Dôm năr ‘nâu, oh Vũ Thị Giang, hŏk tro lăm 8, Hnam trưng jăl ƀar Lê Quý Đôn, xăh Ea Bung, dêh char Đắk Lắk, chơt hơiă vă năm hŏk dơ̆ng. Oh tơroi: “Thây kô pơtho păng Thây kô vei lăng Hnam trưng, dôm anih jang kơpal tơrek truh, pơlung oh tôch lơ găh tơmam drăm, jơhngâm đon. Hnam trưng ‘nŏh asong mơng Hla ar hŏk, tơjur jên hŏk yoa unh hnam pơmat tat. Lơ̆m sơnăm hŏk lăm 6, oh hŏk rơgei, lăm 7 ‘nŏh đei xa pri ‘năi. Oh adrin hŏk vă hŏk roi gơ̆h hlŏh dơ̆ng”.

Ưh lăp vei lăng năng tông hăm đe hŏk tro đei tơdrong arih sa mơmat tat đĕch, mă rim tơring tơ̆ dêh char Đắk Lắk oei akŏm jơhngâm hơmet ming, man 'nao anih jang, lăm hŏk, pơm ‘lơ̆ng ăn tơdrong pơtho păng hŏk pơhrăm. Kiơ̆ đơ̆ng hơlen năng rim hnam trưng, xăh Krông Ana hlôi tơlĕch hloh 11,3 ti hlak jên đơ̆ng jên vă tơmơ̆t ăn tơdrong jang man 16 tŏ Hnam hŏk lơ̆m sơnăm hŏk 'nâu. Ƀok Phan Thanh Việt, Phŏ Kơdră Anih vei lăng kon pơlei xăh Krông Ana, ăn tơbăt: "Mĭnh ƀar tơdrong jang oei hăt jang pơkeh vă tơtom pơyua ăn sơnăm hŏk 'nao. Kŭm hăm hơmet ming hnam trưng, tơring pơtho ăn dôm hnam trưng kơchăng hơlen năng, chre hŭt dơng 'long tih vă vei lăng sơđơ̆ng ‘lơ̆ng lơ̆m pơyan 'mi kial".

Hăm dôm xăh sơlam, nơ̆r athei đei tơlĕch ưh lăp adrô̆ hơmet pơ ‘lơ̆ng hnam trưng đĕch mă oei athei druh kiơ̆ tom tơdrong hơmet ming dơ̆ng anih pơtho pơhrăm. Tơ̆ xăh Ia Lốp, đơ̆ng 5 hnam trưng hơdrol ki, tơring pơgơ̆r thơmet ming jing pă 2 hnam trưng. Lơ̆m noh, Hnam trưng Tĕh đak rong jăl mônh păng jăl ƀar Ia Lốp đei pơjing lơ̆m ‘năr 20/7 păng hlôi hơmet đang bơngai jang, bơngai pơtho kŭm hăm tơdrong rơih iŏk hŏk tro mât.

Ƀok Bùi Tiến Hoạt, Phŏ Kơdră Anih vei lăng kon pơlei xăh Ia Lốp, tơroi: "Truh dang ei rim hnam trưng, tơdrong hơmet ming tơ̆ lăm đei bơ̆ jang tôm bơih, pơjing đei dôm khul pơtho kiơ̆ môn, hơmet ming lăm, đang kơ 'nŏh tơdrong rơih hŏk tro mât hŏk, đĭ đăng hlôi jang đang ngăl bơih. Dang ei nhôn kŭm hăm Anih vei lăng tơdrong jang păng dôm tơ 'ngla tơmât jên jang, hăt hơmet ming dôm tơdrong jang, pơm thoi yơ vă trŏ ƀât 'năr 30/8 ‘nŏh pơjao hnam trưng, pơgơ̆r mât hŏk lơ̆m sơnăm hŏk 'nao".

Kŭm hăm dôm tơdrong tơplih ming găh anih pơtho pơhrăm, khul thây kô pơtho kŭm dơ̆ng tơ̆ hơnăp tơdrong athei pơm lăp hăm dôm tơdrong jang 'nao. Ƀok Phạm Thế Trường, Phŏ hiê̆u trơng Hnam trưng jăl ƀar Buôn Trấp, xăh Krông Ana, ăn tơbăt: “Hnam trưng hlôi pơgơ̆r ăn thây kô hŏk pơhrăm kơdih kŭm nhen vang truh tơ̆ dôm lăm hŏk pơhrăm ming kiơ̆ rim môn đơ̆ng Anih vei lăng pơtho pơhrăm dêh char păng Anih tơm vei lăng pơtho pơhrăm tơlĕch. Mă loi jĭ, hnam trưng pơlung thây kô vang hŏk tơ̆ dôm lăm pơtho tơplih kơmăy sô̆ kŭm nhen hŏk iŏk dôm tơdrong vă pơtho pơhrăm 'nao".

Đơ̆ng tơdrong hơmet ming hrơ̆ch ‘lơ̆ng đơ̆ng tơmam drăm, lăm hŏk, khul thây kô pơtho truh tơdrong tơgŭm, oei pơjing đei tơdrong ‘lơ̆ng vă sơnăm hŏk ‘nao tơ̆ Đắk Lắk đei pơtơm mât hŏk hăm đon kơchăng, sơđơ̆ng ‘lơ̆ng vă đe ŏh hŏk tro jô̆ hloi tơ̆ tơring đei ƀôh, hiôk hian truh tơ̆ dôm tơdrong pơmat tat đei dơ̆ng tơdrong ‘lơ̆ng vă hŏk pơhrăm păng yak tŏk./.