Tơ̆ Kơđông Ƀô̆ đô̆i vei lăng ‘Măng sơlam apŭng plĕnh teh Lệ Thanh, tơdrong jang “Rim giĕng tơgŭm mĭnh ŭnh hnam dơnuh tơring sơlam teh đak” đei tơlĕch jang hăm 52 ‘nu đang viên iŏk vei lăng năng tông 132 ŭnh hnam kon pơlei, găh lơ ‘noh ŭnh hnam dơnuh. Ƀô̆ đô̆i tơgŭm djru năr jang, pơtho ăn kon pơlei vei lăng ‘long pơtăm, hơmet pơ ‘lơ̆ng mir pơgar, pơm hơtŏk jang sa iŏk yoa kơjăp. Mŏ Hi Kri, hơdrung H’rê, ŭnh hnam dơnuh tơ̆ pơlei Bi, tơring Ia Dom, dêh char Gia Lai, jĭ minh lơ̆m dôm bơngai đei ƀô̆ đô̆i vei lăng sơlam teh đak tơgŭm djru. Tơdrong vang yak hơdoi, pơtho tơbăt tơnăp đơ̆ng đe ƀô̆ đô̆i tơgŭm ăn ŭnh hnam mŏ Hi Kri đei dơ̆ng rơvơn jang sa păng hơrih sa.“Chơt dêh, oei hăm ƀô̆ đô̆i ‘noh chơt hơ iă dêh. Oei tơ̆ tơring sơlam teh đak ‘noh ŭnh hnam nhôn jei oei tơjê̆ hăm ƀô̆ đô̆i, ƀô̆ đô̆i tơgŭm ŭnh hnam bơ̆n tôch kơ lơ. Ŭnh hnam bơn tôch bơnê kơ ƀô̆ đô̆i.”

Ưh khan lăp yak hơdoi hăm kon pơlei lơ̆m choh jang sa, kang ƀô̆, ƀô̆ đô̆i Kơđông Ƀô̆ đô̆i vei lăng ‘Măng sơlam Apŭng plĕnh teh Lệ Thangh oei lăng ba kơjăp vei lăng năng tông dôm bơngai đei iok yoa ăn kech mang. Rim khei, hơnih pơgơ̆r năm ngôi, pôk tơmam drăm, khăm jơhngơm jăn păng ƀơk pơgang ăn rim ŭnh hnam lơ̆m tơring. Dôm tơdrong jang ‘lơ̆ng hơ iă hlôi tơgop lơ̆m vei lăng năng tông tơdrong hơrih sa, tơƀôh hơdăh hơnăp jang đơ̆ng khul ƀô̆ đô̆i hăm dôm bơngai đei iok yoa ăn teh đak, tơdrong plang ăn pham lĕch sĕch huŏng ăn Teh đak. Ƀô̆ đô̆i rơka 4/4 Rơ Chăm Nich, oei lơ̆m pơlei Moóc Đen, tơring Ia Dom, ƀôh hơdăh tơdrong tơklep kơjăp ‘noh ‘moi kiơ̆ rim ‘măng đei ƀô̆ đô̆i năm ngôi apĭnh jet gia, tơgŭm djru mưh chă jĭ jăn păng lơ̆m dôm năr lêh, Têt:“Jĭ jăn tơdăh ưh kơtom năm tơ̆ hnam pơgang kơpal lei năm tơ̆ hnam pơgang ƀơ̆t pơlei Bi kơ Ƀô̆ đô̆i vei lăng sơlam teh đak. Đe ‘nhŏng ƀô̆ đô̆i vei lăng sơlam teh đak năr lêh, năr têt jei hơnơ̆ng năm ngôi hăm ŭnh hnam, pôk ăn tơmam drăm. Đe ‘nhŏng oh oei tơ̆ ou bu bu jei ‘mêm kơ eng ngăl.”

Đơ̆ng dôm tơdrong jang hơdăh lơ̆m vei lăng năng tông tơdrong hơrih sa, bơ̆ jang pơrô̆ pơrôp kon pơlei oei tơgop lơ̆m pơm hơtŏk tơgoăt tơgoăl dih băl kơjăp hloh dơ̆ng ƀar păh kon pơlei hăm khul bơ̆ jang vei lăng sơlam teh đak. Đại úy Trần Tuấn Linh, Chính trị viên kơ iĕng Kơdră Kơđông Ƀô̆ đô̆i vei lăng ‘Măng sơlam Apŭng plĕnh teh Lệ Thanh tơbăt, hơnih tơlĕch lơ tơdrong jang lăng truh tơring nhen ming man hnam ‘mêm mơnat, hnam tơgoăt tơgoăl, năm ngôi hăm ŭnh hnam đei iŏk yoa ăn teh đak, tơgŭm djru kon jên jang sa păng kih thuơ̆t atŏk tơ iung mŭk drăm. Đơ̆ng noh, kon pơlei đei dơ̆ng rơvơn sơđơ̆ng hơrih sa, adoi pơm hơtŏk jơhngơ̆m đon hlôi vao, hơnăp jang lơ̆m vang iung jang vei lăng năng tông sơđơ̆ng dơ̆ng kơjăp lơ̆m tơring.“Hloh đơ̆ng rim trong jang tơgŭm kon pơlei atok tơ iung mŭk drăm ‘noh kon pơlei lơ̆m tơring sơlam teh đak jei hlôi lui kơjăp hăm Ƀô̆ đô̆i vei lăng sơlam teh đak. Mă kăl atŭm hăm ƀô̆ đô̆i vei lăng sơlam teh đak nhen lĕ mĭnh “Jrăng hơrih” jang sa, chă yak vih vơ̆t tơring sơlam teh đak ‘noh iung jang hơdoi hăm Ƀô̆ đô̆i vei lăng sơlam teh đak, khul bơ̆jang lơ̆m tơring ‘măng sơlam teh đak vei lăng sơđơ̆ng dơ̆ng kơjăp tơpôl.”

‘Moi kiơ̆ prăt tơring sơlam teh đak dêh char Gia Lai, bơ̆ jang vei lăng năng tông tơdrong hơrih sa kơ kon pơlei ling lang tơklep kơjăp hăm tơdrong jang pơrô̆ pơrôp kon pơlei vang iung jang vei lăng trong sơlam teh đak, jrăng sơlam teh đak. Tơ̆ Kơđông ƀô̆ đô̆i vei lăng sơlam teh đak Ia Puch, kang ƀô̆, ƀô̆ đô̆i hơnơ̆ng jang hơdoi hăm Khul kơdră chĕp pơgơ̆r Đảng, kơdră chĕp pơgơ̆r tơring păng dôm bơngai đei kon pơlei lui yom chă pơrô̆ pơrôp, hơvơn kon pơlei pơm hơtŏk jơhngơ̆m đon kơchăng, vang iung jang vei lăng năng tông sơđơ̆ng. Trung tá Nguyễn Đăng Dũng, Khul Pơrô̆ pơrôp kon pơlei Kơđông Ƀô̆ đô̆i vei lăng sơlam teh đak Ia Puch tơbăt:“Tơdrong jang rim năr ‘noh hơnơ̆ng jur năm hơlen băt hơdăh dôm tơdrong hăm kon pơlei, đơ̆ng noh pơchoh trong ăn kră pơlei, thôn trơng hơpơi ‘meh vă kon pơlei vang iung jang hơdoi hăm kơdră Đảng, kơdră tơring păng kang ƀô̆, ƀô̆ đô̆i kơđông ƀô̆ đô̆i vei lăng sơlam teh đak ‘noh vei lăng sơđơ̆ng dơ̆ng kơjăp, pơrô̆ pơrôp kon pơlei hơdrin jang sa.”

Atŭm hăm tơdrong tơklep kơjăp găm kon pơlei, hơlen băt hơdăh tơring, rim tơdrong jang “Yak hơdoi hăm oh năm tơ̆ hnam trương”, “Kon mŏm ƀô̆ đô̆i vei lăng sơlam teh đak”, “Pơbŭng hnam tơnŏ tơring sơlam teh đak” păng bơ̆ jang năm ngôi, tơgŭm djru kon pơlei lơ̆m năr lêh, Têt hơnơ̆ng tơgop jang kiơ̆ ‘lơ̆ng trong bơ̆ jang tơgŭm djru vei lăng tơdrong hơrih sa tơpôl, vei lăng năng tông jơhnơr mơlôh păng dôm ŭnh hnam tơnap tap. Yă Siu H’Ler, Bí thư Đảng ủy, Kơdră chĕp pơgơ̆r Jơnŭm vei lăng kon pơlei tơring Ia Puch sơkơ̆t hơdăh, tơdrong tơoăt tơgoăl ƀar păh ƀô̆ đô̆i hăm khul kơdră chĕp pơgơ̆r Đảng, chĕp pơgơ̆r tơring păng kon pơlei roi năr roi hơmet pơ ‘lơ̆ng, pơjing đei jơhngơ̆m pran kơtang lơ̆m atŏk tơ iung mŭk drăm-tơpôl tơklep hăm vei lăng năng tông sơlam teh đak.“Khul ƀô̆ đô̆i hơnơ̆ng iung jang hơdoi adoi pơchoh trong ăn khul kơdră đảng, tơlĕch lơ tơdrong jang đei ƀơm truh sơđơ̆ng sơlam teh đak. Adoi tơgŭm ăn kon pơlei xut xa pơngot rơvĕt tơjur dơnuh, tơ iung pơjing tơring tơrang ‘nao, iung jang hơdoi hăm rim khul năm pơtrui, dăr joang vei lăng sơđơ̆ng sơlam teh đak.”

Đei ƀôh hơdăh yan ou tơ̆ rim tơring sơlam teh đak, vei lăng pơm tơm, vei lăng sơđơ̆ng teh đak ưh khan lăp gơnang lơ̆m bơ̆ jang năm pơtrui, dăr lăng mă oei đei vang lăp đon, kơrŭn jơhngơ̆m đơ̆ng kon pơlei. Mưh kon pơlei lui, vang iung jang hơdoi hăm khul bơ̆ jang, tơdrong pơm hơtŏk jơhngơ̆m đon vang vei lăng sơđơ̆ng đơ̆ng kon pơlei đei hơmet pơ ‘lơ̆ng đơ̆ng tơring. Đại tá Đoàn Ngọc Báu, Chính ủy Hơnih chĕp pơgơ̆r Ƀô̆ đô̆i vei lăng sơlam teh đak dêh char Gia Lai tơbăt, ‘nou jĭ hơyak kăl vă rim tơring vei kơjăp sơđơ̆ng, pơjing rơvơn ăn atŏk tơ iung choh jang sa păng pơm hơtŏk tơdrong hơrih sa ăn kon pơlei pơla.“Tơlĕch jang rim trong jang hơlen băt hơdăh tơdrong, đơ̆ng noh hơlen băt dôm bơngai đei jơhngơ̆m đon ưh kơ ‘lơ̆ng vă tơlĕch jang vei lăng năng tông tơdrong sơđơ̆ng dơ̆ng kơjăp tơring sơlam teh đak, adoi atŏk tơ iung rong kon tơrong, choh jang sa vă tơgŭm ăn kon pơlei atŏk tơ iung mŭk drăm oei sa joh ayŏ tơpôl.”

Vei kơjăp pơm tơm kơdih, sơđơ̆ng tơring sơlam teh đak păng vei lăng năng tông tơdrong hơrih sa kơ kon pơlei ‘noh ƀar tơdrong jang tơklep kơjăp dih băl. Đơ̆ng dôm năr jang tơgŭm ăn kon pơlei choh jang sa, tơdrong tơgŭm djru rim ŭnh hnam đei iŏk yoa ăn teh đak truh tơdrong chă pơrô̆ hơvơn kon pơlei vang vei lăng sơlam teh đak, hơdrơ̆ng sơlam teh đak, Ƀô̆ đô̆i vei lăng sơlam teh đak dêh char Gia Lai tŏk bŏk tơgop hơmet pơ ‘lơ̆ng jơhngơ̆m đon lui yom đơ̆ng kon pơlei, tơ iung pơjing tơring sơlam sơđơ̆ng dơ̆ng kơjăp. Mưh tơdrong hơrih roi năr roi đei vei lăng năng tông, jơhngơ̆m đon lui yom păng hơnăp jang kơ kon pơlei hăm tơdrong jang vei lăng sơđơ̆ng sơlam teh đak jei đei hơmet pơ ‘lơ̆ng, pơjing đei hơyak pran kơjăp iăp kơtang vă tơring sơlam teh đak dêh char Gia Lai atŏk tơ iung kơjăp iăp kơtang hloh.