon pơlei iŏk yua tơdrong pran gah choh pơtăm nhen kaphê, hơdrĕch 'long pơm pơgang păng dôm tơmam drăm kăp gĭt nai; atŭm hăm noh hơtŏk sơnong jang kơ đe kang ƀô̆, đảng viên lơ̆m hơtŏk jang mŭk drăm vă kon pơlei hŏk hơlen, jang kiơ̆. Lơ̆m noh, tơring tơrĕk kăp gĭt truh sơnong jang kơ đe drăkăn kon kông, pơtrŭt đe pơmai oh găn hloh tơnap tap, pơ̆n tơplih đon tơchĕng, trong pơm jang, brư̆ brư̆ pơgơ̆r lơ tơdrong jang mŭk drăm, hơp tak xah, tơgop hơtŏk iŏk yua, hơtŏk tơdrong hơrih ăn unh hnam păng hơtŏk jang mŭk drăm tơ̆ tơring: “Kang ƀô̆, đảng viên, mă kăl noh bí thư chi bộ păng dôm đảng viên tơm dơnơm kơ rim thôn, pơlei, jĭ dôm bơngai yuk hơlou kiơ̆ pơkăp đảng viên jang hơdrol. Đei tơdrong pơm jang 'lơ̆ng, lơ̆m noh đei tơdrong pơtăm chehphe kơ yă Y Phượng. 'Nou jĭ dôm kang ƀô̆, đảng viên tơnăp lơ̆m tơdrong jang hơtŏk mŭk drăm unh hnam, jing um rup vă kon pơlei lơ̆m thôn, pơlei păng tơring jang kiơ̆, atŭm hơtŏk mŭk drăm”.

Khei năr ou ki, lơ drăkăn kon kông yak hloh tơnap tap, pơm tơm hơnih jang mŭk drăm gơh hơgei tŏk bŏk oei pơjing tơdrong tơplih đơ̆ng kơdih unh hnam păng tơpôl pơlei pơla. Đe sư ưh hơdrô̆ tơplih tơdrong hơrih mă oei pơtho tơdrong hlôh vao, tơ-iung đon lui vă kon pơlei tơplih đon tơchĕng, pơ̆n chă hŏk hơlen păng kơdih chă trong hơtŏk tơ-iung. Tơdrong tơplih đon tơchĕng, trong pơm jang đei tơƀôh hơdah hăm tơdrong iŏk yua tơpă, hơtŏk tơplih đơ̆ng tơdrong jang xa rah rai, kiơ̆ tơdrong hlôh vao jing trong jang kih thuơ̆t, jô̆ hơlen mă hơdah vă asong jang, chă hơnih tĕch tơlĕch sơđơ̆ng ăn tơmam drăm pơm tơlĕch.

Lơ tơdrong jang tơgŭm đơ̆ng teh đak hlôi iŏk yua tơnăp gơnơm tơdrong pơ̆n tơchĕng, pơ̆n pơm jang đơ̆ng kon pơlei. Ah mă drăkăn đei tơrĕk hăm tơdrong tơgŭm, hlôh vao păng trong hiôk, đe sư tơgop jang hơtŏk mŭk drăm unh hnam, atŭm hăm noh iŏk yua sơnong pơgơ̆r jang, vei lăng păng hơtŏk kơjă tơmam choh pơtăm tơ̆ tơring, hơtŏk tơ-iung tôm tơdrong tơ̆ tơring kon pơlei kon kông. Đơ̆ng dôm tơdrong tơplih tơ̆ rim unh hnam, tơdrong kơchăng 'meh hơtŏk tơ-iung tŏk bŏk pơjing trong jang kơjăp ăn tơdrong hơtŏk tơ-iung kơjăp sơđơ̆ng tơ tơring groi kông Quảng Ngãi.