Đơ̆ng năr 1/11/2025 truh dang ei, khul ƀô̆ đô̆i dêh char Gia Lai hlôi năm dăr lăng, năm tơchă tơ̆ 37 bro lơ̆m teh đak păng 4 bro groi teh tơ̆ teh đak đe, kôch akom đei 85 kơl ƀô̆ đô̆i lôch dŏng teh đak. Dêh char jei iŏk akom đei hloh 3.100 pham unh hnam; dăr lăng, kôch iŏk kơcheh kơting hloh 12.000 kơting ƀô̆ đô̆i lôch dŏng teh đak tơ̆ rim pơsat teh đak, iŏk đei 7.800 kơcheh kơting vă khăm hơlen ADN. Đại tá Võ Tấn Tài - Chính ủy Ƀô̆ đô̆i dêh char, Kơ iĕng Kơdră chĕp pơgơ̆r Hơnih chĕp pơgơ̆r 515 dêh char Gia Lai hơlen, tơdrong iung jang hơdoi ƀar păh rim khul ƀô̆ đô̆i păng kơdră chĕp pơgơ̆r rim kâp lơ̆m dêh char hlôi tơgop jang ‘lơ̆ng tơdrong jang ‘Măng mă 1. Yak mơ̆t lơ̆m ‘Măng mă 2 kơ ‘Măng iung jang 500 măng năr năm tơchă, kôch akŏm păng hơlen băt hơdăh hơnăn ƀô̆ đô̆i lôch dŏng teh đak, rim khul gô hơnơ̆ng kơrŭn đĭ ai hloh dơ̆ng:“Khei năr truh ou kơnh, Hơnih chĕp pơgơ̆r gô hơnơ̆ng pơchoh trong ăn Khul kơdră chĕp pơgơ̆r Đảng dêh char pơrô̆ athei rim tơring, hơnih jang đei tơlĕch jang hơdoi, iung jang kơtang hloh dơ̆ng păng pơjao ăn 6 hơdăh ăn rim hơnih bơ̆jang kiơ̆ ƀlep tơdrong jang. Hăm đĭ đăng tơring đơ̆ng rŏng hop akŏm, hơlen hơdăh dôm tơdrong jang kơ rim tơring, phương ‘noh kăl iung jang kơtang hloh dơ̆ng, mă kăl atŏk kơtang vang iung jang đơ̆ng Kon pơlei adoi nhen rim tơdrong jang hlôi đei jơnei mă rim bơngai ƀôh kang bang kơl sơ̆ hlôi năm tơchă, hơlen băt hơdăh nơnăn kơting ƀô̆ đô̆i lôch dŏng teh đak păng kôch akŏm hrei ou vă pơm lơ liơ bơ̆n pơjing đei ‘măng iung jang kơtang păng jang keh đang tơdrong jang mă Hơnih chĕp pơgơ̆r teh đak hlôi pơjao ăn dêh char Gia Lai.”

Yak mơ̆t lơ̆m sơnăm 2027, Hơnih chep pơgơ̆r 515 dêh char Gia Lai gô akŏm khul jang ‘măng mă 2 hăm rim trong tơlĕch jang: jang keh đang 100% trong tơlĕch ăn năm tơchă kôch akŏm mă Quân khu 5 pơjao ăn; jang keh đang iŏk kơcheh kơting rim lŏk pơsat ƀô̆ đô̆i lôch dŏng teh đak tim mă băt hơnăn; dăr lăng, pơjing yưh lĭu 100% ƀô̆ đô̆i lôch dŏng teh đak tim mă băt hơnăn păng iŏk pham ADN ŭnh hnam pang găh mĕ vă hơlen pơtêng dôm tơdrong kơnăl lơ̆m yưh liu teh đak. Tơlĕch jang hloi dôm tơdrong jang ăn khul iung jang, Thượng tá Hoàng Viết Ngọc - Chính trị viên Khul K52 tơbăt jơhngơ̆m kơrŭn đĭ ai iung jang:“Jăl mă hơtuch ‘măng iung jang nhôn gô kơrŭn đĭ ai bơ̆ jang năm tơchă pơđĭ lơ̆m teh đak păng teh đak đe. Nhôn tơlĕch, pơjao ăn rim kang ƀô̆, ƀô̆ đô̆i atŏk kơtang jơhngơ̆m đon tơnăp, hơlen hơdăh hơnăp jang bơ̆n, ưh kơ ‘nhoen gơmăng năr, hơdrin yak hloh dôm tơdrong mơmat tat hrat hrĭn vă jang keh đang ‘lơ̆ng jơnei rim tơdrong jang đei pơjao ăn.”

‘Măng mă ou, 14 khul păng 32 ‘nu jang ‘lơ̆ng hloh lơ̆m bơ̆jang năm tơchă kôch akŏm păng hơlen băt hơdăh hơnăn ƀô̆ đô̆i lôch dŏng teh đak đei sơng iŏk Hla bơar pôk bơnê đơ̆ng Kơdră chĕp pơgơ̆r Hơnih vei lăng kon pơlei dêh char Gia Lai pôk ăn.