Tơ̆ Pơsat Teh đak Ninh Thuận, tơring Xuân Hải, dêh char Khánh Hòa, rim bơngai tang măt hlôh glơng gơvang pơkao, soh hlôt nhang ƀlŏk hơdơ̆r kơ dôm bơngai plang ăn pham lĕch sĕch huŏng kơ yuơ tơdrong pơm tơm, rơngei hiôk hian kơ Teh đak. Đơ̆ng rŏng pơm lêh yôk păng minh pơnĭt tơbăt jơhngơ̆m đon ƀlŏk hơdơ̆r, 25 kơl ƀô̆ đô̆i lôch dŏng teh đak đei ƀŭ hơmet pơ ‘lơ̆ng. Đơ̆ng mă tơlĕch jang “500 măng năr atŏk kơtang iung jang năm tơchă, kôch akŏm păng hơlen băt hơdăh hơnăn kơting ƀô̆ đô̆i lôch dŏng teh đak”, dêh char Khánh Hòa hlôi kôch akom đei 84 kơl ƀô̆ đô̆i lôch dŏng teh đak. Jơnei ou đei tơdrong vang iung jang hơdoi ƀar păh khul ƀô̆ đô̆i, kơdră tơring păng kon pơlei lơ̆m tơbăt ăn kơtơ̆ng ang, hơnih gru kơnăl tơblăh vang sơ̆, pơvih pơvăn ăn hơlen hơdăh hơnih teh đei ƀŭ ƀô̆ đô̆i lôch dŏng teh đak. Dêh char Khánh Hòa hơnơ̆ng atŏk kơtang năm tơchă, kôch akŏm păng hơlen hơdăh hơnăn kơting ƀô̆ đô̆i lôch dŏng teh đak, hơdrin hơnhăk dôm bơngai lôch dŏng teh đak oei gei tơ̆ kơdrăn tơblăh sơ̆ vih pơdong groong ƀŭ pơ ‘lơ̆ng, trŏ lăp hăm jơhngơ̆m đon hơpơi ‘meh vă đơ̆ng ŭnh hnam rim ƀô̆ đô̆i lôch dŏng teh đak.