Ƀlep lơ̆m jơ ‘năr ou, dêh char tơlĕch kon jên đơ̆ng jên bơ̆ jang dêh char hloh 21 ti 500 triu hlak jên vă pôk ăn vă jê̆ 36.000 tơnô̆ tơmam drăm ăn rim ƀô̆ đô̆i rơka, ƀô̆ đô̆i jĭ jăn, ŭnh hnam ƀô̆ đô̆i lôch dŏng teh đak, Yă mĕ Việt Nam nuih mơng, Ƀô̆ đô̆i nuih mơng păng dôm bơngai đei iŏk yoa ăn kĕch mang. Atŭm hăm ‘noh, Kơdră teh đak jei pơtruh pôk ăn tơmam drăm ăn 27.200 ŭnh hnam đei iŏk yua ăn teh đak tơ̆ Đắk Lắk hăm akŏp kon jên hloh 8 ti 230 triu hlak jên, pơm hơtok kon jên lăng tông nông gia ‘măng mă ou đei truh hloh 30 ti hlak jên. Hrei ou, dêh char Đắk Lắk tŏk bŏk vei lăng hloh 128.000 hô sơ đei sa jên khei teh đak, pơ đĭ đei hloh 94.000 hô sơ bơngai đei iok yoa ăn teh đak hăm ŭnh hnam păng dang 34.000 hô sơ găh lơ̆m tơdrong tơgŭm djru anai.