Mĭnh lơ̆m dôm tơdrong đei bơngai jang lăng truh ‘noh sơđơ̆ng tơdrong đei iŏk yoa sa hơpăh ƀao hiêm tơpôl tơdăh hơnih mơdro sa ưh kơ jăl ba ăn kon jên răt ƀao hiêm. Ƀok Cao Văn Bi, Kơdră chĕp pơgơ̆r Công đoàn kơ mĭnh hơnih mơdro sa tơ̆ phương Tuy Hòa, dêh char Đắk Lắk, athei kăl đei trong jang vă bơngai jang hoei đei ƀơm ưh kơ ‘lơ̆ng mưh hơnih mơdro sa tim mă jang keh đang răt ăn ƀao hiêm tơpôl.“Tơdrong tơchơ̆t 158 ‘noh ƀao hiêm tơpôl lăp sơkơ̆t hơdăh khei ‘năr mă hơnih mơdro sa ba ăn kon jên răt ƀao hiêm ăn bơngai jang. Lơ loh, bơngai jang ưh kơ đei iŏk yoa sa yuơ yă kiơ. Kơ yuơ lơ loh jei ‘meh vă chă apĭnh athei ‘noh pơm lơ liơ ‘noh vă sơkơ̆t hơdăh jơ ‘năr ba ăn kon jên răt ƀao hiêm kơ bơngai jang truh jơ ‘năr pơdơ̆h bơ̆ jang. Pă 2 khei, 3 khei dăh mă 1 sơnăm mă hơnih mơdro sa tim mă ba ăn kon jên răt ƀao hiêm ‘noh teh đak, hơnih bơ̆ jang kơ bơ̆n đei hơnăp jang iŏk kon jên ‘noh đơ̆ng hơnih mơdro sa vă ăn bơngai jang hoei đei ƀơm kơnê̆”.

Tơ̆ Hop akŏm, rim nơ̆r tơgop đơ̆ng đoàn viên, kŏng nhân, kang ƀô̆, bơngai jang păng kang ƀô̆ kŏng đoàn akŏm lơ̆m dôm tơdrong tơnap tap tơlĕch ăn lơ̆m tơdrong hơrih, tơdrong jang păng lơ̆m khei ‘năr jang kiơ̆ rim tơdrong tơgum djru đei ƀơm truh bơngai jang. Mă kăl ‘noh găh tơdrong jang lơ̆m khei ‘năr pơkoel jang gơh tơdrong jang, băt iŏk yoa kmăi kmŏk kơsô̆ roi năr roi kơtang; tơdrong kla ăn kon jên khei hiơ hiơ̆, ưh kơ jăh kla ăn kon jên răt ƀao hiêm; tơdrong ‘meh vă đei hnam oei tơpôl, hnam oei kŏng nhân păng dôm tơdrong tơhlăk tơhlĭn lơ̆m rim tơdrong đei iŏk yoa sa hơpăh đơ̆ng tơdrong tơgŭm djru hơrih sa, jang sa.

Tơl hơdăh găh tơdrong pơtho tơdrong jang păng tơdrong jang tơ̆ tơring, ƀok Nguyễn Quang Thuân, Kơ iĕng kơdră chĕp pơgơ̆r Nô̆i vŭ dêh char Đắk Lắk tơbăt, xek tơmơ̆t jang, pơm hơtŏk jang sa iŏk đei păng sơđơ̆ng hơrih sa ăn bơngai jang ‘noh mĭnh lơ̆m dôm tơdrong jang dêh char lăng ba kơjăp hloh.“Mă blŭng, dêh char hlôi iung jang hơdoi hăm rim hơnih bơ̆jang tơ iung pơjing trong pơprŏ pơtho pơjing, pơm hơtŏk jang gơh hơgei ăn bơngai jang lơ̆m khei năr kơnh. Adoi, tơgŭm djru hơnih mơdro sa krao tơmơ̆t jang, lăng kơjăp truh rim ŭnh hnam pơngot rơvĕt dơnuh hin, hăm lơ trong tơlĕch jang tơgŭm ăn nhen tơmơ̆t bơngai jang kơtă lơ̆m tơring, tơchă ăn jang tơ̆ dêh char anai păng ba bơngai jang năm jang tơ̆ teh đak đe, lơ̆m ou đei tơdrong jang kiơ̆ pơyan.”

Atŭm hăm xek tơlang dôm tơdrong tơhlăk tơhlĭn găh trong jang tơgŭm djru, tơplih kơsô̆ đei sơkơ̆t hơdăh jĭ mĭnh lơ̆m dôm trong jang kăl vă pơm hơtŏk ‘lơ̆ng pơvih pơvăn, tơgŭm ăn kon pơlei păng bơngai jang đei sơng iŏk ‘lơ̆ng hơ iă tơdrong tơgŭm djru, mă kăl găh tơdrong tơgŭm djru ƀao hiêm tơpôl. Ƀok Tạ Đức Hậu, Kơ iĕng Kơdră chĕp pơgơ̆r ƀao hiêm tơpôl dêh char Đắk Lắk tơbăt, hơnih jang ƀao hiêm tơpôl tŏk bŏk tơplih trong jang pơvih pơvăn ăn bơngai jang đei iŏk yoa dôm tơdrong tơgŭm djru trŏ lăp hloh.“Hơnih ƀao hiêm tơpôl sơkơ̆t hơdăh tơplih đơ̆ng pơvih pơvăn gôchang jing iung jang pơvih pơvăn hloi. Mưh hlôi đei hơnih yưh lĭu ‘lơ̆ng hơ iă ‘noh nhôn tơmơ̆t hloi lơ̆m Hơnih yưh lĭu Teh đak găh tơring kon pơlei oei vă đei ƀôh dôm hơnăn lơ̆m kmăi kmŏk kơ bơngai jang tim mă chih hơdăh tôm tong ‘noh nhôn pơtruh ăn hơnăn dôm bơngai jang oei tim mă tôm ăn hơnih bơ̆ jang vei lăng bơngai jang adoi nhen ăn dôm bơngai jang vă tơtom chih tơmơ̆t, hơmet ming."

Kơdră chĕp pơgơ̆r Hơnih vei lăng kon pơlei dêh char Đắk Lắk sơkơ̆t hơdăh, dôm tơdrong đei pơma dơnuh tơ̆ Hop akom ưh khan lăp pơdơ̆h ƀơ̆t tơblang hơdăh dôm nơ̆r apĭnh mă oei tơlĕch ăn hơnơ̆ng hơmet pơ ‘lơ̆ng đơ̆ng rŏng ‘măng pơma  dơnuh. Hơnih vei lăng kon pơlei dêh char Đắk Lắk sơng iŏk, pơrô̆ athei rim hơnih bơ̆ jang ƀơm truh chă tơchĕng hơlen păng sek tơlang ăn. Adoi athei atŏk kơtang pơma dơnuh kơtă ƀar păh khul kơdră chĕp pơgơ̆r tơring, hơnih mơdro sa hăm bơngai jang; iung jang hơdoi hăm Hơnih jang Công đoàn vă vei lăng năng tông tơdrong hơrih sa ‘lơ̆ng hơ iă ăn bơngai jang păng vei lăng tơdrong đei iok yoa sa yuơ trŏ lăp kơ đoàn viên, bơngai jang.