Năm truh hăm thôn Đam Pao, tơring Phú Sơn Lâm Hà, dêh char Lâm Đồng, ƀônh kơ tơƀơ̆p bơngai drŏ kăn K’ho hơngŭr chă tanh brai. Hlôi đei jơ ‘năr tơdrong jang dui brai vai tanh khăn dơ̆ng tơ̆ hơnăp vă hiong dong, mălei gơnơm đei tơgŭm djru brai ou to đơng Tơdrong jang Teh đak tơjur dơnuh kơjăp ‘lơ̆ng, lơ unh hnam hlôi vei kơjăp tơdrong jang, pơjing đei jang sa iŏk yoa kơjăp. Mă kăl, tơdrong jang joăt joe ou tŏk bŏk oei pơtho pơhrăm ăn jơhnơr mơlôh dơ̆ng. Yă Long Dinh K’Thin tơbăt, rim kon drŏ kăn yă jei băt tanh brai ngăl, tơgĕch jơ ‘năr rơhơi atŭm hăm ŭnh hnam chă tanh khăn vă pơjing đei iŏk yoa ăn ŭnh hnam.“Ƀar ‘nu kon jei tanh ngăl. Dang yơ rơhơi ‘noh đe hăp tanh. Dang yơ jang mir ‘noh mă pơdơ̆h kơ tanh. Năr rơhơi oei tơ̆ hnam ‘noh hăp tanh brai. Tanh ou hơlen dêh. Ƀar blăh ou sĭt jing mĭnh blăh ‘noh 2 triu 500.000 hlak jên.”

Tơdrong jang tơjur dơnuh kơjăp ‘lơ̆ng tơring kon kông păng groi kông hlôi tơgŭm ăn kơhrĕng ŭnh hnam kon kông oei lơ̆m thôn Đam Pao hơmet pơ ‘lơ̆ng tơdrong hơrih sa ŭnh hnam. Hơdrô̆ hăm tơdrong janh tanh brai ưh khan lăp tơgŭm ăn bơngai drŏ kăn đei tơdrong jang, jang sa iŏk đei lơ̆m jơ ‘năr rơhơi jang sa mă oei tơgop vei răk tơƀăk mong tơdrong jang joăt joe đơ̆ng sơ̆ dơ̆ng. ‘Nhŏng Ha Mi, bơngai joăt jang Hơnih vei lăng Oei sa Joh ayŏ-Tơpôl tơring Phú Sơn Lâm Hà tơbăt, ‘meh vă Tơdrong jang tơm Teh đak iung jang jơnei, kăl tơgŭm ƀlep tơdrong ‘meh vă păng pơjing rơvơn vă kon pơlei iung jang atŏk tơ iung jang sa.“Tơgŭm ăn tơmam blŭng ‘noh tơmam vă tanh. Đei dôm lăm pơtho pơhrăm tơdrong jang, đei bơngai pơtho ăn hloi dôm tơdrong mă kon pơlei ‘meh vă.”

Đơ̆ng tơdrong jang sa kơ ŭnh hnam truh trong hnam tơring tơrang, kon jên jang đơ̆ng rim Tơdrong jang tơm teh đak tŏk bŏk tơgop pơm tơplih tơ̆ minh ƀar tơring tơnap tap kơ Lâm Đồng. Lơ̆m 5 sơnăm ou ki, dêh char tơjur vă jê̆ 50.000 ŭnh hnam dơnuh kiơ̆ pơkăp lơ trong.

Tơ̆ tơring Đam Rông 4, tơring tơnap tap hloh, rim trong nơnăm, hnam trương păng dôm tơdrong pơvih pơvăn ăn choh jang sa đei sơkơ̆t jĭ tơlĕch jang hơdrol hloh. Ƀok Nguyễn Văn Quang, Kơ iĕng Kơdră chĕp pơgơ̆r Hơnih vei lăng kon pơlei tơring Đam Rông 4, tơbăt, sơnăm ou tơring pơprŏ ăn hloh 22 ti hlak jên đơ̆ng rim tơdrong jang tơm teh đak vă roi năr roi hơmet pơ ‘lơ̆ng sơđơ̆ng dôm tơdrong kăl ăn kơ kon pơlei.“Nhôn hơlen ming dơ̆ng đĭ đăng hơnih jang vă tơmơ̆t jên jang dôm hơnih kăl hloh ‘noh tơmơt jang hơdrol, pơih să trong nơnăm, hơmet ming tơring tơrang ‘lơng liĕm. Dôm tơdrong kăl trong nơnăm ou to kơ kon pơlei lơ̆m choh jang sa, chă yơ yak ‘noh jei hlôi đei iung jang keh đang ngăl bơih.”

Sơnăm 2026, dêh char Lâm Đồng đei tơlĕch ăn vă jê̆ 900 ti hlak jên kon jên teh đak tơmơ̆t jang găh tơ iung pơjing tơring tơrang ‘nao, tơjur dơnuh kơjăp ‘lơ̆ng păng atok tơ iung mŭk drăm-tơpôl tơring kon kông, groi kông. Lơ̆m ou, kon jên Trung ương hloh 474 ti hlak jên, kon jên bơ̆ jang tơring hloh 419 ti hlak jên. Tơring jei atŏk kơtang tơlĕch kon jên bơ̆ jang hloh 379 ti hlak jên đơ̆ng kon jên tơmơ̆t ăn dơ̆ng jên jang đơ̆ng sơnăm 2025.

Sơkơ̆t hơdăh ‘nou jĭ tơdrong jang tơm, Lâm Đồng athei rim hơnih bơ̆ jang, tơring pơm hơdăh hơnăp jang, atŏk kơtang iung jang, adoi chă hơvơn dơ̆ng tơpôl vang iung jang. Ƀok Hồ Văn Mười, Kơdră jang lơ̆m Trung ương Đảng, Kơdră chĕp pơgơ̆r Hơnih vei lăng kon pơlei dêh char Lâm Đồng, sơkơ̆t hơdăh:“Lâm Đồng nhôn sơkơ̆t hơdăh ‘nou jĭ mĭnh tơdrong jang tôch gĭt kăl. Hrei ou nhôn tŏk bŏk akŏm iung jang kơtang, klăh asong ăn truh rim hơnih jang, tơring păng pơjao ăn rim Kơ iĕng Kơdră chĕp pơgơ̆r chiu pŭ iung jang rim tơdrong jang hlôi đei pơjao. Lâm Đồng pơkăp lơ̆m khei 12 gô tơlĕch pơđĭ kon jên tơmơ̆t jang ou, adoi gô akom krao hơvơn tơpôl vang iung jang vă atŭm hăm kon jên jang đơ̆ng Trung ương jang kiơ̆ ‘lơ̆ng hlŏh dơ̆ng Tơdrong jang tơm teh đak”.

Kiơ̆ trong pơchoh ăn đơ̆ng Khul kơdră teh đak, jăl jang 2026-2035, puăn tơdrong jang tơm teh đak đei hơgrop jing Tơdrong jang tơm teh đak atŏk tơ iung oei sa joh ayŏ-tơpôl, tơring choh jang sa, kon kông păng groi kông. Lâm Đồng tŏk bŏk dăr lăng rim trong tơlĕch jang, tơdrong jang, tơdrong vă jang păng kon jên jang đơ̆ng rim tơdrong jang tơm dang ei vă sơkơ̆t hơdăh dôm tơdrong hơnơ̆ng iung jang dơ̆ng, hơmet ming dăh mă pơtôch; adoi hơmet pơ ‘lơ̆ng khul chĕp pơgơ̆r, pơm hơdăh hơnăp jang trŏ lăp hăm dôm tơdrong đei yan ou păng tơdrong kĕ đei kon jên tơmơ̆t jang.

Tơ̆ jơ bơ̆ jang hăm dêh char Lâm Đồng găh tơdrong jang kiơ̆ Tơnô̆ 2 Tơdrong jang tơm teh đak, Kơdră chĕp pơgơ̆r Hơnih tơm vei lăng Kon kông păng Lui khop Nguyễn Đình Khang pơma hơdăh athei tơlĕch kon jên jang tơklep hăm iŏk đei jơnei, veh ver tơmơ̆t jên jang lơ̆m lơ tơdrong vă jang păng lăng kơjăp vei kơjăp, iŏk yoa ‘lơ̆ng hơnih ming man đơ̆ng rŏng tơmơ̆t jên jang.“Lăng kơjăp tơlĕch kon jên jang mă lei kăl tơklep kơjăp hăm tơdrong iŏk đei jơnei. Dôm tơdrong yă kiơ ưh kơ gan kăl ‘noh pơdơ̆h tơmơ̆t iung jang lơ̆m dôm tơdrong jang anai kiơ̆ ƀlep tơdrong tơchơ̆t păng pơkăp. Mă kăl ‘noh mưh bơ̆n iung jang rim Tơdrong jang tơm ou ‘noh bơ̆n bơ̆n hlôi tơmơ̆t kon jên jang lơ̆m rim hơnih ming man kăl lăng hơlen, dăr lăng dơ̆ng đơ̆ng rŏng tơmơ̆t jên jang vă proh hơmet kon jên jang nhen lĕ mĭnh trong jang vă chĕp pơgơ̆r.”

Đơ̆ng tơdrong jang dui brai vai tanh khăn tơ̆ thôn Đam Pao, tơring Phú Sơn Lâm Hà truh dôm hơnih ming man tơring hơtăih yăih, rim tơdrong jang tơm teh đak tŏk bŏk tơgop hơmet pơ ‘lơ̆ng tơdrong hơrih sa kơ kon pơlei Lâm Đồng. Jăl ‘nao pơkoel dêh char ưh khan lăp atŏk kơtang tơlĕch kon jên tơmơ̆t jang mă lei kăl iok yoa kon jên ƀlep tơdrong jang, lăng kơjăp tơmơ̆t jên jang ming man trong hnam hăm atŏk tơ iung jang sa, pơm hơtŏk jang sa iŏk đei păng vei lăng năng tông tơdrong oei sa joăt joe ‘lơ̆ng rŏ sơ̆ ki. ‘Nou jei jing dôm tơdrong kăl vă rim Tơdrong jang đei iŏk yoa đunh đai tai sơnăm, pơjing hơyak pran atok tơ iung kơjăp ‘lơ̆ng ăn tơring tơnap tap.