2 tŏ hnam hŏk hôp đei akŏm jên pơm 5 ti hlak jên yua đơ̆ng Anih tơm vei lăng khŭl linh, vă tơplih ‘lơ̆ng tơdrong hŏk hôp, hơtŏk loi dơ̆ng tơgoăt pôm ƀơ̆r đon linh - kon pơlei păng tơgop chĕp vei tơdrong ‘lơ̆ng hơiă joh ayŏ kon kông. Anih tơm pơgơ̆r Khŭl linh dêh char Đắk Lắk đei pơjao pơm tơ ‘ngla tơmơ̆t jên jang, jang hơdai hăm kơdră đảng, khŭl kơdră tơring tơlĕch jang ming man.

Lơ̆m noh, hnam hŏk hôp tơpôl plei Kđoh đei pơm kiơ̆ thoi hnam kơjung joăt joe kơ bơngai Ê Đê, să 150 mét vuông; hnam hŏk hôp tơ̆ thôn 12, xăh Ia Rvê să 180 mét vuông, đei man kiơ̆ thoi hnam hop akŏm. Dôm hnam hŏk hôp gô jing hơnih kon pơlei tơƀơ̆p, pơma dơnuh, tơroi băl tơdrong hlôh vao jang sa, pơgơ̆r tơdrong jang joh ayŏ, kơdŏ soang, tơplŏng kơdâu. ‘Măng âu, dôm anih jang pơjao tơmam asong ăn kon pơlei oei sa, unh hnam teh đak tơgŭm păng unh hnam đei tơdrong hơrih sa mơmat tat lơ̆m tơring.