Rông đei jên asong pơm truh 3 tih hlj, să dang 156 met vuông, kơjung 21,2 met, đei pơm kiơ̆ um ai rông so kơ bơngai Jarai. Pơm rông đei hloi unh hơyuh, tơmam tơjră hăm grơ̆m glaih kơmlat, tơmam tang găn păng pĭt unh xa, pơm hơnih akŏm hŏk hôp ăn kon pơlei, pơgơ̆r tơdrong akŏm joh ayŏ kơ kon pơlei.

Lơ̆m 'măng ou, rim hơnih jang kŭm pơjao tơdrong jang “Hơnglŏng tơ̆k hơdah pơlei pơla” tơ̆ dôm xah Ia Nan, Ia Pnôn păng Ia Krêl. Hăm jên tơgŭm truh 1,6 tih hlj lơ̆m 'măng mă 2 sơnăm 2026, tơdrong pơm jang gô vă pơlăp 533 jrăng unh hơyuh jơ̆ng 'năr tơ̆ 18 km jăl trong, tơ̆ 12 tơring kon pơlei oei xa lơ̆m dêh char Gia Lai, Quảng Ngãi păng Quảng Trị. Dôm tơdrong pơm jang ou tơgop hơtŏk tơdrong hơrih, vei sơđơ̆ng tơpôl păng kơhret kơjăp tơdrong tơguăt tơguăl khul linh hăm kon pơlei tơ̆ tơring sơlam teh.