Đơ̆ng rŏng hloh mĭnh sơnăm jang kiơ̆ trong bơ̆ jang Khul kơdră chĕp pơgơ̆r tơring 2 kâp, Lâm Đồng oei đei lơ tơdrong tơhlăk tơhlĭn lơ̆m bơ̆ jang vei lăng groi teh. Mơjĭt rơbou hektar teh pơprŏ ăn tơchă sir iŏk bô-xít, titan hlom lơ̆m bro kon pơlei oei, hơnih kơdrơ̆m păng hơnih ming man; rơbou ŭnh hnam kon pơlei tŏk bŏk hơrih sa lơ̆m groi teh mir đak lar dăh mă tơ̆ rim bro tim mă đei pơprŏ ăn oei. Lơ hơgăt teh choh jang sa oei tơgar dih băl hăm mir pơgar choh jang sa, bri ‘long.

Ƀok Bon Yô Soan, Kơ iĕng Kơdră chĕp pơgơ̆r Hơnih bơ̆ jang MTTQ Việt Nam dêh char Lâm Đồng tơbăt, Khôi luơ̆t groi teh sơnăm 2024 păng hla bơar pơtho tơbăt hlôi pơjing đei trong tơplih hơ iă, mă lei lơ̆m jang kiơ̆ oei đei ƀôh tim mă trŏ lăp păng jang kiơ̆ tim mă lei lăi dih băl, mă kăl hăm dôm tơdrong oei tim mă sek tơlang keh đang đơ̆ng hơdrol: “Bơngai tăh hla hơpơi ‘meh vă Kuô̆k hô̆i, Khul kơdră teh đak păng rim Hơnih tơm, Hơnih bơ̆ jang Trung ương hơnơ̆ng dăr lăng, pơm pơkeh rim tơdrong tơchơ̆t kơ Khôi luơ̆t găh groi teh kiơ trong hơdăh hloh dơ̆ng, pơm kiơ̆ ƀônh, adoi đei trong tơchơ̆t sek tơlang hăm dôm tơdrong xek tơlang ưh kơ kĕ keh đang đơ̆ng đunh vă veh ver đei tơdrong tơkêng, pơm sơđơ̆ng ăn tơdrong pơm tơm păng đei iok yoa trŏ lăp ăn kon pơlei.”  

Chă mơ̆ng lăng ‘Măng hop akŏm hăt hot mă blŭng, Kuô̆k hô̆i jăl XVI, bơngai tăh hla dêh char Lâm Đồng tơbăt jơhngơ̆m đon hơmŏ trong hơmet ming Khôi luơ̆t groi teh sơnăm 2024 kơ kuô̆k hô̆i păng Khul kơdră Teh đak gô pơm ‘lơ̆ng groi teh ăn chăl atŏk tơ iung ‘nao.

Hăm kơjă teh, tang măt ăn khul kơdră chĕp pơgơ̆r păng hơnih bơ̆ jang kơ dêh char Lâm Đồng athei Teh đak drơ̆ng mĭnh nơ̆r trong chĕp pơgơ̆r, lăng truh găh kơjă teh mă hơdăh. Atŭm hăm ‘noh kăl pơm pơkeh yưh liu groi teh vă tơbăt hơdăh rơhao, pơjing đei rơvơn ăn chă tĕch răt dih băl teh păng pơm dă ƀiơ̆ đei tơdrong ou to lơ̆m vei lăng.

Ƀok Lê Trọng Yên, Phŏ Kơdră juăt jang kơ Hơnih jang vei lăng kon pơlei dêh char Lâm Đồng pơtruh nơ̆r gah tơchơ̆t thu iŏk teh kiơ̆ khei năr pơkăp hăm minh ƀar tơdrong tơlĕch jang, mă kăl noh hăm tơdrong sir tơmam kăp gĭt lơ̆m teh:  “Dôm tơdrong tơlĕch chă sir tơmam kăp gĭt lơ̆m teh mă bơ̆n iŏk teh noh tôch tơnap tap. Kơlih kon pơlei ƀơm iŏk teh, bơ̆n athei đei trong jang tơgŭm ăn kon pơlei đei trong jang xa ƀônh hiôk hloh. Tơdrong mă tơplih Luơ̆t groi teh ƀơm thu iŏk kiơ̆ khei năr gô tơjur ƀiơ̆ jên hrŭ 'mong asong hơnih oei xa sơđơ̆ng păng dah ƀiơ̆ huach jên asong jang gah alumin”.